അതിശക്തമായ മഴയും കാറ്റും; അയർലണ്ടിലെ 3 കൗണ്ടികളിൽ ഓറഞ്ച് വാണിങ്, മറ്റ് മൂന്നിടത്ത് യെല്ലോ

അതിശക്തമായ മഴയ്ക്കുള്ള സാധ്യത കണക്കിലെടുത്ത് Mayo, Donegal, Galway എന്നീ കൗണ്ടികളിൽ ഓറഞ്ച് വാണിങ് നൽകി കാലാവസ്ഥാ വകുപ്പ്. അർദ്ധരാത്രി നിലവിൽ വന്ന വാണിങ് ഇന്ന് (തിങ്കൾ) രാവിലെ 10 മണി വരെ തുടരും.

ശക്തമായ മഴയെ തുടർന്ന് ഈ കൗണ്ടികളിൽ പ്രാദേശികമായ വെള്ളപ്പൊക്കം, യാത്രാക്ലേശം, മറ്റ് നാശനഷ്ടങ്ങൾ എന്നിവ ഉണ്ടായേക്കാം. ശക്തമായ തെക്കൻ കാറ്റും വീശും.

ബാങ്ക് ഹോളിഡേ ആയതിനാൽ ഇന്ന്  ഷോപ്പിംഗ് നടത്താനും മറ്റും പുറത്തിറങ്ങുന്നവർ ജാഗ്രത പാലിക്കണം. മഴയുള്ളപ്പോൾ വേഗത കുറച്ചു മാത്രം വാഹനം ഓടിക്കുക.

ഈ മൂന്ന് കൗണ്ടികളിലെ ഓറഞ്ച് വാണിങ്ങിനു പുറമെ Connacht, Donegal, Clare എന്നിവിടങ്ങളിൽ ഇന്നലെ 1 മണി മുതൽ 24 മണിക്കൂർ യെല്ലോ റെയിൻ വാണിങ്ങും നിലവിലുണ്ട്.

നോർത്ത് അറ്റ്ലാന്റിക്കിൽ രൂപപ്പെട്ട ന്യൂന മർദ്ദമാണ് അയർലണ്ടിലെ ശക്തമായ മഴയ്ക്ക് കാരണമായിരിക്കുന്നത്.