അയർലൻഡിലെ ഡ്രൈവർമാരുടെ സ്ഥിരം ശീലം; നിയമം മാറിയത് അറിഞ്ഞില്ലെങ്കിൽ പണിയാകും

അയർലൻഡിൽ വാഹനമോടിക്കുന്നവർക്ക് മുന്നറിയിപ്പുമായി അധികൃതർ.സിഗരറ്റ് കുറ്റി വാഹനത്തിന് പുറത്തേക്ക് വലിച്ചെറിഞ്ഞാൽ പോലും ഇനിമുതൽ 250 യൂറോ പിഴ കൊടുക്കണം. പല ഡ്രൈവർമാരുടെയും ശീലമാണ് സിഗരറ്റ് കുറ്റി പുറത്തേക്ക് എറിയുക എന്നുള്ളത്. വാഹനത്തിൽ നിന്ന് റോഡിലേക്കോ പൊതുസ്ഥലങ്ങളിലേക്കോ മാലിന്യം വലിച്ചെറിയുന്നവർക്ക് ഇനി €250 പിഴ നേരിടേണ്ടിവരും.

സെപ്റ്റംബർ 1 മുതലാണ് മാലിന്യം വലിച്ചെറിയുന്നതിനുള്ള പിഴ €150ൽ നിന്ന് €250 ആയി ഉയർത്തിയത്.രാജ്യത്തെ റോഡുകളിലും പൊതുസ്ഥലങ്ങളിലും വർധിച്ചുവരുന്ന മാലിന്യപ്രശ്നം നിയന്ത്രിക്കുന്നതിന്റെ ഭാഗമായി നടപ്പാക്കുന്ന നടപടികളുടെ ഭാഗമായാണ് പിഴ വർധിപ്പിച്ചത്. കാറിൽ നിന്ന് സിഗരറ്റ് കുറ്റി ഉൾപ്പെടെയുള്ള ചെറിയ മാലിന്യങ്ങൾ പുറത്തേക്ക് എറിയുന്നതും നിയമലംഘനമായി കണക്കാക്കും. ഇത്തരം കേസുകളിൽ ചിലർക്ക് ആയിരം യൂറോയിൽ കൂടുതൽ പിഴ ചുമത്തപ്പെട്ടിട്ടുണ്ടെന്ന് റിപ്പോർട്ടുകൾ വ്യക്തമാക്കുന്നു.

വാഹനത്തിൽ നിന്ന് മാലിന്യം വലിച്ചെറിയുന്നത് പരിസ്ഥിതിക്ക് മാത്രമല്ല, റോഡ് സുരക്ഷയ്ക്കും ഭീഷണിയാകാമെന്ന് വിദഗ്ധർ മുന്നറിയിപ്പ് നൽകി. റോഡിൽ വീഴുന്ന മാലിന്യങ്ങൾ മറ്റ് വാഹനങ്ങൾക്ക് തടസ്സമാകാനും ഡ്രൈവർമാരുടെ ശ്രദ്ധ തിരിക്കാനും, ചില സാഹചര്യങ്ങളിൽ ഡ്രെയിനേജ് സംവിധാനങ്ങൾ തടസ്സപ്പെട്ട് വെള്ളക്കെട്ടിനും റോഡ് അടയ്ക്കേണ്ട സാഹചര്യങ്ങൾക്കും കാരണമാകാനും സാധ്യതയുണ്ട്. അതുകൊണ്ട് വാഹനമോടിക്കുന്നവർ മാലിന്യം റോഡിലേക്ക് വലിച്ചെറിയാതെ വാഹനത്തിൽ തന്നെ സൂക്ഷിച്ച് പിന്നീട് ശരിയായ രീതിയിൽ നിക്ഷേപിക്കണമെന്ന് അധികൃതർ ആവശ്യപ്പെടുന്നു.പിഴ വർധന സെപ്റ്റംബർ 1, 2026 മുതൽ പ്രാബല്യത്തിൽ വന്നു.