ഫഹദ് ഫാസിൽ മുഖ്യ വേഷത്തിലെത്തിയ ചിത്രം ആവേശം ഇനി ഓടിടിയിൽ കാണാം. തീയേറ്ററുകളിൽ ഇപ്പോഴും മികച്ച പ്രേക്ഷക പ്രതികരണം നേടി ഓടിക്കൊണ്ടിരിക്കുന്ന ചിത്രം അപ്രതീക്ഷിതമായാണ് ഓടിടിയിൽ എത്തുന്നത് പ്രഖ്യാപിച്ചത്. മെയ് ഒമ്പതിന് ആമസോൺ പ്രൈമിലൂടെ ഓടിടി പ്ലേറ്റ്ഫോമിലേക്ക് എത്തുമെന്നാണ് റിപ്പോർട്ടുകൾ.
2023-ലെ തകർപ്പൻ ഹിറ്റായ രോമാഞ്ചത്തിന്റെ സംവിധായകൻ ജിത്തുമാധവനാണ് ഈ ചിത്രവും സംവിധാനം ചെയ്തിരിക്കുന്നത്. അൻവർ റഷീദ് എന്റർടൈൻമെന്റ്സിന്റെ ബാനറിൽ അൻവർ റഷീദും ഫഹദ് ഫാസിൽ ആൻഡ് ഫ്രണ്ട്സിന്റെ ബാനറിൽ നസ്രിയ നസീമും ചേർന്ന് നിർമിച്ച ഈ ചിത്രം ഏപ്രിൽ 11-നാണ് തീയേറ്ററുകളിൽ എത്തിയത്.
മൻസൂർ അലി ഖാൻ, ആശിഷ് വിദ്യാർത്ഥി, സജിൻ ഗോപു, പ്രമുഖ മലയാളി ഗെയിമറും യൂട്യൂബറുമായ ഹിപ്സ്റ്റർ, മിഥുൻ ജെഎസ്, റോഷൻ ഷാനവാസ്, പൂജ മോഹൻരാജ്, നീരജ രാജേന്ദ്രൻ, ശ്രീജിത്ത് നായർ, തങ്കം മോഹൻ തുടങ്ങി നിരവധി പേർ ചിത്രത്തിൽ വേഷമിട്ടിട്ടുണ്ട്. സമീർ താഹിർ ആണ് ചിത്രത്തിന്റെ ഛായാഗ്രഹണം. വിനായക് ശശികുമാറിന്റെ വരികൾക്ക് സുഷിൻ ശ്യാമാണ് സംഗീതം നിർവഹിച്ചിരിക്കുന്നത്. 150 കോടിയോളം ആഗോള കളക്ഷൻ നേടിക്കൊണ്ട് ജൈത്രയാത്ര തുടരുകയാണ് ചിത്രം.
