മോട്ടോർവേ ആക്സിഡന്റ്; അഞ്ചു പേർ മരിച്ചു; അഞ്ചുപേരും റോങ്ങ് സൈഡിൽ സഞ്ചരിച്ച കാറിൽ ഉണ്ടായിരുന്നവർ

M9 മോട്ടോർവേയിൽ റോങ്ങ്‌ സൈഡിൽ സഞ്ചരിച്ച കാർ മറ്റൊരു വാഹനവുമായി കൂട്ടിയിടിച്ചുണ്ടായ അതിദാരുണ അപകടത്തിൽ മരിച്ചവരുടെ എണ്ണം അഞ്ചായി. കിൽഡെയറിലെ മൂൺ മേഖലയ്ക്ക് സമീപം ഞായറാഴ്ച പുലർച്ചെ മൂന്ന് മണിയോടെയാണ് അപകടമുണ്ടായത്.M9-ന്റെ നോർത്ത്‌ബൗണ്ട് പാതയിൽ സൗത്ത് ദിശയിൽ സഞ്ചരിച്ച വാഹനമാണ് എതിർദിശയിൽ എത്തിയ മറ്റൊരു കാറുമായി കൂട്ടിയിടിച്ചത്. അപകടത്തിൽ തെറ്റായ ദിശയിൽ സഞ്ചരിച്ച വാഹനത്തിലുണ്ടായിരുന്ന അഞ്ച് പേരും മരിച്ചതായാണ് ഗാർഡ സ്ഥിരീകരിച്ചത്. മരിച്ചവരുടെ ഔദ്യോഗിക തിരിച്ചറിയൽ നടപടികൾ പുരോഗമിക്കുകയാണ്. അഞ്ചുപേരും ടീനേജുകാരായ ആൺകുട്ടികളാണ് എന്നാണ് സൂചന.

അപകടത്തിൽപ്പെട്ട രണ്ടാമത്തെ കാറിലുണ്ടായിരുന്നത് ഒരു കുടുംബത്തിലെ നാല് പേരാണ്. ഡബ്ലിൻ എയർപോർട്ടിലേക്ക് യാത്ര ചെയ്യുകയായിരുന്ന ഇവർ കിൽഡെയറിൽ നിന്നുള്ളവരാണെന്നാണ് വിവരം. കാറിന്റെ ഡ്രൈവറായ 40 വയസ്സുകാരിയും മുൻസീറ്റിലുണ്ടായിരുന്ന 34 വയസ്സുകാരനും ഗുരുതരമായി പരിക്കേറ്റ് ടാല യൂണിവേഴ്സിറ്റി ആശുപത്രിയിൽ ചികിത്സയിലാണ്. ഇരുവരുടെയും നില ഗുരുതരമാണെന്ന് ഗാർഡ അറിയിച്ചു.പിന്നിലെ സീറ്റിലുണ്ടായിരുന്ന 24 വയസ്സുകാരിയെയും ഒരു കുട്ടിയെയും ആശുപത്രിയിൽ പ്രവേശിപ്പിച്ചു. യുവതിയുടെ നില ഗുരുതരമാണ്. കുട്ടിയെ ക്രംലിനിലെ Children’s Health Ireland-ലാണ് ചികിത്സിക്കുന്നത്.അപകടത്തിന് പിന്നാലെ M9-ലെ ജങ്ഷൻ 3നും 4നും ഇടയിലുള്ള ഭാഗം ഇരുദിശകളിലും അടച്ചിട്ടിരിക്കുകയാണ്.

ഗാർഡ ഫോറൻസിക് കൊളിഷൻ ഇൻവെസ്റ്റിഗേഷൻ സംഘം സ്ഥലത്ത് പരിശോധന നടത്തി വരികയാണ്. ഗാർഡ കമ്മീഷണർസംഭവത്തിൽ ഗാർഡ കമ്മീഷണർ ജസ്റ്റിൻ കെല്ലി കടുത്ത ആശങ്ക രേഖപ്പെടുത്തി. മോട്ടോർവേയിൽ തെറ്റായ ദിശയിൽ വാഹനമോടിക്കുന്നത് അത്യന്തം അപകടകരമാണെന്നും ഇത്തരം പ്രവൃത്തികൾ ചിലപ്പോൾ സോഷ്യൽ മീഡിയയിലെ ‘ലൈക്കുകൾ’ നേടുന്നതിനുവേണ്ടി പോലും നടക്കുന്നതായും അദ്ദേഹം വിമർശിച്ചു.അപകടത്തിൽപ്പെട്ട കുടുംബം നിരപരാധികളായി യാത്ര ചെയ്യുന്നതിനിടെയാണ് തെറ്റായ ദിശയിൽ വന്ന വാഹനം ഇടിച്ചതെന്ന് കമ്മീഷണർ പറഞ്ഞു. ഇത്തരം അശ്രദ്ധമായ ഡ്രൈവിങ് നിരപരാധികളായ ആളുകളുടെ ജീവൻ അപകടത്തിലാക്കുന്നതാണെന്നും അദ്ദേഹം വ്യക്തമാക്കി.

അപകടവുമായി ബന്ധപ്പെട്ട് ഗാർഡ ഓംബുഡ്സ്മാൻ സ്ഥാപനമായ Fiosrú അന്വേഷണം ആരംഭിച്ചിട്ടുണ്ട്. ഗാർഡയുമായി ബന്ധപ്പെട്ട സംഭവത്തിൽ ഒരാൾ മരിക്കുകയോ ഗുരുതരമായി പരിക്കേൽക്കുകയോ ചെയ്ത സാഹചര്യത്തിൽ സ്വതന്ത്ര അന്വേഷണം നടത്തുന്നതിന്റെ ഭാഗമായാണ് നടപടി. മുമ്പ് തെറ്റായ ദിശയിൽ സഞ്ചരിച്ച വാഹനം ഗാർഡയുടെ ശ്രദ്ധയിൽപ്പെട്ടിരുന്നുവെന്നാണ് പ്രാഥമിക വിവരം. എന്നാൽ സംഭവത്തിന്റെ വിശദാംശങ്ങൾ Fiosrú അന്വേഷണത്തിന്റെ പരിധിയിലായതിനാൽ ഇക്കാര്യത്തിൽ കൂടുതൽ പ്രതികരിക്കാനാകില്ലെന്ന് ഗാർഡ കമ്മീഷണർ വ്യക്തമാക്കി.

ദൃക്‌സാക്ഷികളോട് വിവരങ്ങൾ നൽകാൻ അഭ്യർഥന

അപകടസമയത്ത് M9-ൽ യാത്ര ചെയ്തിരുന്നവരോടും ഡാഷ്‌കാം ദൃശ്യങ്ങൾ കൈവശമുള്ളവരോടും ഗാർഡ വിവരങ്ങൾ കൈമാറാൻ അഭ്യർഥിച്ചു.ഓഗസ്റ്റ് 16ന് പുലർച്ചെ 2 മണിക്കും 3 മണിക്കും ഇടയിൽ M9-ന്റെ നോർത്ത്‌ബൗണ്ട് അല്ലെങ്കിൽ സൗത്ത്‌ബൗണ്ട് ഭാഗത്ത് യാത്ര ചെയ്തവർ അപകടവുമായി ബന്ധപ്പെട്ട ദൃശ്യങ്ങളോ വിവരങ്ങളോ ഉണ്ടെങ്കിൽ അന്വേഷണ ഉദ്യോഗസ്ഥരെ ബന്ധപ്പെടണമെന്ന് ഗാർഡ അറിയിച്ചു.അപകടത്തിന്റെ പശ്ചാത്തലത്തിൽ റോഡ് സുരക്ഷയെക്കുറിച്ച് വീണ്ടും ശക്തമായ ആശങ്ക ഉയർന്നിരിക്കുകയാണ്. കഴിഞ്ഞ ദിവസങ്ങളിൽ M50-ലും തെറ്റായ ദിശയിൽ സഞ്ചരിച്ച വാഹനങ്ങൾ ഉൾപ്പെട്ട ഗുരുതര അപകടങ്ങൾ റിപ്പോർട്ട് ചെയ്തിരുന്നു.