കോര്‍ക്കില്‍ ചെറുപ്പക്കാരന്‍ ആക്രമണത്തില്‍ കൊല്ലപ്പെട്ട സംഭവത്തില്‍ പ്രധാന പ്രതിയെന്ന് സംശയിക്കുന്നയാള്‍ ഗാര്‍ഡയുടെ പിടിയില്‍. വെള്ളിയാഴ്ച രാത്രി Cork Armed Support Unit (ASU) നടത്തിയ ഓപ്പറേഷനിലാണ് കൗണ്ടി വാട്ടര്‍ഫോര്‍ഡിലെ ഗ്രാമമായ Cappoquin-ല്‍ ഒളിച്ചുകഴിയുകയായിരുന്ന പ്രതിയെ പിടികൂടിയത്.
മാര്‍ച്ച് 15-നാണ് കോര്‍ക്കിലെ Cobh-ല്‍ ഷെഫ് ആയി ജോലി ചെയ്തുന്ന Ian Baitson (33) കൊല്ലപ്പെട്ടത്. വാള്‍ പോലുള്ള ആയുധം കൊണ്ട് കാലിന് വെട്ടേറ്റതിനെത്തുടര്‍ന്നുണ്ടായ ഗുരുതര പരിക്കാണ് മരണത്തിലേയ്ക്ക് നയിച്ചത്. രാത്രി 9 മണിയോടെ Newtown-ലെ ഒരു പാര്‍ക്കിങ് സ്‌പേസില്‍ വച്ചായിരുന്നു ആക്രമണം. ആശുപത്രിയില്‍ പ്രവേശിപ്പിച്ചെങ്കിലും ഇദ്ദേഹം ചൊവ്വാഴ്ച മരിച്ചു.
അതേസമയം ഒളിവില്‍ നിന്നും പിടികൂടിയ പ്രതിയെ നിലവില്‍ ഗാര്‍ഡ ചോദ്യം ചെയ്തുവരികയാണ്. കൊല്ലപ്പെട്ട Baitson-ഉം ഇയാളും തമ്മില്‍ നല്ല പരിചയമുണ്ടായിരുന്നു എന്നാണ് നിഗമനം.
