അയര്‍ലണ്ടിലെ 18 കൗണ്ടികളില്‍ മഴ മുന്നറിയിപ്പ് നല്‍കി കാലാവസ്ഥാ നിരീക്ഷണവകുപ്പ്. Leinster-ലെ എല്ലാ കൗണ്ടികള്‍ക്കും പുറമെ Cavan, Monaghan, Leitrim, Roscommon, Tipperary, Waterford എന്നീ കൗണ്ടികളിലുമാണ് ഇന്ന് (ചൊവ്വ) പുലര്‍ച്ചെ 4 മണി മുതല്‍ ബുധനാഴ്ച പുലര്‍ച്ചെ 4 വരെ യെല്ലോ റെയിന്‍ വാണിങ് നിലനില്‍ക്കുക.
അതിശക്തമായ മഴയെ തുടര്‍ന്ന് ഇവിടങ്ങളില്‍ പ്രാദേശികമായ വെള്ളപ്പൊക്കത്തിന് സാധ്യതയുണ്ട്. കാഴ്ച മറയുന്നതോടെ യാത്രയും ദുഷ്‌കരമാകും.
ഇന്ന് രാവിലെ രാജ്യത്ത് പൊതുവെ മേഘാവൃതമായ കാലാവസ്ഥയാകും. ഇടയ്ക്കിടെ മഴയും പെയ്യും. തെക്ക്-കിഴക്കന്‍ പ്രദേശങ്ങളെയും, കിഴക്കന്‍, വടക്ക്-കിഴക്കന്‍ പ്രദേശങ്ങളെയുമാണ് മഴ കാര്യമായി ബാധിക്കുക. ഇത് മിന്നല്‍ പ്രളയത്തിലേയ്ക്കും നയിച്ചേക്കാം. അതേസമയം തെക്ക്-പടിഞ്ഞാറന്‍, പടിഞ്ഞാറന്‍ പ്രദേശങ്ങളില്‍ വരണ്ട കാലാവസ്ഥയാകും അനുഭവപ്പെടുക. 15 മുതല്‍ 20 ഡിഗ്രി സെല്‍ഷ്യസ് വരെയാകും ഉയര്‍ന്ന താപനില.
