അയർലണ്ടിൽ വേനൽക്കാല സമയക്രമം ആരംഭിക്കുന്നു; നാളെ മുതൽ ക്ലോക്കുകൾ ഒരു മണിക്കൂർ മുൻപോട്ട്

ഡബ്ലിൻ: അയർലണ്ടിൽ ഈ വർഷത്തെ വേനൽക്കാല സമയക്രമം (Summer Time) നിലവിൽ വരുന്നു. മാർച്ച് 29 ഞായറാഴ്ച പുലർച്ചെ ഒരു മണിയോടെയാണ് സമയമാറ്റം സംഭവിക്കുന്നത്. പുലർച്ചെ ഒരു മണി എന്നത് രണ്ട് മണിയായി ക്ലോക്കുകളിൽ മാറ്റം വരുത്തണം. ഇതോടെ പകൽ വെളിച്ചം കൂടുതൽ സമയം ലഭിക്കുകയും വൈകുന്നേരങ്ങളിൽ കൂടുതൽ സമയം പുറത്തിറങ്ങാൻ സാധിക്കുകയും ചെയ്യും. സ്മാർട്ട്ഫോണുകളിലും കമ്പ്യൂട്ടറുകളിലും സമയം തനിയെ മാറുമെങ്കിലും, സാധാരണ ക്ലോക്കുകളിലും കാറുകളിലെയും മറ്റും സമയക്രമം നമ്മൾ നേരിട്ട് മാറ്റേണ്ടി വരും.

പകൽ വെളിച്ചം പരമാവധി പ്രയോജനപ്പെടുത്തുക എന്ന ലക്ഷ്യത്തോടെയാണ് ഈ സമയമാറ്റം നടപ്പിലാക്കുന്നത്. ഒന്നാം ലോകമഹായുദ്ധ കാലത്ത് ഇന്ധന ലാഭത്തിനായി ജർമ്മനിയാണ് ആദ്യമായി ഈ രീതി പരീക്ഷിച്ചത്. അയർലണ്ടിൽ 1916-ലാണ് ‘സമ്മർ ടൈം ആക്ട്’ പ്രകാരം ഇത് ഔദ്യോഗികമായി നടപ്പിലാക്കി തുടങ്ങിയത്. അക്കാലത്ത് ബ്രിട്ടീഷ് സമയവുമായി (GMT) ഐക്യരൂപം വരുത്തുന്നതിനും കാർഷിക ജോലികൾക്കും മറ്റും കൂടുതൽ വെളിച്ചം ലഭ്യമാക്കുന്നതിനും ഈ മാറ്റം സഹായകരമായി.

വർഷത്തിൽ രണ്ട് തവണ സമയം മാറ്റുന്ന രീതി നിർത്തലാക്കാൻ യൂറോപ്യൻ യൂണിയൻ മുൻപ് ആലോചിച്ചിരുന്നെങ്കിലും നിലവിൽ പഴയ രീതി തന്നെ തുടരാനാണ് തീരുമാനം.