കോവിഡ് വകഭേദമായ ഒമിക്രോണിന്റെ ഉപവകഭേദമായ BA.4 അയര്ലണ്ടില് സ്ഥിരീകരിച്ചു. ഒമിക്രോണിന്റെ ഉപവകഭേദങ്ങളായ BA.4, BA.5 എന്നിവയെ ഈയിടെയാണ് Variants of Interest എന്ന വിഭാഗത്തില് നിന്നും Variants of Concern-ലേയ്ക്ക് European Centre for Disease Prevention and Control (ECDC) മാറ്റിയത്. BA.4 ബാധിച്ച രണ്ട് കേസുകളാണ് അയര്ലണ്ടില് റിപ്പോര്ട്ട് ചെയ്യപ്പെട്ടിരിക്കുന്നത്.
മെയ് 7-ന് ശേഷമാണ് രണ്ട് കേസുകളും റിപ്പോര്ട്ട് ചെയ്യപ്പെട്ടിരിക്കുന്നതെന്ന് ചീഫ് മെഡിക്കല് ഓഫിസര് ഡോ. ടോണി ഹോലഹാന് നല്കിയ റിപ്പോര്ട്ടില് വ്യക്തമാക്കുന്നു. അതേസമയം BA.5 ബാധ ഇതുവരെ രാജ്യത്ത് സ്ഥിരീകരിച്ചിട്ടില്ല.
സൗത്ത് ആഫ്രിക്കയില് ഇക്കഴിഞ്ഞ ജനുവരി, ഫെബ്രുവരി മാസങ്ങളിലായാണ് ഈ രണ്ട് ഉപവകഭേദങ്ങളും ആദ്യമായി കണ്ടെത്തിയത്. തുടര്ന്ന് സൗത്ത് ആഫ്രിക്കയില് രോഗം പരത്തുന്നതില് പ്രബല വകഭേദങ്ങളായി ഇവ മാറിയിരുന്നു.
വാക്സിനും, നേരത്തെ രോഗം വന്ന ശേഷമുള്ള ആന്റിബോഡികളും നല്കുന്ന പ്രതിരോധത്തിനെ മറികടക്കാന് ഈ വകഭേദങ്ങള്ക്ക് ആയേക്കുമെന്ന് ആശങ്കയുണ്ട്. അതേസമയം നേരത്തെയുള്ള ഒമിക്രോണ് ഉപവകഭേദങ്ങളെക്കാള് ഗുരുതരമായ രോഗത്തിന് ഈ പുതിയ വകഭേദങ്ങള് കാരണമാകുമെന്നതിന് ഇതുവരെ തെളിവൊന്നും ലഭിച്ചിട്ടില്ല.
യൂറോപ്പില് ഓസ്ട്രിയ, പോര്ച്ചുഗല് എന്നിവിടങ്ങളിലാണ് ഈ വകഭേദം കാര്യമായി ബാധിച്ചിരിക്കുന്നത്. എങ്കിലും ഭാവിയില് മറ്റ് യൂറോപ്യന് രാജ്യങ്ങളിലേയ്ക്കും ഇവ വ്യാപിച്ചേക്കാം.
രാജ്യത്ത് പുതിയ വകഭേദം സ്ഥിരീകരിച്ചത് ആശങ്കപ്പെടുത്തുന്നതാണെന്ന് പറഞ്ഞ പ്രധാനമന്ത്രി മീഹോള് മാര്ട്ടിന്, ബൂസ്റ്റര് ഷോട്ടുകള് എടുക്കാനുള്ളവര് എത്രയും വേഗം അതിന് തയ്യാറായി പ്രതിരോധം വര്ദ്ധിപ്പിക്കണമെന്ന് അഭ്യര്ത്ഥിക്കുകയും ചെയ്തു.