അയർലൻഡിലെ പൊതുമേഖലാ ജീവനക്കാരുടെ ശമ്പള തർക്കത്തിന് ഒടുവിൽ പരിഹാരമായി. സർക്കാരും ട്രേഡ് യൂണിയൻ പ്രതിനിധികളും തമ്മിൽ വർക്ക്‌പ്ലേസ് റിലേഷൻസ് കമ്മീഷനിൽ (WRC) നടന്ന നീണ്ട ചർച്ചകൾക്കൊടുവിലാണ് പുതിയ ദേശീയ ശമ്പള കരാറിൽ ധാരണയായത്. ബുധനാഴ്ച പുലർച്ചെ 3.30-ഓടെയാണ് ചർച്ചകൾ പൂർത്തിയായത്.പുതിയ കരാർ പ്രകാരം 2 വർഷവും 9 മാസവും കൊണ്ട് പൊതുമേഖലാ ജീവനക്കാർക്ക് ആകെ 10.75 ശതമാനം ശമ്പള വർധന ലഭിക്കും. 2029 മാർച്ച് വരെയാണ് കരാറിന്റെ കാലാവധി. അടിസ്ഥാന ശമ്പളത്തിൽ കുറഞ്ഞത് 7.75 ശതമാനം വർധനയും പ്രാദേശിക തലത്തിലുള്ള ചർച്ചകൾക്കായി ഒരു ശതമാനവും ഉൾപ്പെടുന്നതാണ് കരാർ. ബാക്കിയുള്ള വർധനയുടെ ഘടനയും മറ്റ് ആനുകൂല്യങ്ങളും കരാറിന്റെ വിശദമായ വ്യവസ്ഥകളുടെ അടിസ്ഥാനത്തിലായിരിക്കും.
നഴ്‌സുമാർക്കും ഡോക്ടർമാർക്കും ആശ്വാസം
പുതിയ ശമ്പള കരാർ അയർലൻഡിലെ ആരോഗ്യരംഗത്ത് ജോലി ചെയ്യുന്ന ആയിരക്കണക്കിന് നഴ്‌സുമാർക്കും ഡോക്ടർമാർക്കും ഉൾപ്പെടെയുള്ള ആരോഗ്യപ്രവർത്തകർക്കും ഗുണകരമാകും. HSE ആശുപത്രികളിലും മറ്റ് പൊതുജനാരോഗ്യ സ്ഥാപനങ്ങളിലും ജോലി ചെയ്യുന്ന ജീവനക്കാർക്ക് പുതിയ കരാറിന്റെ ആനുകൂല്യം ലഭിക്കും.
പ്രത്യേകിച്ച് അയർലൻഡിലെ ആരോഗ്യരംഗത്തിന്റെ നട്ടെല്ലായി പ്രവർത്തിക്കുന്ന മലയാളി നഴ്‌സുമാർക്ക് ഈ ശമ്പള വർധന ഏറെ പ്രാധാന്യമുള്ളതാണ്. രാജ്യത്തെ വിവിധ ആശുപത്രികളിലും നഴ്സിങ് സ്ഥാപനങ്ങളിലും വലിയൊരു വിഭാഗം മലയാളി നഴ്‌സുമാർ ജോലി ചെയ്യുന്നുണ്ട്. ജീവിതച്ചെലവ്, ഭവനവാടക, മോർട്ട്ഗേജ്, മറ്റ് ദൈനംദിന ചെലവുകൾ എന്നിവ വർധിച്ചുവരുന്ന സാഹചര്യത്തിൽ ശമ്പള വർധന ഇവർക്ക് സാമ്പത്തിക ആശ്വാസമാകും.ഡോക്ടർമാർക്കും മറ്റ് ആരോഗ്യപ്രവർത്തകർക്കും പുതിയ കരാറിന്റെ അടിസ്ഥാനത്തിൽ ശമ്പള ആനുകൂല്യങ്ങൾ ലഭിക്കും.നേരത്തെ യൂണിയനുകൾ നടത്തിയ സമരപരിപാടികളിലും മലയാളി നേഴ്സ്മാരുടെ സാന്നിധ്യം പ്രകടമായിരുന്നു.
കുറഞ്ഞ ശമ്പളമുള്ള ജീവനക്കാർക്ക് കൂടുതൽ നേട്ടം
കുറഞ്ഞ ശമ്പളത്തിൽ ജോലി ചെയ്യുന്ന പൊതുമേഖലാ ജീവനക്കാർക്കും പ്രത്യേക പരിഗണന നൽകുന്ന വ്യവസ്ഥകൾ പുതിയ കരാറിലുണ്ട്. ഇവർക്ക് കരാറിലെ പൊതുവായ വർധനയേക്കാൾ ഉയർന്ന ശതമാനത്തിലുള്ള ആനുകൂല്യം ലഭിക്കാനുള്ള വ്യവസ്ഥകളും ഉൾപ്പെടുത്തിയിട്ടുണ്ട്.
ഒഴിവായത് രാജ്യവ്യാപകമായ പ്രതിസന്ധി
നവംബർ 12-ന് നടത്താനിരുന്ന സമരത്തിൽ നഴ്‌സുമാർ, ഡോക്ടർമാർ, അധ്യാപകർ, സിവിൽ സർവീസ് ജീവനക്കാർ തുടങ്ങി 3 ലക്ഷത്തിലധികം പേർ പങ്കെടുക്കുമെന്നായിരുന്നു പ്രതീക്ഷ. സമരം നടന്നിരുന്നെങ്കിൽ ആശുപത്രി അപ്പോയിന്റ്മെന്റുകൾ, സ്കൂളുകൾ, സർക്കാർ ഓഫീസുകൾ, കോടതികൾ, ഡ്രൈവിങ് ടെസ്റ്റുകൾ തുടങ്ങിയ നിരവധി പൊതുസേവനങ്ങൾ തടസ്സപ്പെടുമായിരുന്നു.പുതിയ കരാറിൽ ധാരണയായതോടെ രാജ്യവ്യാപകമായ സമരവും അതിനോടനുബന്ധിച്ചുള്ള പ്രതിഷേധ റാലികളും ഒഴിവായി.
അയർലൻഡിലെ പൊതുമേഖലാ ജീവനക്കാർക്ക് പുതിയ ശമ്പള കരാർ ആശ്വാസമാകുമ്പോൾ, ആരോഗ്യരംഗത്ത് വലിയ സംഭാവന നൽകുന്ന മലയാളി നഴ്‌സുമാർ ഉൾപ്പെടെയുള്ള പ്രവാസി ജീവനക്കാർക്കും ഇത് പ്രതീക്ഷ നൽകുന്ന തീരുമാനമാണ്.
For more news please join our whatsapp group
https://chat.whatsapp.com/EYff5ESLNtXIDOjtNZ27LS?s=cl&p=a&mlu=4&ilr=4
Rose Malayalam Updates
അയർലണ്ട് വാർത്തകൾ ഉടൻ ലഭിക്കുവാൻ ഞങ്ങളുടെ വാട്സാപ്പ് ഗ്രൂപ്പിൽ അംഗമാകൂ.
JOIN GROUP NOW
Comments