അയർലൻഡിൽ ഇന്ന് രാത്രി സമയം ഒരു മണിക്കൂർ പിന്നോട്ട് മാറും; എപ്പോൾമാറുമെന്നും സ്വയം മാറുന്നതും കൈകൊണ്ട് മാറ്റേണ്ടതും ഏതെല്ലാമെന്നും അറിയാം

അയർലൻഡിൽ വേനൽക്കാല സമയക്രമം അവസാനിക്കുന്നതോടെ ഇന്ന് രാത്രി ക്ലോക്കുകൾ ഒരു മണിക്കൂർ പിന്നോട്ട് മാറ്റും. ഒക്ടോബർ 24 ശനിയാഴ്ച രാത്രി കഴിഞ്ഞ് ഒക്ടോബർ 25 ഞായറാഴ്ച പുലർച്ചെ 2 മണിയാകുമ്പോൾ സമയം വീണ്ടും പുലർച്ചെ 1 മണിയാകും. ഇതോടെ ഇന്നത്തെ രാത്രിക്ക് ഒരു മണിക്കൂർ ദൈർഘ്യമേറും.

ഭൂരിപക്ഷം ഫോണുകളിലും ഡിജിറ്റൽ ഉപകരണങ്ങളിലും സമയം സ്വയം മാറുമെങ്കിലും എല്ലാ ഉപകരണങ്ങളിലും ഇത് ഒരുപോലെയല്ല. അതിനാൽ സമയമാറ്റം സംബന്ധിച്ച് ചില കാര്യങ്ങൾ പ്രത്യേകം ശ്രദ്ധിച്ചില്ലെങ്കിൽ രാവിലെ സമയം തെറ്റി പോകാൻ സാധ്യതയുണ്ട്. ആധുനിക സ്മാർട്ട്ഫോണുകളിൽ ഓട്ടോമാറ്റിക് തീയതിയും സമയവും പ്രവർത്തനക്ഷമമാണെങ്കിൽ സമയം സ്വയം മാറും. സാധാരണയായി ഫോണിലെ സമയക്രമീകരണങ്ങൾ പരിശോധിച്ചാൽ ഇത് മനസ്സിലാക്കാൻ സാധിക്കും. ഓട്ടോമാറ്റിക്കായി മാറുന്ന രീതിയിൽ ഫോണുകൾ ക്രമീകരിച്ചാൽ കൃത്യമായ സമയത്ത് ഫോൺ തനിയെ സമയം പുതുതായി ക്രമീകരിക്കും.ഫോണുമായി ബന്ധിപ്പിച്ചിട്ടുള്ള സ്മാർട്ട് വാച്ചുകൾ, ഇന്റർനെറ്റ് വഴി സമയം ക്രമീകരിക്കുന്ന കമ്പ്യൂട്ടറുകൾ, ടാബ്‌ലെറ്റുകൾ എന്നിവയിൽ സാധാരണയായി സമയം സ്വയം മാറും.

ചില ആധുനിക കാറുകളിൽ സമയം സ്വയം ക്രമീകരിക്കപ്പെടും. എന്നാൽ എല്ലാ കാറുകളിലും ഈ സൗകര്യമില്ല. അതിനാൽ ഞായറാഴ്ച യാത്രയ്ക്ക് മുമ്പ് ഡാഷ്‌ബോർഡിലെയും ഇൻഫോടെയ്ൻമെന്റ് സിസ്റ്റത്തിലെയും സമയം പരിശോധിക്കുന്നത് നന്നായിരിരിക്കും.വീടുകളിലെ ചുമർ ക്ലോക്കുകൾ, സാധാരണ അലാറം ക്ലോക്കുകൾ, കൈത്തണ്ടയിലെ സാധാരണ വാച്ചുകൾ, ഓട്ടോമാറ്റിക് സമയക്രമീകരണമില്ലാത്ത കാറുകളിലെ ക്ലോക്കുകൾ എന്നിവ ഒരു മണിക്കൂർ പിന്നോട്ട് മാറ്റേണ്ടിവരും.

വേനൽക്കാലത്ത് പകൽവെളിച്ചം കൂടുതൽ പ്രയോജനപ്പെടുത്തുന്നതിനായി നടപ്പാക്കുന്ന ഡേലൈറ്റ് സേവിങ് ടൈം ക്രമീകരണത്തിന്റെ ഭാഗമായാണ് അയർലൻഡിൽ ഒക്ടോബർ അവസാന ഞായറാഴ്ച സമയം പിന്നോട്ടാക്കുന്നത്. ഇതോടെ അയർലൻഡ് വീണ്ടും ഗ്രീൻവിച്ച് മീൻ ടൈമിലേക്ക് (GMT) മടങ്ങും.സമയമാറ്റം പ്രാബല്യത്തിൽ വരുന്നത് ഞായറാഴ്ച പുലർച്ചെയായതിനാൽ, ഞായറാഴ്ച രാവിലെ ജോലിക്കും യാത്രയ്ക്കും ഇറങ്ങുന്നവർ ഉപകരണങ്ങളിലെ സമയം ശരിയാണെന്ന് ഉറപ്പാക്കുന്നത് ഉചിതമാണ്.

For more news please join our whatsapp group

https://chat.whatsapp.com/EYff5ESLNtXIDOjtNZ27LS?s=cl&p=a&mlu=4&ilr=4