വാട്ടർഫോർഡിൽ കുട്ടികളെ ഉൾപ്പെടെ തീവച്ചു കൊന്നകേസ് ; അറസ്റ്റിലായവരുടെ വിവരങ്ങൾ പുറത്ത്

അയർലൻഡിലെ വാട്ടർഫോർഡിൽ ഒരു കുടുംബത്തിലെ നാല് പേരുടെ മരണത്തിനിടയാക്കിയ പെട്രോൾ ബോംബ് ആക്രമണവുമായി ബന്ധപ്പെട്ട് അറസ്റ്റിലായ യുവാവിനും യുവതിക്കുമെതിരെ ഗുരുതരമായ കുറ്റങ്ങൾ ചുമത്തി കോടതിയിൽ ഹാജരാക്കി. 21 വയസ്സുകാരനായ സിയാൻ സ്റ്റേസി (Cian Stacey), 31 വയസ്സുകാരിയായ ജെസിക്ക ഡാൽട്ടൺ (Jessica Dalton) എന്നിവരാണ് കേസിൽ പ്രതികളായി കോടതിയിലെത്തിയത്. ഇരുവരെയും ജാമ്യം അനുവദിക്കാതെ കസ്റ്റഡിയിൽ റിമാൻഡ് ചെയ്തു.

അയർലൻഡിലെ മലയാളികൾക്കിടയിലും വലിയ ഞെട്ടലുണ്ടാക്കിയ സംഭവത്തിൽ, കൊല്ലപ്പെട്ട കുടുംബത്തിലെ നാല് പേരുടെയും മരണം കൊലപാതക അന്വേഷണത്തിന്റെ ഭാഗമായി ഗാർഡ തുടരുകയാണ്. മലയാളികൾ താമസിക്കുന്ന ഭാഗത്താണ് ദാരുണമായ തീവെപ്പും കൊലപാതകവും നടന്നത്.

ഇന്നലെ കൗണ്ടി ടിപ്പററിയിലെ ക്ലോൺമെൽ ഡിസ്ട്രിക്ട് കോടതിയിൽ നടന്ന പ്രത്യേക സിറ്റിങ്ങിലാണ് ഇരുവരെയും ഹാജരാക്കിയത്. വാട്ടർഫോർഡ് നഗരത്തിൽ വിലാസമുള്ള 31കാരിയായ ജെസിക്ക ഡാൽട്ടണും സ്ഥിരമായ താമസവിലാസമില്ലാത്ത 21കാരനായ സിയാൻ സ്റ്റേസിയുമാണ് പ്രതികൾ.ഇരുവർക്കുമെതിരെ ഓരോ ക്രിമിനൽ ഡാമേജ് കുറ്റവും ഗുരുതരമായ പരിക്കേൽപ്പിച്ചതുമായി ബന്ധപ്പെട്ട രണ്ട് കുറ്റങ്ങളും ഉൾപ്പെടെ മൂന്ന് കുറ്റങ്ങൾ വീതമാണ് ചുമത്തിയിരിക്കുന്നത്. ആക്രമണത്തിൽ ഗുരുതരമായി പരിക്കേറ്റ രണ്ട് പേരുമായി ബന്ധപ്പെട്ടതാണ് സെക്ഷൻ 4 പ്രകാരമുള്ള കുറ്റങ്ങൾ.

കോടതിയിൽ കുറ്റങ്ങൾ വായിച്ചുകേൾപ്പിച്ചപ്പോൾ ഇരുവരും പ്രതികരിച്ചില്ലെന്നാണ് റിപ്പോർട്ടുകൾ. ഇരുവർക്കും വേണ്ടി ഹാജരായ അഭിഭാഷകൻ ജാമ്യാപേക്ഷ നൽകിയില്ല. തുടർന്ന് ഇരുവരെയും കസ്റ്റഡിയിൽ റിമാൻഡ് ചെയ്യാൻ കോടതി ഉത്തരവിട്ടു. ഒക്ടോബർ 20 ചൊവ്വാഴ്ച വാട്ടർഫോർഡ് ഡിസ്ട്രിക്ട് കോടതിയിൽ കേസ് വീണ്ടും പരിഗണിക്കും. ഡാൽട്ടൺ നേരിട്ട് ഹാജരാകുമ്പോൾ സ്റ്റേസി വീഡിയോ ലിങ്ക് വഴി ഹാജരാകും.

ഒക്ടോബർ 13 ചൊവ്വാഴ്ച പുലർച്ചെ അഞ്ച് മണിയോടെയാണ് വാട്ടർഫോർഡ് നഗരത്തിലെ ബിർച്ച്‌വുഡ് എസ്റ്റേറ്റിലുള്ള കുടുംബവീട്ടിൽ തീപിടിത്തമുണ്ടായത്. പെട്രോൾ ബോംബ് ആക്രമണത്തെത്തുടർന്നുണ്ടായ തീപിടിത്തത്തിൽ ഫിലിപ്പ് ഇംഗ്ലീഷ് (58), ഭാര്യ കിം ഇംഗ്ലീഷ് (38), മക്കളായ 12 വയസ്സുകാരൻ കാലം, ഒൻപത് വയസ്സുകാരൻ ജെയ്‌ഡൻ എന്നിവർ മരിച്ചു.കുടുംബത്തിലെ മറ്റ് രണ്ട് കുട്ടികൾക്കും ആക്രമണത്തിൽ ഗുരുതരമായി പരിക്കേറ്റു. ഇവർ ക്രംലിൻ ആശുപത്രിയിൽ ചികിത്സയിലാണ്.

അപകടത്തിൽ കൊല്ലപ്പെട്ട ഫിലിപ്പ് ഇംഗ്ലീഷിന്റെ ആദ്യ വിവാഹത്തിലെ മകന് ഉണ്ടായിരുന്ന 20,000 യൂറോയുടെ മയക്കുമരുന്ന് കടവുമായി ബന്ധപ്പെട്ട തർക്കമാണ് ആക്രമണത്തിന് പിന്നിലെന്നാണ് കുടുംബാംഗങ്ങൾ ആരോപിച്ചിട്ടുള്ളത്. കൊല്ലപ്പെട്ട കുടുംബത്തിന് മയക്കുമരുന്ന് ഇടപാടുകളുമായോ കുറ്റകൃത്യങ്ങളുമായോ ബന്ധമില്ലായിരുന്നുവെന്നാണ് ബന്ധുക്കൾ വ്യക്തമാക്കിയിട്ടുള്ളത്.ആക്രമണത്തിന് പിന്നിൽ പ്രവർത്തിച്ചവരെയും ഇത് ആസൂത്രണം ചെയ്തവരെയും കണ്ടെത്താനുള്ള അന്വേഷണം ഗാർഡ തുടരുകയാണ്.

അറസ്റ്റിലായ ഇരുവരുടെയും പങ്ക്, ആക്രമണത്തിന്റെ പശ്ചാത്തലം, മറ്റാർക്കെങ്കിലും ഇതിൽ പങ്കുണ്ടോ തുടങ്ങിയ കാര്യങ്ങൾ അന്വേഷണത്തിന്റെ ഭാഗമാണ്. കടവുമായി ബന്ധപ്പെട്ട ആരോപണങ്ങൾ ഉൾപ്പെടെയുള്ള കാര്യങ്ങൾ ഔദ്യോഗിക അന്വേഷണത്തിലൂടെ സ്ഥിരീകരിക്കേണ്ടതുണ്ട്.

സംഭവവുമായി ബന്ധപ്പെട്ട് കൂടുതൽ തെളിവുകൾ ശേഖരിച്ചുവരികയാണെന്നും ആക്രമണത്തിൽ പങ്കുള്ള എല്ലാവരെയും നിയമത്തിന് മുന്നിൽ കൊണ്ടുവരാൻ ശ്രമിക്കുമെന്നും ഗാർഡ കമ്മീഷണർ ജസ്റ്റിൻ കെല്ലി വ്യക്തമാക്കിയതായി റിപ്പോർട്ടുകളുണ്ട്. സംഭവത്തെത്തുടർന്ന് വാട്ടർഫോർഡിൽ വ്യാപകമായ ദുഃഖവും പ്രതിഷേധവുമാണ് ഉയർന്നത്.മരിച്ച നാല് പേരുടെയും സംസ്കാരച്ചടങ്ങുകൾ ഒക്ടോബർ 19 തിങ്കളാഴ്ച വാട്ടർഫോർഡിലെ സേക്രഡ് ഹാർട്ട് പള്ളിയിൽ നടത്താനാണ് നിശ്ചയിച്ചിരിക്കുന്നത്.

For more news please join our whatsapp group

https://chat.whatsapp.com/EYff5ESLNtXIDOjtNZ27LS?s=cl&p=a&mlu=4&ilr=4