അയർലൻഡിലെ റോഡുകളിലെ ടോൾ നിരക്ക് ജനുവരി മുതൽ വർധിപ്പിക്കാനൊരുങ്ങി അധികൃതർ.
നിലവിലെ ഉയർന്ന പണപ്പെരുപ്പ നിരക്ക് കാരണമാണ് ടോൾ വർധിപ്പിക്കാനുള്ള തീരുമാനമെന്ന് സ്റ്റേറ്റ് റോഡ്സ് ഓപ്പറേറ്റർ Transport Infrastructure Ireland (TII) വക്താവ് പറഞ്ഞു.
2023 ജനുവരി 1 മുതൽ നിരക്ക് വർധന പ്രാബല്യത്തിൽ വരും. വർദ്ധനവ് പ്രാബല്യത്തിൽ വരുമ്പോൾ ദേശീയ റോഡ് ശൃംഖലയിലെ റോഡുകളിലൊന്ന് ഉപയോഗിക്കുന്നതിനുള്ള ചെലവ് ഒരു യാത്രയിൽ 60 സെന്റ് വരെ ഉയരും.
ഡബ്ലിനിലെ M50 റോഡുകളിൽ വാഹനം ഓടിക്കുമ്പോൾ ടാഗുകൾ ഉപയോഗിക്കുന്നവർക്ക് €2.10 മുതൽ €2.30 വരെയും, വീഡിയോ ക്യാപ്ചർ സംവിധാനത്തിൽ €2.70 മുതൽ €2.90 വരെയും, രജിസ്റ്റർ ചെയ്യാത്ത വാഹനങ്ങൾക്ക് €3.20 മുതൽ €3.50 വരെയും ടോൾ നിരക്ക് വർദ്ധിക്കും.
രാജ്യത്തെ എട്ട് പൊതു-സ്വകാര്യ പങ്കാളിത്ത കമ്പനികളുടെ ടോളുകളും റൂട്ട് അനുസരിച്ച് 10 %മുതൽ 20 % വരെ വർദ്ധിക്കും.
ഡബ്ലിൻ പോർട്ട് ടണൽ റോഡിൽ ടോളുകൾക്കു പുതിയ വർദ്ധനവ് ബാധകമാവില്ല .വാനുകൾ, ബസുകൾ, ഹെവി വാഹനങ്ങൾ എന്നിവയ്ക്കു കാറുകളെ അപേക്ഷിച്ചു വലിയ വർദ്ധനവുണ്ടാകും. സർക്കാരിനും പൊതു-സ്വകാര്യ പങ്കാളിത്ത ( PPP) കമ്പനികൾക്കും ടോളുകൾ നിശ്ചയിക്കുന്നതിൽ “വിവേചനാധികാരം” ഉള്ളതായി TII സ്ഥിരീകരിച്ചു.
