ശക്തമായ മഴ: കോർക്ക്, വാട്ടർഫോർഡ് കൗണ്ടികളിൽ ഇന്ന് യെല്ലോ വാണിങ്

കോര്‍ക്ക്, വാട്ടര്‍ഫോര്‍ഡ് കൗണ്ടികളില്‍ അതിശക്തമായ മഴ പെയ്യാനുള്ള സാധ്യത കണക്കിലെടുത്ത് കാലാവസ്ഥാ മുന്നറിയിപ്പ് നല്‍കി അധികൃതര്‍. ഇന്ന് (ഒക്ടോബര്‍ 13 ഞായര്‍) വൈകിട്ട് 5 മണി മുതല്‍ രാത്രി 11 മണി വരെയാണ് കോര്‍ക്കില്‍ യെല്ലോ റെയിന്‍ വാണിങ് നല്‍കിയിട്ടുള്ളത്. വാട്ടര്‍ഫോര്‍ഡില്‍ ഞായര്‍ വൈകിട്ട് 6 മുതല്‍ തിങ്കള്‍ പുലര്‍ച്ചെ 2 മണി വരെയും യെല്ലോ വാണിങ് നിലനില്‍ക്കും.

ഇന്ന് രാവിലെ പൊതുവെ വെയില്‍ ലഭിക്കുമെങ്കിലും പിന്നീട് മേഘം ഉരുണ്ടുകൂടി നല്ല മഴയ്ക്ക് കാരണമാകും. വൈകുന്നേരത്തോടെ തെക്കന്‍ കൗണ്ടികളില്‍ മഴ ശക്തമാകും. മിന്നല്‍പ്രളയത്തിനും സാധ്യതയുണ്ട്.

രാജ്യത്തിന്റെ വടക്കന്‍ പകുതിയില്‍ 7 മുതല്‍ 10 ഡിഗ്രി സെല്‍ഷ്യസ് വരെയാകും പരമാവധി താപനില. തെക്കന്‍ പകുതിയില്‍ 10 മുതല്‍ 14 ഡിഗ്രി വരെയും താപനില ഉയരും. തിങ്കളാഴ്ച രാവിലെയോടെ മഴ ഒഴിയും.