ഡബ്ലിനിൽ ആയുധവുമായി രണ്ട് ചെറുപ്പക്കാർ ഏറ്റുമുട്ടി; ഒരാൾക്ക് ഗുരുതര പരിക്ക്

ഡബ്ലിനിലെ Clondalkin-ൽ ബുധനാഴ്ച രാവിലെ നടന്ന സംഭവത്തിൽ ഒരാൾക്ക് ഗുരുതരമായ പരിക്കേറ്റു. രാവിലെ 6:15-ഓടെ, Clondalkin-ലെ St Cuthbert’s Court- ൽ രണ്ട് ആയുധധാരികൾ പ്രശ്നം സൃഷ്ടിക്കുന്നു എന്ന റിപ്പോർട്ടുകളെത്തുടർന്ന് ഗാർഡ, ഗാർഡ ആംഡ് സപ്പോർട്ട് യൂണിറ്റ്, എമർജൻസി സർവീസസ് ഉദ്യോഗസ്ഥർ എന്നിവർ എത്തിയപ്പോഴാണ് ഗുരുതരമായ പരിക്കുകളോടെ 20-ലേറെ പ്രായമുള്ള ഒരു പുരുഷനെ കണ്ടെത്തിയത്. ഇയാളെ താല ഹോസ്പിറ്റലിൽ പ്രവേശിപ്പിച്ചിരിക്കുകയാണ്.

അതേസമയം സംഭവത്തിൽ ഉൾപ്പെട്ട 20-ലേറെ പ്രായമുള്ള രണ്ടാമത്തെ വ്യക്തിയെ സംഭവസ്ഥലത്ത് വച്ച് അറസ്റ്റ് ചെയ്തു. സംഭവസ്ഥലത്ത് നിന്ന് ഒരു കോടാലിയും കത്തിയും കണ്ടെടുക്കുകയും ചെയ്തിട്ടുണ്ട്.

ആക്രമണത്തെ കുറിച്ച് എന്തെങ്കിലും വിവരം ലഭിക്കുന്നവർ Clondalkin ഗാർഡ സ്റ്റേഷനിൽ 01-666 7600 എന്ന നമ്പറിലോ ഗാർഡ കോൺഫിഡൻഷ്യൽ ലൈൻ 1800 666 111 എന്ന നമ്പറിലോ ബന്ധപ്പെടണമെന്ന് അഭ്യർത്ഥിക്കുന്നു. അന്വേഷണങ്ങൾ തുടരുകയാണെന്ന് ഗാർഡ പറഞ്ഞു.