പലിശനിരക്ക് വീണ്ടും കുറച്ച് സെൻട്രൽ ബാങ്ക്; മോർട്ട്ഗേജ് എടുത്തവർക്ക് സന്തോഷവാർത്ത

വീണ്ടും പലിശനിരക്ക് കുറച്ച് യൂറോപ്യന്‍ സെന്‍ട്രല്‍ ബാങ്ക്. നിരക്ക് .25% കുറച്ചതോടെ നിലവിലെ നിരക്ക് 2.5% ആയി. ഈ വര്‍ഷം ഇത് രണ്ടാം തവണയും, 2024 ജൂണിന് ശേഷം ഇത് ആറാം തവണയുമാണ് സെന്‍ട്രല്‍ ബാങ്ക് പലിശനിരക്ക് കുറയ്ക്കുന്നത്.

യൂറോസോണിലെ പണപ്പെരുപ്പം നിയന്ത്രിക്കുക എന്ന ഉദ്ദേശ്യത്തോടെയായിരുന്നു നേരത്തെ പലിശനിരക്ക് പടിപടിയായി കൂട്ടിയത്. പലിശനിരക്ക് 2023-ല്‍ റെക്കോര്‍ഡായ 4 ശതമാനത്തില്‍ എത്തുകയും ചെയ്തിരുന്നു. റഷ്യയുടെ ഉക്രെയിന്‍ അധിനിവേശത്തെത്തുടര്‍ന്ന് ഭക്ഷ്യവസ്തുക്കള്‍ക്കും, ഊര്‍ജ്ജത്തിനുമുണ്ടായ അസാമാന്യമായ വിലക്കയറ്റം തടയുകയായിരുന്നു പ്രധാന ലക്ഷ്യം.

പണപ്പെരുപ്പം കുറയ്ക്കാന്‍ ഈ നടപടി സഹായിച്ചതായും, അതിനാലാണ് പഴയ നിരക്കിലേയ്ക്ക് പലിശനിരക്ക് എത്തിക്കാന്‍ നിലവില്‍ ശ്രമിക്കുന്നതെന്നും യൂറോപ്യന്‍ സെന്‍ട്രല്‍ ബാങ്ക് പ്രസ്താവനയില്‍ വ്യക്തമാക്കി. യൂറോസോണിലെ പണപ്പെരുപ്പം ഇക്കഴിഞ്ഞ ഫെബ്രുവരിയില്‍ 2.4% ആയി കുറഞ്ഞിരുന്നു.

അതേസമയം പലിശനിരക്കിലുണ്ടായ ഈ കുറവ് ട്രാക്കര്‍ മോര്‍ട്ട്‌ഗേജ് എടുത്തിട്ടുള്ളവര്‍ക്ക് കാര്യമായും ഗുണം ചെയ്യും. വേര്യബിള്‍ റേറ്റ് മോര്‍ട്ട്‌ഗേജ് എടുത്തിട്ടുള്ളവരുടെ തിരിച്ചടവും കുറയുമെന്ന് Bonkers.ie പറഞ്ഞു. തങ്ങളുടെ ലോണുകള്‍ വള്‍ച്ചര്‍ ഫണ്ടുകള്‍ക്ക് വില്‍ക്കപ്പെട്ടിട്ടുള്ള ഉപഭോക്താക്കള്‍ക്കും ഉപകാരപ്രദമാകുന്നതാണ് സെന്‍ട്രല്‍ ബാങ്കിന്റെ ഈ നടപടി. ഈ വര്‍ഷം തന്നെ വീണ്ടും പലിശനിരക്ക് കുറയ്ക്കല്‍ നടപടിയുണ്ടാകുമെന്നും, നിരക്ക് 2 ശതമാനത്തിലേയ്ക്ക് താഴുമെന്നുമാണ് പ്രതീക്ഷ.