ഇന്ത്യൻ കൾചറൽ കമ്മ്യൂണിറ്റി ലീഷ് (ICCL) ആദ്യമായി സംഘടിപ്പിക്കുന്ന ‘Utsav 24’ എന്നു പേരിട്ടിരിക്കുന്ന ആഘോഷ പരിപാടികളുടെ തുടക്കം, കായിക മത്സരങ്ങൾക്ക് ഫ്ലാഗ് ഓഫ് ചെയ്തുകൊണ്ട് Portlaoise ഗാർഡ ഓഫീസർ നിർവഹിക്കുന്നതായിരിക്കും
ജൂലൈ 27-ന് Rathleague GAA ഗ്രൗണ്ട് വേദിയാകുന്ന ഈ മേളയുടെ ഔപചാരികമായ ഉത്ഘാടനം രാവിലെ 11 മണിക്ക് ദീപം തെളിയിച്ചുകൊണ്ട് രാഷ്ട്രീയ സാംസ്‌കാരിക നായകന്മാർ നിർവഹിക്കും. രാവിലെ 9 മുതൽ രാത്രി 9 വരെ നീളുന്ന കലാകായിക മേളയിൽ വിവിധ പ്രദേശങ്ങളെ പ്രതിനിധീകരിച്ചെത്തുന്ന താരങ്ങൾ വടംവലി, തിരുവാതിര, ചെണ്ടമേളം തുടങ്ങി വിവിധ ഇനങ്ങളിൽ മത്സരിക്കുന്നു.
ഭക്ഷണപ്രേമികൾക്ക് രുചിവൈവിധ്യങ്ങളുടെ രസകൂട്ടുകളൊരുക്കി ഇന്ത്യൻ, ആഫ്രിക്കൻ, ഐറിഷ് വിഭവങ്ങൾ വിളമ്പുന്ന ഭക്ഷണശാലകൾ, കുട്ടികൾക്കും മുതിർന്നവർക്കും ഒരേപോലെ ആസ്വദിക്കാൻ പറ്റുന്ന വിനോദോപാധികൾ, കൗ‌തുകക്കാഴ്ചകൾ എന്നിവയും പ്രത്യേകം സജ്ജമാക്കിയിരിക്കുന്നു.
വിശാലമായ വേദിയിൽ വിവിധ രാജ്യങ്ങളെ പ്രതിനിധീകരിച്ചെത്തുന്ന നർത്തകരും ഗായകരും തങ്ങളുടെ കലാ മികവുകൾ തെളിയിക്കുന്നത് കൂടാതെ Elson നയിക്കുന്ന Rhythm Nenagh അവതരിപ്പിക്കുന്ന ഗാനമേളയും, Kumbalam North-ന്റെ സംഗീത വിരുന്നും , Darshan-ന്റെ ചടുല താളത്തിലുള്ള DJ സംഗീതവും ഈ ആഘോഷവേളയെ വേറിട്ടതാക്കുന്നു.സംഗീതത്തോടൊപ്പം ദൃശ്യവിരുന്നൊരുക്കി പ്രതിഭാധനരായ നർത്തകരെ അണിനിരത്തി Mudra ആർട്സും, കുച്ചിപ്പുടിയുമായി ക്ലാസിക്കൽ നൃത്തരംഗത്തെ അതുല്യ പ്രതിഭയായ സപ്ത രാമൻ നമ്പൂതിരിയുടെ സപ്തസ്വര നൃത്തസംഘവും വേദിയിലെത്തുന്നു.
ജൂലൈ 27-ന് ആഘോഷങ്ങൾക്കൊപ്പം നറുക്കെടുപ്പ് വിജയികൾക്ക് I phone 15 Pro, Samsung mobile, Tablet, Smartwatch എന്നിവ സമ്മാനമായി ലഭിക്കുന്നതായിരിക്കും. Utsav 24-ന്റെ മുഖ്യ പങ്കാളികളായെത്തുന്നത് പോർട്ട്‌ലീഷിൽ സ്ഥിരതാമസത്തിനെത്തുന്ന ഇന്ത്യക്കാർക്ക് വീടെന്ന സ്വപ്നത്തിന് സഹായവുമായെത്തുന്ന Sand Wood /Hume Aictioneers എന്നീ നിർമ്മാതാക്കളും, മറ്റു പ്രധാന സ്പോൺസേഴ്സ് മലയാള കൂട്ടായ്മകൾക്കും ആഘോഷങ്ങൾക്കും എല്ലായ്പ്പോഴും സഹായ ഹസ്തവുമായി മുൻപോട്ടു വരുന്ന Bluechip Tiles, Cover in a Click, Toyota Tallaght എന്നീ സംരംഭകരുമാണ്.
ആയിരക്കണക്കിനാളുകൾ പങ്കെടുക്കുന്ന ഈ മേളയിൽ മിതമായ നിരക്കിൽ വാഹനങ്ങൾക്കു പാർക്ക്‌ചെയ്യാനുള്ള വിപുലമായ സൗകര്യങ്ങളും തയ്യാറാക്കിയിരിക്കുന്നു.
പ്രവേശനം തികച്ചും സൗജന്യമായ മേളയുടെ ആരംഭം മുതൽ ഇന്നേവരെ പ്രദേശവാസികളുടെ നിർലോഭമായ പിന്തുണയും പ്രോത്സാഹനവും ആർജ്ജിച്ചെടുക്കുവാൻ സംഘാടകർക്കു സാധിച്ചിട്ടുണ്ട് എന്നത് പ്രത്യേകം എടുത്തുപറയേണ്ട വസ്തുതയാണ്.
കാലാകാലങ്ങളായി Electric Picnic, National Ploughing Competition എന്നിവ നടത്തി പെരുമയാർജിച്ച പോർട്ലീഷിനു വരുംകാലങ്ങളിൽ മേനിപറയാൻ ആഘോഷങ്ങളുടെ പട്ടികയിൽ Utsav Midland Indian Festival-ഉം ഇടംപിടിക്കുന്നുവെന്നുള്ളത് ഇന്ത്യക്കാരെ സംബന്ധിച്ചിടത്തോളം അഭിനന്ദനാർഹമായ ഒരു നേട്ടം തന്നെയാണ്.
