മാൾട്ട പ്രധാനമന്ത്രി റോബർട്ട് അബേലയുടെ കുടുംബത്തിന് ആരോഗ്യപരിചരണം നൽകിയ മലയാളി നഴ്സ് ഗീതു ലൂയിസിന് പാർലമെന്റിൽ പരസ്യമായ നന്ദി അറിയിച്ച് പ്രധാനമന്ത്രി. ബജറ്റ് പ്രസംഗത്തിനിടെ ഗീതുവിന്റെ പേര് പ്രത്യേകം പരാമർശിച്ച അദ്ദേഹം, കുടുംബത്തിലെ നിർണായക ഘട്ടങ്ങളിൽ നൽകിയ സേവനങ്ങൾ ഒരിക്കലും മറക്കാനാവില്ലെന്ന് വ്യക്തമാക്കി.തൃശൂർ ചാലക്കുടി മേലൂർ സ്വദേശിനിയായ 35കാരി ഗീതു ലൂയിസാണ് മാൾട്ടയുടെ പ്രധാനമന്ത്രിയിൽനിന്ന് ഈ അപൂർവ അംഗീകാരം നേടിയത്.
മാതാപിതാക്കൾക്ക് അസുഖം ബാധിച്ചപ്പോഴും മകൾക്ക് പരിചരണം ആവശ്യമായി വന്നപ്പോഴും സഹായത്തിനെത്തിയത് വിദേശത്തുനിന്നുള്ള ഒരു നഴ്സായിരുന്നുവെന്നും അവരുടെ പേര് ഗീതു എന്നാണെന്നും പ്രധാനമന്ത്രി പ്രസംഗത്തിൽ അനുസ്മരിച്ചു. ഗീതുവിന്റെ സേവനങ്ങൾക്ക് കുടുംബം കടപ്പെട്ടിരിക്കുന്നുവെന്നും അദ്ദേഹം പറഞ്ഞു.
കോവിഡ് കാലത്തെ പ്രവർത്തനം നിർണായകമായി
2018ലാണ് ഗീതു മാൾട്ടയിലെത്തിയത്. അതിന് മുമ്പ് കേരളത്തിൽ ഓപ്പറേഷൻ തിയറ്റർ നഴ്സായി ജോലി ചെയ്തിരുന്നു. കോവിഡ് മഹാമാരി യൂറോപ്പിലാകെ വ്യാപിച്ചപ്പോൾ മാൾട്ടയിലെ വിമാനത്താവളത്തിൽ എത്തുന്ന യാത്രക്കാരുടെ പരിശോധനാ പ്രവർത്തനങ്ങളിൽ ഗീതു സജീവമായി പങ്കെടുത്തു. വെല്ലുവിളി നിറഞ്ഞ ഈ ഉത്തരവാദിത്തം ഏറ്റെടുത്തതോടെ ആരോഗ്യവകുപ്പിന്റെ ശ്രദ്ധ പിടിച്ചുപറ്റി.പിന്നീട് കോവിഡ് പരിശോധനാ കേന്ദ്രങ്ങളിലും വാക്സിനേഷൻ കേന്ദ്രങ്ങളിലും പ്രവർത്തിക്കുന്ന നഴ്സിങ് സംഘങ്ങളുടെ നേതൃത്വം ഗീതുവിനെ ഏൽപിച്ചു. 250-ലധികം മലയാളി നഴ്സുമാർ ഉൾപ്പെട്ട സംഘത്തിന്റെ പ്രവർത്തനങ്ങൾ ഏകോപിപ്പിക്കാനും അവർക്ക് സാധിച്ചു. പൊതുമേഖലയിലെയും സ്വകാര്യ മേഖലയിലെയും ആശുപത്രികളിലേക്ക് ആരോഗ്യപ്രവർത്തകരെ ലഭ്യമാക്കുന്ന സ്ഥാപനത്തോടൊപ്പമാണ് ഗീതു പ്രവർത്തിക്കുന്നത്.
പ്രധാനമന്ത്രിയുടെ കുടുംബത്തിനും തുണയായി
മാൾട്ട മുൻ പ്രസിഡന്റ് ജോർജ് അബേലയ്ക്ക് അപകടത്തിൽ പരിക്കേറ്റതോടെയാണ് ഗീതുവിന് പ്രധാനമന്ത്രിയുടെ കുടുംബവുമായി അടുത്ത ബന്ധം രൂപപ്പെടുന്നത്. അദ്ദേഹത്തിന് പരിചരണം നൽകുന്നതിനായി കുടുംബത്തിന്റെ വസതിയിലേക്ക് ഗീതുവിനെ നിയോഗിച്ചു. തുടർന്നുള്ള ഒരു വർഷത്തോളം കുടുംബത്തിന്റെ ആരോഗ്യപരിചരണ ചുമതലകളിൽ അവർ സജീവമായി പങ്കാളിയായി.പ്രധാനമന്ത്രിയുടെ മകൾക്ക് അസുഖം ബാധിച്ചപ്പോഴും ഗീതുവിന്റെ സേവനം കുടുംബത്തിന് ആശ്വാസമായി. ജോലിയുടെ ഭാഗമായി ലഭിച്ച ഈ ഉത്തരവാദിത്തം അതീവ രഹസ്യസ്വഭാവമുള്ളതായിരുന്നതിനാൽ സ്വന്തം കുടുംബാംഗങ്ങൾക്കുപോലും ഗീതു ആരെയാണ് പരിചരിക്കുന്നതെന്ന് അറിയില്ലായിരുന്നു.
വിദേശ തൊഴിലാളികളുടെ സംഭാവനയ്ക്ക് അംഗീകാരം
മാൾട്ടയുടെ സാമ്പത്തിക വളർച്ചയിലും സാമൂഹിക പുരോഗതിയിലും വിദേശത്തുനിന്നെത്തി ജോലി ചെയ്യുന്നവരുടെ പങ്ക് വിശദീകരിക്കുന്നതിനിടെയാണ് പ്രധാനമന്ത്രി ഗീതുവിന്റെ അനുഭവം പാർലമെന്റിൽ പങ്കുവച്ചത്. രാജ്യത്തിന്റെ ആരോഗ്യസംരക്ഷണ മേഖലയ്ക്ക് വിദേശ ആരോഗ്യപ്രവർത്തകർ നൽകുന്ന സംഭാവനകൾ വിലമതിക്കപ്പെടേണ്ടതാണെന്നും അദ്ദേഹം ചൂണ്ടിക്കാട്ടി.പ്രധാനമന്ത്രിയുടെ പരസ്യമായ അഭിനന്ദനം അപ്രതീക്ഷിതമായിരുന്നുവെന്ന് ഗീതുവും പ്രതികരിച്ചു. പ്രതിഫലമോ പ്രത്യേക അംഗീകാരമോ പ്രതീക്ഷിക്കാതെ തനിക്കു ലഭിച്ച ഉത്തരവാദിത്തം നിർവഹിക്കുകയായിരുന്നു ഇതുവരെ ചെയ്തതെന്നും പ്രധാനമന്ത്രി തന്റെ പേര് പരാമർശിച്ചത് വലിയ അത്ഭുതമായെന്നും അവർ പറഞ്ഞു.
മകൾ ടിയാനയ്ക്കും കുടുംബത്തിനുമൊപ്പം മാൾട്ടയിൽ കഴിയുന്ന ഗീതു ലൂയിസിന് ലഭിച്ച ഈ അംഗീകാരം പ്രവാസി മലയാളി സമൂഹത്തിനും ആരോഗ്യരംഗത്ത് പ്രവർത്തിക്കുന്ന മലയാളി നഴ്സുമാർക്കും അഭിമാനനിമിഷമായി മാറുകയാണ്.
For more news please join our whatsapp group
https://chat.whatsapp.com/C4h4P7DDUt29uEyJPYyYou?s=cl&p=a&iam=2

Rose Malayalam Updates
അയർലണ്ട് വാർത്തകൾ ഉടൻ ലഭിക്കുവാൻ ഞങ്ങളുടെ വാട്സാപ്പ് ഗ്രൂപ്പിൽ അംഗമാകൂ.
JOIN GROUP NOW
Comments