ഐറിഷ് പ്രസിഡന്റ് സ്ഥാനത്തേയ്ക്ക് Fianna Fail-നായി Jim Gavin മത്സരിക്കും. പാര്‍ട്ടിക്കുള്ളില്‍ നടത്തിയ രഹസ്യ വോട്ടെടുപ്പില്‍ Billy Kelleher-നെതിരെ 41-29 എന്ന വോട്ട് വ്യത്യാസത്തില്‍ വിജയിച്ചുകൊണ്ടാണ് മുന്‍ ജിഎഎ മാനേജറായ Jim Gavin, പാര്‍ട്ടിയുടെ ഔദ്യോഗിക സ്ഥാനാര്‍ത്ഥിയായി മാറിയത്. Gavin-നെ പിന്തുണയ്ക്കുന്നതായി പ്രധാനമന്ത്രിയും, പാര്‍ട്ടി നേതാവുമായ മീഹോള്‍ മാര്‍ട്ടിന്‍ നേരത്തെ പറഞ്ഞിരുന്നു. എന്നാല്‍ അവസാന തീരുമാനം പാര്‍ട്ടി ഒറ്റക്കെട്ടായി എടുക്കേണ്ടതാണെന്നും മാര്‍ട്ടിന്‍ പറഞ്ഞിരുന്നു.
രഹസ്യവോട്ടെടുപ്പിന് മുന്നോടിയായി Gavin-ഉം, Kelleher-ഉം 10 മിനിറ്റ് പ്രസന്റേഷനുകളും നടത്തി. തുടര്‍ന്ന് നടന്ന വോട്ടെടുപ്പില്‍
ഭൂരിപക്ഷം Gavin-ന് ആയതോടെ അദ്ദേഹം ഔദ്യോഗിക സ്ഥാനാര്‍ത്ഥിയായി പ്രഖ്യാപിക്കപ്പെട്ടു.
ഇതോടെ ഈ വര്‍ഷം ഒക്ടോബര്‍ 24-ന് നടക്കുന്ന പ്രസിഡന്റ് തെരഞ്ഞെടുപ്പില്‍ സ്വതന്ത്രയായി Catherine Connolly-യും Fine Gael-നായി Heather Humphreys-ഉം, Fianna Fail-നായി Jim Gavin-ഉം മത്സരിക്കുമെന്ന് ഉറപ്പായി. പ്രധാന പ്രതിപക്ഷമായ Sinn Fein ഇതുവരെ പ്രസിഡന്റ് സ്ഥാനാര്‍ത്ഥിയെ പ്രഖ്യാപിച്ചിട്ടില്ല. അതേസമയം താന്‍ മത്സരിക്കില്ലെന്ന് Sinn Fein നേതാവ് മേരി ലൂ മക്‌ഡൊണാള്‍ഡ് വ്യക്തമാക്കിയിട്ടുണ്ട്.
