ബെൽഫാസ്റ്റ്: സീറോ മലബാർ സഭയുടെ ബെൽഫാസ്റ്റ് റീജിയണൽ കൗൺസിലിന്റെ ആഭിമുഖ്യത്തിൽ മാർച്ച് 7-ന് ബെൽഫാസ്റ്റിലെ ഓൾ സെയിൻ്റ്സ് കോളേജിൽ സംഘടിപ്പിച്ച ബൈബിൾ ഫെസ്റ്റ് (ബൈബിൾ കലോത്സവം) ശ്രദ്ധേയമായ പങ്കാളിത്തത്തോടെയും ആത്മീയ ആവേശത്തോടെയും നടന്നു. സീറോ മലബാർ സഭയുടെ ബെൽഫാസ്റ്റ് റീജിയണൽ കോർഡിനേറ്റർ ഫാ. ജോസ് ഭരണികുളങ്ങര ഉദ്ഘാടനം നിർവഹിച്ചു. ബൈബിൾ ഫെസ്റ്റ് ഡയറക്ടർ ഫാ. ജെയിൻ മണ്ണത്തുകാരൻ പരിപാടിക്ക് നേതൃത്വം നൽകി.
ആരംഭചടങ്ങിൽ ഫാ. ജോ പഴെപറമ്പിൽ, ഫാ. അനീഷ് വഞ്ചിപാറയിൽ, ഫാ. ജോഷി പറൊക്കാരൻ, ഫാ. സജി പൊമ്മിനിശേരി എന്നിവരോടൊപ്പം റീജിയൻ എക്സിക്യൂട്ടീവ് അംഗങ്ങളായ മോൻസി തോമസ് (സെക്രട്ടറി), സോജൻ സെബാസ്റ്റ്യൻ (ജോയിന്റ് സെക്രട്ടറി), ആനന്ദ് ജോസഫ് (പി.ആർ.ഒ) എന്നിവർക്കൊപ്പം കാറ്റിക്കിസം ഹെഡ് മാസ്റ്റർമാരും വിദ്യാർത്ഥികളും ചേർന്ന് തിരിതെളിയിച്ച് ചടങ്ങുകൾക്ക് തുടക്കമായി.
ബെൽഫാസ്റ്റ്, ആൻട്രിം, പോർട്ടഡൗൺ, ഡെറി, ലിസ്ബേൺ, ന്യൂറി എന്നിവിടങ്ങളിൽ നിന്നായി ഏകദേശം അഞ്ഞൂറോളം പേർ പങ്കെടുത്തു. കുട്ടികളും യുവജനങ്ങളും ഉൾപ്പെടെ വിവിധ പ്രായവിഭാഗങ്ങളിലെ മത്സരാർത്ഥികൾ ബൈബിൾ സന്ദേശങ്ങൾ കലാരൂപങ്ങളിലൂടെ അവതരിപ്പിച്ച മത്സരങ്ങൾ ശ്രദ്ധേയമായി. പ്രത്യേകിച്ച് ബൈബിൾ സ്കിറ്റ് മത്സരം പ്രേക്ഷകശ്രദ്ധ നേടിയ പ്രധാന ഇനമായി മാറി. വിദ്യാർത്ഥികൾ അവതരിപ്പിച്ച നാടകാവതരണം പ്രേക്ഷകർക്ക് ഏറെ ആസ്വാദ്യമായി.
പരിപാടിയുടെ സുതാര്യമായ നടത്തിപ്പിനായി പ്രോഗ്രാം കോർഡിനേറ്റർമാരായ ശ്രീ. ബാബു ജോസഫും ശ്രീ. രാജു മേപ്പിള്ളിയും ദീർഘകാലമായി ഒരുക്കങ്ങൾ നടത്തി. ട്രഷറർ ഷാജി മൈലന്തറയും ബെൽഫാസ്റ്റ് കൈക്കാരൻ അനീഷ് അമ്പാട്ടും നൽകിയ നിർദ്ദേശങ്ങളും സഹകരണവും വിജയത്തിൽ നിർണായകമായി.
ബെൽഫാസ്റ്റ് മേഖലയിലെ കൈക്കാരന്മാരായ ഷീബ രാജു, ആനന്ദ് ജോസഫ്, പിതൃവേദി പ്രസിഡന്റ് ഡോ. സനൽ ജോർജ്, കമ്മിറ്റി അംഗങ്ങളായ ജ്യോതിസ് ചെറിയാൻ, ഡാൻറ്റിസ് സ്കറിയ, റോബിൻ (ട്രസ്റ്റി, ലിസ്ബേൺ), ജോസഫ് (എച്ച്.എം കോർഡിനേറ്റർ, ഡെറി) എന്നിവരും വിവിധ കുർബാന സെന്ററുകളിൽ നിന്നുള്ള ട്രസ്റ്റിമാർ, മതാധ്യാപകർ, സംഘടന ഭാരവാഹികൾ, യുവജനങ്ങൾ, വിശ്വാസികൾ, ജഡ്ജിമാർ, കോളേജ് അധികൃതർ എന്നിവരും ചേർന്നുള്ള ഏകോപിത പ്രവർത്തനം പരിപാടിയുടെ വിജയത്തിന് വഴിയൊരുക്കി.
മത്സര വിജയികൾക്ക് ഫാ. ജോസ് ഭരണികുളങ്ങര, ഫാ. അനീഷ്, ഫാ. നിധീഷ്, ഫാ. സജി, ഫാ. ജെയിൻ എന്നിവർ സമ്മാനങ്ങൾ വിതരണം ചെയ്തു. സമാപന ചടങ്ങിൽ ഫാ. ജെയിൻ മണ്ണത്തുകാരൻ നന്ദിപ്രസംഗം നടത്തി.
പരിപാടിയിൽ പങ്കെടുത്തവർക്ക് ജോവിനാസ് കാറ്റേഴ്സ്, ബെൽഫാസ്റ്റ് ഒരുക്കിയ സ്നേഹവിരുന്നും ടോമി പോളിന്റെ നേതൃത്വത്തിൽ ഒരുക്കിയ ചായയും ലഘുഭക്ഷണവും വിതരണം ചെയ്തു.
റീജിയൻ തലത്തിൽ വിജയികളായ മത്സരാർത്ഥികൾ താല സെൻ്റ് മാർക്ക് കമ്യൂണിറ്റി ഹാളിൽ ഏപ്രിൽ 25 നു നടക്കുന്ന അയർലണ്ട് നാഷണൽ തല ബൈബിൾ കലോത്സവത്തിൽ പങ്കെടുക്കും.
Anand Joseph
Belfast Region Council PRO
Rose Malayalam Updates
അയർലണ്ട് വാർത്തകൾ ഉടൻ ലഭിക്കുവാൻ ഞങ്ങളുടെ വാട്സാപ്പ് ഗ്രൂപ്പിൽ അംഗമാകൂ.
JOIN GROUP NOW