കാറ്റിന് ശക്തി കുറഞ്ഞതിന് പിന്നാലെ അയർലണ്ടിൽ ഇന്ന് രാത്രി മഞ്ഞു വീഴ്ചയ്ക്ക് സാധ്യത; താപനില പൂജ്യം ഡിഗ്രിയിലേയ്ക്ക് താഴും

ശക്തമായ കാറ്റും മഴയും തുടരുന്നതിനിടെ അയര്‍ലണ്ടില്‍ ഇന്ന് രാത്രി മുതല്‍ മഞ്ഞുപെയ്യാനും സാധ്യതയെന്ന് കാലാവസ്ഥാ വകുപ്പ്. ഇതെത്തുടര്‍ന്ന് ഇന്ന് (വ്യാഴം) രാത്രി 9 മണി മുതല്‍ വെള്ളിയാഴ്ച രാവിലെ 9 മണി വരെയുള്ള 12 മണിക്കൂര്‍ നേരം Cork, Kerry, Limerick, Tipperary, Waterford, Donegal, Galway, Leitrim, Mayo, Sligo, Wicklow എന്നീ കൗണ്ടികളില്‍ യെല്ലോ സ്‌നോ ഐസ് വാണിങ് നിലവില്‍ വരുമെന്ന് കാലാവസ്ഥാ വിദഗ്ദ്ധര്‍ അറിയിച്ചു. ഇന്ന് രാത്രി അന്തരീക്ഷതാപനില പൂജ്യം ഡിഗ്രി സെല്‍ഷ്യസ് വരെ താഴുകയും ചെയ്യും.

ഈ പ്രദേശങ്ങളില്‍ മഞ്ഞു പെയ്യാനും, ചിലയിടങ്ങളില്‍ മഞ്ഞടിഞ്ഞ് കൂടാനും (പ്രത്യേകിച്ച് ഉയര്‍ന്ന പ്രദേശങ്ങളില്‍) സാധ്യതയുണ്ടെന്നും മുന്നറിയിപ്പില്‍ പറയുന്നു.

ഇതിന് പുറമെ ശക്തമായ കാറ്റ് തുടരുന്ന സാഹചര്യത്തില്‍ Clare, Kerry, Galway എന്നീ കൗണ്ടികളില്‍ വെള്ളിയാഴ്ച പുലര്‍ച്ചെ 2 മണി മുതല്‍ രാവിലെ 6 മണി വരെ യെല്ലോ വിന്‍ഡ് വാണിങ്ങും നല്‍കിയിട്ടുണ്ട്. ശക്തമായ കാറ്റില്‍ സാധനങ്ങള്‍ പറന്നുവന്ന് വീഴാനും, യാത്ര ദുഷ്ടകരമാകാനും സാധ്യതയുള്ളതിനാല്‍ ജനങ്ങള്‍ ജാഗ്രത പാലിക്കുക. തിരമാലകള്‍ പതിവിലുമധികം ഉയരുമെന്നതിനാല്‍ കടലില്‍ പോകുന്നവരും പ്രത്യേകം ശ്രദ്ധിക്കുക.