അയർലണ്ടിൽ ഭവനവില വർദ്ധനയിൽ നേരിയ കുറവ്; ഏറ്റവും കുറഞ്ഞ വിലയ്ക്ക് വീട് വാങ്ങാവുന്നത് എവിടെ?

അയര്‍ലണ്ടിലെ ഭവനവില വര്‍ദ്ധന നിരക്കില്‍ നേരിയ കുറവ്. Central Statistics Office (CSO)-ന്റെ റിപ്പോര്‍ട്ട് പ്രകാരം 2025 ഏപ്രില്‍ വരെയുള്ള ഒരു വര്‍ഷത്തിനിടെ ഭവനവില 7.5% ആണ് വര്‍ദ്ധിച്ചത്. മാര്‍ച്ച് വരെയുള്ള ഒരു വര്‍ഷത്തിനിടെ ഇത് 7.6 ശതമാനവും, ഫെബ്രുവരി വരെയുള്ള ഒരു വര്‍ഷത്തിനിടെ 8 ശതമാനവും ആയിരുന്നു.

ഡബ്ലിനിലെ ഭവനവില ഏപ്രില്‍ വരെയുള്ള ഒരു വര്‍ഷത്തിനിടെ 6.2% ആണ് വര്‍ദ്ധിച്ചത്. മാര്‍ച്ച് വരെയുള്ള ഒരു വര്‍ഷത്തിനിടെ ഇത് 6% ആയിരുന്നു.

2025 ഏപ്രില്‍ വരെയുള്ള ഒരു വര്‍ഷത്തിനിടെ രാജ്യത്ത് വല്‍പ്പന നടന്ന വീടുകളുടെ ശരാശരി വില 365,000 യൂറോ ആണ്. ഏറ്റവും ഉയര്‍ന്ന വിലയ്ക്ക് വീടുകള്‍ വിറ്റുപോകുന്ന പ്രദേശം Dún Laoghaire-Rathdown ആണ്. 670,000 യൂറോ ആണ് ഇവിടുത്തെ ശരാശരി വില. മറുവശത്ത് ഏറ്റവും കുറഞ്ഞ വിലയ്ക്ക് വീട് വില്‍പ്പന നടക്കുന്നത് Leitrim-ലാണ്. ശരാശരി 185,000 യൂറോ ആണ് വില.

2025 ഏപ്രിലില്‍ 3,748 വീടുകളുടെ വില്‍പ്പനയാണ് റവന്യൂവില്‍ രജിസ്റ്റര്‍ ചെയ്തിട്ടുള്ളത്. ഇതില്‍ 840 എണ്ണം പുതിയവയാണ്. 1,458 ഫസ്റ്റ് ടൈം ബസേഴ്‌സാണ് ഏപ്രിലില്‍ ഉണ്ടായിരുന്നതെന്നും കണക്കുകള്‍ വ്യക്തമാക്കുന്നു.