‘കുട്ടികളും സമൂഹത്തിന്റെ ഭാഗമാണ്’: ബാലതാരങ്ങൾക്ക് അവാർഡ് നൽകാത്തതിൽ പ്രതികരണവുമായി ദേവനന്ദ

2024-ലെ സംസ്ഥാന ചലച്ചിത്ര പുരസ്‌കാരത്തില്‍, ബാലതാരങ്ങള്‍ക്കും, കുട്ടികളുടെ ചിത്രത്തിനും പുരസ്‌കാരം നല്‍കാത്തതില്‍ ജൂറിക്കെതിരെ ബാലതാരമായ ദേവനന്ദ. മികച്ച കുട്ടികളുടെ ചിത്രത്തിന് കഴിഞ്ഞ തവണയും അവാര്‍ഡ് ഉണ്ടായിരുന്നില്ല. അതേസമയം ‘സ്താനാര്‍ത്തി ശ്രീക്കുട്ടന്‍’ അടക്കമുള്ള ശ്രദ്ധിക്കപ്പെട്ട ചിത്രങ്ങള്‍ കഴിഞ്ഞ വര്‍ഷം പുറത്തിറങ്ങിയിട്ടും അവാര്‍ഡിന് പരിഗണിക്കപ്പെട്ടാതെ പോയത് പ്രതിഷേധത്തിന് ഇടയാക്കിയിട്ടുണ്ട്.

ഈ സാഹചര്യത്തില്‍ ജൂറിയുടെ തീരുമാനത്തിനെതിരെ ഇന്‍സ്റ്റാഗ്രാം വഴിയാണ് ദേവനന്ദ പ്രതികരണം രേഖപ്പെടുത്തിയത്.

ദേവനന്ദയുടെ പോസ്റ്റ്:

നിങ്ങൾ കുട്ടികൾക്ക് നേരെ കണ്ണടച്ചോളൂ
പക്ഷെ ഇവിടെ മുഴുവൻ ഇരുട്ട് ആണെന്ന് പറയരുത്

കുട്ടികളും ഈ സമൂഹത്തിന്റെ ഭാഗം ആണ്, ഇനി വരുന്ന ഒരു തലമുറക്ക് നേരെ ആണ് 2024 മലയാള സിനിമ അവാർഡ് പ്രഖ്യാപനത്തോടെ ജൂറി കണ്ണടച്ചത്

സ്താനാർത്തി ശ്രീക്കുട്ടനും,ഗു,ഫീനിക്സും, ARM അടക്കമുള്ള ഒരുപാട് സിനിമകളിൽ കുട്ടികൾ അഭിനയിച്ചിട്ടുണ്ട്, രണ്ടു കുട്ടികൾക്ക് അവാർഡ് കൊടുക്കാതെ ഇരുന്ന് കൊണ്ടല്ല, കൂടുതൽ കുട്ടികളുടെ സിനിമ ചെയ്യണം എന്ന് പറയാൻ ശ്രമിക്കേണ്ടത്, രണ്ടു കുട്ടികൾക്ക് അത് നൽകിയിരുന്നു എങ്കിൽ ഒരുപാട് കുട്ടികൾക്ക് അത് ഊർജം ആയി മാറിയേനെ.

കുട്ടികൾക്ക് കൂടുതൽ അവസരം കിട്ടണം എന്നും, അവരും സമൂഹത്തിന്റെ ഭാഗം ആണെന്ന് പറഞ്ഞ ജൂറി ചെയർമാൻ കുട്ടികളുടെ അവകാശങ്ങളെ കാണാതെ പോയതിൽ കടുത്ത അമർഷം ഉണ്ട്.

എല്ലാ മാധ്യമങ്ങളും, സിനിമ പ്രവർത്തകരും, പൊതു ജനങ്ങളും ഇതും ചർച്ച ചെയ്യണം, അവകാശങ്ങൾ നിക്ഷേധിച്ചു കൊണ്ടല്ല, മാറ്റങ്ങൾ ഉണ്ടാകേണ്ടത്, മാറ്റങ്ങൾക്ക് ഒപ്പം അവകാശങ്ങളും സംരക്ഷിക്കാൻ കഴിയണം.