ഇന്ധനവില വർധന: പ്രതിഷേധം ശക്തമാകുന്നു; ഡബ്ലിൻ സിറ്റി ഉപരോധത്തിൽ

അനിയന്ത്രിതമായ ഇന്ധനവില വർധനവിനെതിരെ അയർലൻഡിൽ ലോറി ഉടമകളുടെയും കർഷകരുടെയും നേതൃത്വത്തിൽ വൻ പ്രതിഷേധം തുടരുന്നു. ഇന്ന് (ബുധനാഴ്ച) രാവിലെ മുതൽ രാജ്യത്തെ പ്രധാന പാതകളിൽ നൂറുകണക്കിന് ട്രക്കുകളും ട്രാക്ടറുകളും അണിനിരന്നതോടെ ഗതാഗതം പൂർണ്ണമായും സ്തംഭിച്ച നിലയിലാണ്. ‘പീപ്പിൾ ഓഫ് അയർലൻഡ് എഗെയ്ൻസ്റ്റ് ഫ്യൂവൽ പ്രൈസസ്’ എന്ന സംഘടനയുടെ ആഹ്വാനപ്രകാരമാണ് ഈ ഉപരോധം നടക്കുന്നത്.

തലസ്ഥാന നഗരമായ ഡബ്ലിനിലെ പ്രധാന പാതകളെല്ലാം പ്രതിഷേധക്കാർ കൈയടക്കിയിരിക്കുകയാണ്. ഒക്കോണൽ സ്ട്രീറ്റിൽ (O’Connell Street) വാഹനങ്ങൾ നിരത്തിയിട്ടിരിക്കുന്നതിനാൽ ബസ്, ലുവാസ് സർവീസുകൾ തടസ്സപ്പെട്ടു. ഇറാനിലെ യുദ്ധസാഹചര്യം കാരണം വരും ദിവസങ്ങളിൽ ഇന്ധനവില ലിറ്ററിന് 2.30 യൂറോ വരെ ഉയർന്നേക്കുമെന്ന റിപ്പോർട്ടുകൾ പുറത്തുവന്നതിന് പിന്നാലെയാണ് പ്രതിഷേധം ശക്തമായത്. വരും മണിക്കൂറുകളിലും സമരം തുടരാനാണ് സാധ്യത.

ഡബ്ലിന് പുറമെ കോർക്ക്, ഗാൽവേ, ലിമെറിക് തുടങ്ങിയ നഗരങ്ങളിലും പ്രതിഷേധം ആളിപ്പടരുകയാണ്. പ്രധാന ഹൈവേകളിൽ കിലോമീറ്ററുകളോളം നീളുന്ന വാഹനവ്യൂഹങ്ങൾ രൂപപ്പെട്ടത് ഓഫീസുകളിലേക്കും മറ്റും പോകുന്നവരെ വലിയ രീതിയിൽ ബാധിച്ചിട്ടുണ്ട്. ഇന്ധനവിലയിലെ വർധനവ് തങ്ങളുടെ ഉപജീവനത്തെ തകർക്കുകയാണെന്നും സർക്കാർ ഉടൻ ഇടപെടണമെന്നുമാണ് പ്രതിഷേധക്കാരുടെ ആവശ്യം.

പ്രതിഷേധം ശക്തമായതോടെ പലയിടങ്ങളിലും പോലീസ് (ഗാർഡ) സുരക്ഷ കർശനമാക്കിയിട്ടുണ്ട്. യാത്രക്കാർ അത്യാവശ്യമില്ലാത്ത യാത്രകൾ ഒഴിവാക്കണമെന്നും പകരം റൂട്ടുകൾ ഉപയോഗിക്കണമെന്നും അധികൃതർ നിർദ്ദേശം നൽകി. ഇന്ധന നികുതി കുറയ്ക്കാതെ പിന്നോട്ടില്ലെന്ന ഉറച്ച നിലപാടിലാണ് സമരക്കാർ. പ്രശ്നത്തിൽ സർക്കാർ ഇതുവരെ അന്തിമ തീരുമാനം വ്യക്തമാക്കിയിട്ടില്ല.

വരും ദിവസങ്ങളിൽ രാജ്യം വലിയ സാമ്പത്തിക പ്രതിസന്ധിയിലേക്ക് നീങ്ങുമെന്ന ആശങ്കയിലാണ് ജനങ്ങൾ. ട്രക്കുകൾ റോഡിലിറങ്ങാത്തത് ചരക്ക് നീക്കത്തെയും ബാധിച്ചേക്കാം. നിലവിലെ സാഹചര്യത്തിൽ വൈകുന്നേരത്തോടെ കൂടുതൽ പ്രതിഷേധക്കാർ തെരുവിലിറങ്ങുമെന്നാണ് സൂചന. ഇന്ധനവില കുറയ്ക്കാൻ സർക്കാർ തയ്യാറാകുമോ അതോ സമരം കൂടുതൽ ശക്തമാകുമോ എന്നാണ് രാജ്യം ഇപ്പോൾ ഉറ്റുനോക്കുന്നത്.