അയർലണ്ടിലെ പണപ്പെരുപ്പം കുറഞ്ഞു; ഒരു മാസത്തിനിടെ ഗതാഗത ചെലവിലും കുറവ്

അയര്‍ലണ്ടിലെ പണപ്പെരുപ്പത്തില്‍ കുറവ്. 2024 ജനുവരി വരെയുള്ള ഒരു വര്‍ഷത്തിലെ പണപ്പെരുപ്പം 4.1% ആണ് രേഖപ്പെടുത്തിയത്. ഡിസംബര്‍ വരെയുള്ള ഒരു വര്‍ഷത്തിലെ പണപ്പെരുപ്പം 4.6% ആയിരുന്നു.

2021 സെപ്റ്റംബറിന് ശേഷം ഇത് മൂന്നാം തവണ മാത്രമാണ് വാര്‍ഷിക പണപ്പെരുപ്പ നിരക്ക് 5 ശതമാനത്തില്‍ താഴെ നില്‍ക്കുന്നത്. കൂടാതെ ഇത് തുടര്‍ച്ചയായി മൂന്നാം മാസമാണ് പണപ്പെരുപ്പം 5 ശതമാനത്തില്‍ വര്‍ദ്ധിക്കാതെ നില്‍ക്കുന്നതും.

അതേസമയം ഊര്‍ജ്ജം, അസംസ്‌കൃത ഭക്ഷ്യവസ്തുക്കള്‍ എന്നിവ ഒഴിവാക്കിയാല്‍ 2024 ജനുവരി വരെയുള്ള 12 മാസത്തിനിടെയുള്ള പണപ്പെരുപ്പ വര്‍ദ്ധന 5.3% ആണ്.

കഴിഞ്ഞ ഒരു വര്‍ഷത്തിനിടെ ഏറ്റവുമധികം വില വര്‍ദ്ധിച്ചത് recreation and culture മേഖലയിലാണ്- 9.3%. റസ്റ്ററന്റ്, ഹോട്ടല്‍ മേഖലയില്‍ 7.2% വില വര്‍ദ്ധിച്ചു.

2023 ജനുവരിയെ അപേക്ഷിച്ച് വില കുറഞ്ഞ ഏക മേഖല വസ്ത്രവും ചെരിപ്പുകളുമാണ്. 1.3% ആണ് ഈ മേഖലയിലെ വിലക്കുറവ്.

ഡിസംബറിനെ അപേക്ഷിച്ച് ജനുവരിയില്‍ ഗതാഗതച്ചെലവ് 4.1% കുറഞ്ഞിട്ടുണ്ട്. അതേസമയം മദ്യം, പുകയില എന്നിവയ്ക്ക് മാത്രമാണ് വില വര്‍ദ്ധിച്ചത് (2.4% വര്‍ദ്ധന).