അയര്‍ലണ്ടിലെ ലോക്കല്‍, യൂറോപ്യന്‍ തെരഞ്ഞെടടുപ്പ് ഫലങ്ങള്‍ പുറത്തുവന്നതിന് പിന്നാലെ വീണ്ടും സഖ്യകക്ഷി സര്‍ക്കാര്‍ അധികാരത്തില്‍ വന്നേക്കുമെന്ന സൂചനയുമായി മുന്‍ Fine Gael നേതാവും, മുന്‍ പ്രധാനമന്ത്രിയുമായിരുന്ന ലിയോ വരദ്കര്‍. കൗണ്‍സില്‍ തെരഞ്ഞെടുപ്പില്‍ സര്‍ക്കാര്‍ സഖ്യകക്ഷിയായ Fine Gael 245 സീറ്റുകള്‍ നേടിയപ്പോള്‍, മറ്റൊരു സഖ്യകക്ഷിയായ Fianna Fail 248 സീറ്റുകള്‍ നേടിയിരുന്നു. യൂറോപ്യന്‍ പാര്‍ലമെന്റിലും ഇരു പാര്‍ട്ടികളും നാല് വീതം സീറ്റുകള്‍ നേടി. പ്രധാനപ്രതിപക്ഷമായ Sinn Fein-ന് പ്രതീക്ഷിച്ചതിലും വളരെക്കുറഞ്ഞ് 102 സീറ്റുകളാണ് കൗണ്‍സില്‍ തെരഞ്ഞെടുപ്പില്‍ ലഭിച്ചത്.
സഖ്യസര്‍ക്കാരിലെ ഏതെങ്കിലും ഒരു പാര്‍ട്ടി വളരെയധികം സീറ്റുകള്‍ നേടി വിജയിച്ചിരുന്നെങ്കില്‍ അസ്ഥിരത ഉണ്ടാകുമായിരുന്നുവെന്നും, എന്നാല്‍ നിലവിലെ സാഹചര്യത്തില്‍ തുല്യശക്തികള്‍ തമ്മില്‍ സഖ്യത്തിലായി പൊതുതെരഞ്ഞെടുപ്പിന് ശേഷം വീണ്ടും സര്‍ക്കാര്‍ രൂപീകരിക്കാന്‍ സാധ്യതയുണ്ടെന്നുമാണ് ബെല്‍ഫാസ്റ്റില്‍ നടന്ന ഒരു ചടങ്ങില്‍ വരദ്കര്‍ അഭിപ്രായപ്പെട്ടത്. നിലവിലെ വിജയത്തിന്റെ ആത്മവിശ്വാസത്തില്‍ പ്രതീക്ഷിച്ചതിലും നേരത്തെ ഈ ശരത്കാലത്ത് തന്നെ പ്രധാനമന്ത്രി സൈമണ്‍ ഹാരിസ് പൊതുതെരഞ്ഞെടുപ്പ് പ്രഖ്യാപിച്ചേക്കുമെന്ന ഊഹാപോഹങ്ങള്‍ക്കിടെയാണ് വരദ്കറുടെ പ്രതികരണം.
അതേസമയം പൊതുതെരഞ്ഞെടുപ്പില്‍ പൂര്‍ണ്ണമായും വേറെ തരത്തിലുള്ള മത്സരമാണ് നടക്കുകയെന്ന് വരദ്കര്‍ അംഗീകരിക്കുകയും ചെയ്തു. അഞ്ച് വര്‍ഷം മുമ്പത്തെ ലോക്കല്‍, യൂറോപ്യന്‍ തെരഞ്ഞെടുപ്പുകളില്‍ മികച്ച വിജയം നേടിയ തന്റെ പാര്‍ട്ടിയായ Fine Gael, എട്ട് മാസത്തിന് ശേഷം നടന്ന പൊതുതെരഞ്ഞെടുപ്പില്‍ ഏറെ പിന്നോട്ട് പോയ കാര്യം അദ്ദേഹം ചൂണ്ടിക്കാട്ടുകയും ചെയ്തു.
നിലവില്‍ Fine Gael, Fianna Fail, Green Party എന്നിവര്‍ ചേര്‍ന്നുള്ള സഖ്യസര്‍ക്കാരാണ് രാജ്യം ഭരിക്കുന്നത്.
