അയർലണ്ടുകാർ വാർത്തകളറിയാൻ ടിവിയെക്കാൾ ആശ്രയിക്കുന്നത് ഓൺലൈൻ മാധ്യമങ്ങളെ എന്ന് റിപ്പോർട്ട്

അയര്‍ലണ്ടിലാദ്യമായി വാര്‍ത്തകളറിയാന്‍ ആളുകള്‍ ടിവിയെക്കാള്‍ ഓണ്‍ലൈന്‍ മാധ്യമങ്ങളെ ആശ്രയിക്കുന്നതായി റിപ്പോര്‍ട്ട്. Digital News Report Ireland-ന്റെ വാര്‍ഷിക റിപ്പോര്‍ട്ടിലാണ് വാര്‍ത്തകളറിയാനായി രാജ്യത്തെ ജനങ്ങള്‍ കൂടുതലായും ഓണ്‍ലൈന്‍ മാധ്യമങ്ങളിലേയ്ക്ക് തിരിഞ്ഞതായി വ്യക്തമാക്കുന്നത്. അതോടൊപ്പം വാര്‍ത്ത വായിക്കാനായി അയര്‍ലണ്ടുകാര്‍ പണം നല്‍കുന്നത് ഈ വര്‍ഷം വര്‍ദ്ധിച്ചതായും റിപ്പോര്‍ട്ട് പറയുന്നു.

രാജ്യത്തെ 33% പേരാണ് തങ്ങള്‍ വാര്‍ത്തകളറിയാന്‍ ഓണ്‍ലൈന്‍ മാധ്യമങ്ങളിലാണ് തിരയാറ് എന്ന് സര്‍വേയില്‍ പ്രതികരിച്ചത്. സോഷ്യല്‍ മീഡിയ കൂടാതെയുള്ള കണക്കാണിത്. 31% പേര്‍ ടിവി ചാനലുകളെ ആശ്രയിക്കുമ്പോള്‍ സോഷ്യല്‍ മീഡിയ വഴി വാര്‍ത്തകളറിയുന്നത് 21% പേരാണ്. 12% പേര്‍ റേഡിയോയെ ആശ്രയിക്കുമ്പോള്‍ വാര്‍ത്തയറിയാനുള്ള പ്രധാന മാര്‍ഗ്ഗമായി പത്രത്തെ കാണുന്നവര്‍ 3% മാത്രമാണ്.

അതേസമയം ഓണ്‍ലൈനില്‍ വരുന്ന വാര്‍ത്തകളില്‍ ഏതെല്ലാമാണ് ശരി എന്നും, ഏതെല്ലാമാണ് വ്യാജം എന്നും മനസിലാക്കാന്‍ കഴിയാത്തത് ആശങ്കപ്പെടുത്തുന്നതാണെന്ന് പ്രതികരിച്ചവരുടെ എണ്ണത്തില്‍ ഒരു വര്‍ഷത്തിനിടെ 7% വര്‍ദ്ധനയുണ്ടായിട്ടുണ്ട്. അയര്‍ലണ്ടിലെ 71% ജനങ്ങളാണ് ഈ ആശങ്ക പങ്കുവച്ചത്.

രാജ്യത്ത് ഏറ്റവുമധികം പേര്‍ വായിക്കുന്ന ഓണ്‍ലൈന്‍ മാധ്യമങ്ങളില്‍ RTE News Online, The Journal.ie, Irish Independent online, Breaking News.ie, The Irish Times online എന്നിവയാണ് മുന്നില്‍.