അയർലണ്ടിലെ മോർട്ട്ഗേജ് പലിശ നിരക്കുകൾ മൂന്ന് വർഷത്തിനിടെയുള്ള ഏറ്റവും താഴ്ന്ന നിലയിൽ. സെൻട്രൽ ബാങ്ക് ഓഫ് അയർലണ്ടിന്റെ കണക്കുകൾ പ്രകാരം രാജ്യത്തെ 2025 ഡിസംബർ മാസത്തിലുള്ള മോർട്ട്ഗേജ് പലിശ നിരക്ക് 3.50 ശതമാനം ആണ്. നവംബറിൽ ഇത് 3.53 ശതമാനവും ഒരു വർഷം മുമ്പ് 3.80 ശതമാനവും ആയിരുന്നു.
അതേസമയം ഡിസംബർ മാസത്തിലെ യൂറോസോൺ ശരാശരി 3.32 ശതമാനമായിരുന്നു എന്നതും ഓർക്കണം. യൂറോസോണിലെ ആറാമത്തെ ഉയർന്ന നിരക്കാണ് അയർലണ്ടിലേത്.
അയർലണ്ടിലെ വിവിധ സ്ഥാപനങ്ങൾ തമ്മിലും മോർട്ട്ഗേജ് നിരക്കിൽ വ്യാപകമായ വ്യത്യാസങ്ങൾ നിലനിൽക്കുന്നുണ്ട്. Bonkers.ie എന്ന വെബ്സൈറ്റിന്റെ വിശകലനം കാണിക്കുന്നത്, 10 ശതമാനം നിക്ഷേപത്തിൽ ആദ്യമായി €300,000 കടം വാങ്ങുന്നയാൾക്ക്, വേരിയബിൾ മോർട്ട്ഗേജ് നിരക്കുകൾ 3.35 ശതമാനം മുതൽ 4.70 ശതമാനം വരെയാണ്. മൂന്ന് വർഷത്തെ ഫിക്സഡ് മോർട്ട്ഗേജിനുള്ള നിരക്കുകൾ 3.20 ശതമാനം മുതൽ 4.85 ശതമാനം വരെയാണ്. അതിനാൽ മോർട്ട്ഗേജ് എടുക്കുന്നവർ ഒന്നിലധികം സ്ഥാപനങ്ങളെ സമീപിച്ച ശേഷം മാത്രം തീരുമാനമെടുക്കുന്നതാകും നല്ലത്.
