പുതിയ സ്റ്റാറ്റിക് ക്യാമറകൾ പ്രവർത്തനം തുടങ്ങി; കുടുങ്ങുന്നവരെ കാത്തിരിക്കുന്നത് കനത്ത ഫൈനും പെനാൽറ്റി പോയിന്റും

അയർലണ്ടിൽ റോഡ് സുരക്ഷ ശക്തമാക്കുന്നതിന്റെയും ഗതാഗത നിയമലംഘനങ്ങൾ തടയുന്നതിന്റെയും ഭാഗമായി പുതിയ ഓട്ടോമാറ്റിക് സുരക്ഷാ ക്യാമറകൾ പ്രവർത്തനം ആരംഭിച്ചു. അമിതവേഗതയിൽ വാഹനമോടിക്കുന്നവർക്കും റെയിൽവേ ലെവൽ ക്രോസിങ്ങുകളിലെ റെഡ് സിഗ്നൽ ലംഘിക്കുന്നവർക്കുമെതിരെ കർശന നടപടികളാണ് അധികൃതർ സ്വീകരിക്കുന്നത്. അമിതവേഗതയ്ക്ക് 160 യൂറോ പിഴയും മൂന്ന് പെനാൽറ്റി പോയിന്റുകളും ലഭിക്കും.

കെറി കൗണ്ടിയിലെ ഫാരൻഫോർ (Farranfore) റെയിൽവേ ലെവൽ ക്രോസിങ്ങിലാണ് ഏറ്റവും പുതിയ സുരക്ഷാ ക്യാമറ ഒക്ടോബർ ആറിന് ഉച്ചയ്ക്ക് 12 മണി മുതൽ പ്രവർത്തനം ആരംഭിച്ചത്. ഗാർഡയും ഐറിഷ് റെയിലും (Iarnród Éireann), ട്രാൻസ്പോർട്ട് ഇൻഫ്രാസ്ട്രക്ചർ അയർലണ്ടും പ്രാദേശിക ഭരണകൂടങ്ങളും സംയുക്തമായാണ് പദ്ധതി നടപ്പാക്കുന്നത്.

റെയിൽവേ ക്രോസിങ്ങുകളിലെ അപകടസാധ്യത കുറയ്ക്കുന്നതിനൊപ്പം ഗതാഗത നിയമങ്ങൾ പാലിക്കുന്നുണ്ടെന്ന് ഉറപ്പാക്കുകയുമാണ് പുതിയ സംവിധാനത്തിന്റെ ലക്ഷ്യംപുതിയ ക്യാമറകൾ വാഹനങ്ങളുടെ വേഗത നിരീക്ഷിക്കുന്നതിനൊപ്പം റെയിൽവേ ക്രോസിങ്ങുകളിലെ സിഗ്നൽ ലംഘനങ്ങളും സ്വയമേവ കണ്ടെത്തും.അമിതവേഗതയിൽ വാഹനമോടിക്കുന്നവർക്ക് €160 പിഴയും മൂന്ന് പെനാൽറ്റി പോയിന്റുകളും ലഭിക്കും.

റെയിൽവേ ക്രോസിങ്ങിൽ റെഡ് മുന്നറിയിപ്പ് ലൈറ്റുകൾ തെളിയുമ്പോൾ സ്റ്റോപ്പ് ലൈൻ മറികടക്കുന്നവർക്ക് €80 പിഴയും രണ്ട് പെനാൽറ്റി പോയിന്റുകളും ചുമത്തും.ക്യാമറകളിൽ രേഖപ്പെടുത്തുന്ന നിയമലംഘനങ്ങൾ ഗാർഡയും റോഡ് സുരക്ഷാ പങ്കാളിയായ GoSafe-ഉം പരിശോധിച്ച് നിയമനടപടികൾ സ്വീകരിക്കും

രാജ്യത്തെ റെയിൽവേ ലെവൽ ക്രോസിങ്ങുകളിൽ സ്ഥാപിക്കാൻ പദ്ധതിയിട്ടിട്ടുള്ള ആറ് ക്യാമറകളിൽ രണ്ടാമത്തേതാണ് ഫാരൻഫോറിൽ പ്രവർത്തനം ആരംഭിച്ചത്.ഡബ്ലിനിലെ മെറിയൻ ഗേറ്റ്സിലാണ് (Merrion Gates) ആദ്യ ക്യാമറ സ്ഥാപിച്ചത്. കെറിയിലെ മിനിഷ് (Minish), റോസ്‌കോമണിലെ നോക്ക്ക്രോഗറി (Knockcroghery) എന്നിവിടങ്ങളിലേക്കും പദ്ധതി വ്യാപിപ്പിക്കാനാണ് തീരുമാനം.ഡബ്ലിനിലെ സെർപന്റൈൻ അവന്യൂ, സാൻഡിമൗണ്ട്, സട്ടൺ, കൂൾമൈൻ തുടങ്ങിയ റെയിൽവേ ക്രോസിങ്ങുകളിലും ക്യാമറകൾ വിന്യസിക്കാൻ പദ്ധതിയുണ്ട്.

അപകടസാധ്യതയും വാഹനമോടിക്കുന്നവരുടെ നിയമലംഘനങ്ങളും വിലയിരുത്തിയായിരിക്കും ക്യാമറകളുടെ വിന്യാസംറെയിൽവേ ക്രോസിങ്ങുകളിൽ റെഡ് സിഗ്നൽ അവഗണിച്ച് വാഹനങ്ങൾ കടന്നുപോകുന്നത് ട്രെയിൻ യാത്രക്കാർക്കും റോഡ് ഉപയോഗിക്കുന്നവർക്കും ഗുരുതരമായ അപകടസാധ്യത സൃഷ്ടിക്കുന്നതായി അധികൃതർ ചൂണ്ടിക്കാട്ടുന്നു.ഇത്തരം നിയമലംഘനങ്ങൾ കണ്ടെത്തുന്നതിനും അപകടങ്ങൾ ഒഴിവാക്കുന്നതിനും ഓട്ടോമാറ്റിക് ക്യാമറകൾ സഹായിക്കുമെന്നാണ് ഗാർഡയുടെ വിലയിരുത്തൽ.റോഡ് സുരക്ഷ ഉറപ്പാക്കാൻ സാങ്കേതികവിദ്യയുടെ സഹായത്തോടെയുള്ള പരിശോധനകൾ കൂടുതൽ ശക്തമാക്കുമെന്ന് ഗാർഡ അധികൃതർ വ്യക്തമാക്കി.