പ്രായപൂർത്തിയാകാത്ത പെൺകുട്ടിയെ ലൈംഗികമായി പീഡിപ്പിച്ച ഡബ്ലിൻകാരന് ആറ് വർഷം തടവ്

പ്രായപൂര്‍ത്തിയാകാത്ത പെണ്‍കുട്ടിയെ ലൈംഗികമായി പീഡിപ്പിച്ച 66-കാരന് ആറ് വര്‍ഷം തടവ്. ഡബ്ലിനിലെ Raheny സ്വദേശിയായ Edward Cruise ആണ് പലവട്ടം തന്റെ വീട്ടില്‍ വച്ച് പെണ്‍കുട്ടിക്ക് നേരെ ലൈംഗികാതിക്രമം നടത്തിയത്. പെണ്‍കുട്ടിക്ക് ആറ് മുതല്‍ 14 വയസ് വരെ പ്രായമുള്ളപ്പോഴായിരുന്നു സംഭവം.

2009-2017 കാലയളവിലാണ് പ്രതി തന്റെ ബന്ധുവിന്റെ പരിചയത്തിലുള്ള പെണ്‍കുട്ടിയോട് നീചകൃത്യം നടത്തിയത്. Cruise-ന്റെ അടുത്ത ബന്ധുവുമായി നല്ല പരിചയമുണ്ടായിരുന്ന പെണ്‍കുട്ടി അവധിക്കാലത്ത് അവരുടെ വീട്ടില്‍ താമസിക്കാന്‍ പോകുമായിരുന്നു. ഇതിനൊപ്പം Cruise-ന്റെ വീടും സന്ദര്‍ശിക്കാന്‍ പോകുന്ന സന്ദര്‍ഭങ്ങളിലാണ് പ്രതി ലൈംഗികപീഡനം നടത്തിവന്നത്.

പീഡനവിവരം പുറത്തുപറയരുതെന്ന് പറഞ്ഞ Cruise, ഒരിക്കല്‍ വീട്ടില്‍ വന്നാല്‍ 5 യൂറോ തരാമെന്നും പെണ്‍കുട്ടിയോട് പറഞ്ഞിരുന്നു.

എന്താണ് സംഭവിക്കുന്നതെന്ന് മനസിലാകാതിരുന്ന പെണ്‍കുട്ടി പിന്നീട് തിരിച്ചറിവ് വന്ന ശേഷം 2020-ലാണ് ഗാര്‍ഡയ്ക്ക് പരാതി നല്‍കിയത്. തുടര്‍ന്ന് അറസ്റ്റ് ചെയ്തപ്പോള്‍ കേസ് കെട്ടിച്ചമച്ചതാണെന്ന് Cruise വാദിച്ചെങ്കിലും തെളിവുകളുടെ ബലത്തില്‍ സത്യം പുറത്തുവരികയായിരുന്നു. വ്യാഴാഴ്ച നടന്ന വിചാരണയില്‍ ഡബ്ലിന്‍ സര്‍ക്യൂട്ട് ക്രിമിനല്‍ കോടതിയാണ് പ്രതിക്ക് ശിക്ഷ വിധിച്ചത്.