മലയാള സിനിമയിൽ പുതിയ ചരിത്രം കുറിക്കാനെത്തുകയാണ് ‘ഋ’ എന്ന ചിത്രം. നിവിൻ പോളിയാണ് ചിത്രത്തിൻ്റെ ഫസ്റ്റ് ലുക്ക് പോസ്റ്റര്‍ പുറത്ത് വിട്ടത്. പ്രണയ വസന്തം തീർത്ത ഷേക്സ്പിയറിന്റെ ഒഥല്ലോ പ്രമേയമാക്കി ഒരുക്കുന്ന ചിത്രമാണ് ‘ഋ’.
നീണ്ട 23 വർഷത്തെ ഇടവേളയ്ക്ക് ശേഷം ഒഥല്ലോ വീണ്ടും മലയാളത്തിൽ സിനിമയാകുന്നു എന്ന പ്രത്യേകതയും ‘ഋ’ നുണ്ട്.
ഷേക്സ്പിയറിന്റെ ഒഥല്ലോയെ ആസ്പദമാക്കി അവസാനം പുറത്തിറങ്ങിയ മലയാള സിനിമ ദേശീയ പുരസ്‌കാരം നേടിയ കളിയാട്ടം ആയിരുന്നു.
ചിത്രത്തിന്റെ നിർമാതാക്കളിൽ ഒരാൾ അയർലണ്ട് മലയാളികൂടിയായ ജോർജ് വർഗീസ് ആണ്. ജോർജും സുഹൃത്തുക്കളും ചേർന്നാണ് സിനിമ നിർമ്മിക്കുന്നത്. വാട്ടർഫോർഡിൽ ആണ് ജോർജ് അയർലണ്ടിൽ താമസിക്കുന്നത്. വാട്ടർഫോർഡ് യൂണിവേഴ്‌സിറ്റി ആശുപത്രിയിൽ ജോലി ചെയ്യുന്ന മൗറീൻ ആണ് ഭാര്യ. കോട്ടയം സ്വദേശിയാണ് ജോർജ്. മുൻ കെ എസ് യു നേതാവും മഹാത്മാ ഗാന്ധി സർവകലാശാല സെനറ്റ് അംഗവുമായിരുന്നു ജോർജ് വർഗീസ്.
വൈദികനായ വർഗീസ് ലാലാണ് ചിത്രം സംവിധാനം ചെയ്യുന്നത്. ഒരു വൈദികൻ സംവിധാനം ചെയ്യുന്ന ആദ്യത്തെ മലയാള സിനിമ എന്ന പ്രത്യേകതയാണ് ‘ഋ’ നുള്ള മറ്റൊരു സവിശേഷത. ദേശീയ പുരസ്‌കാര ജേതാവും നടനും പ്രശസ്ത സംവിധായകനുമായ സിദ്ധാർഥ് ശിവ ഛായാഗ്രഹണം നിര്‍വ്വഹിക്കുന്നു എന്നതാണ് മറ്റൊരു പ്രധാന സവിശേഷത. സിദ്ധാര്‍ത്ഥ് ശിവ ആദ്യമായി ക്യാമറ കൈകാര്യം ചെയ്യുന്ന ചിത്രം കൂടിയാണ് ഇത്. ചിത്രത്തിന്റെ എഡിറ്റിങ് നിര്‍വ്വഹിക്കുന്നതും സിദ്ധാർഥ് തന്നെയാണ്.
ചിത്രം കാമ്പസ് പശ്ചാത്തലത്തിലാണ് ഒരുക്കിയിരിക്കുന്നത്. പ്രണയവും വർണത്തിൻ്റെ രാഷ്ട്രീയവുമാണ് ചിത്രത്തിൻ്റെ മുഖ്യപ്രമേയമാകുന്നത്. മഹാത്മാഗാന്ധി സർവ്വകലാശാലയിൽ പൂർണമായി ചിത്രീകരിച്ച ആദ്യ സിനിമ എന്ന പ്രത്യേകതയും ഈ ചിത്രത്തിനുണ്ട്. എം.ജി. യൂണിവേഴ്‌സിറ്റി സ്കൂൾ ഓഫ് ലെറ്റ്ഴ്‌സ് അധ്യാപകനായ ഡോ.ജോസ്.കെ.മാനുവലാണ് ചിത്രത്തിനായി തിരക്കഥ ഒരുക്കിയിരിക്കുന്നത്.
വിശാൽ ജോണ്സൺൻ്റെ വരികൾക്ക് സൂരജ്‌ എസ്. കുറുപ്പ് സംഗീതം പകർന്നിരിക്കുന്നു. ഷേക്സ്പിയർ ആർട്സിന്റെ ബാനറിൽ ആണ് ചിത്രത്തിൻ്റെ നിർമ്മാണം.രഞ്ജി പണിക്കർ, രാജീവ് രാജൻ , നയന എൽസ, ഡെയിൻ ഡേവിസ്, വിദ്യ, അഞ്ജലി നായർ, മണികണ്ഠൻ പട്ടാമ്പി, കോട്ടയം പ്രതീപ് തുടങ്ങിയവരാണ് ചിത്രത്തിലെ പ്രധാന കഥാപാത്രങ്ങളെ അവതരിപ്പിച്ചിരിക്കുന്നത്
