പലചരക്ക് കട മറയാക്കി മയക്കുമരുന്ന് കച്ചവടം നടത്തിവന്നയാള്‍ക്ക് അയര്‍ലണ്ടില്‍ തടവ് ശിക്ഷ. ലിമറിക്കിലെ Corbally സ്വദേശിയായ Declan Sheehy എന്ന 58-കാരനെയാണ് കോടതി ആറ് വര്‍ഷത്തെ തടവിന് ശിക്ഷിച്ചത്.
ലിമറിക്ക് സിറ്റിയില്‍ കുടുംബസ്വത്തായി ലഭിച്ച ചെറിയ പലചരക്ക് കടയുടെ മറവിലാണ് പ്രതി വര്‍ഷങ്ങളായി മയക്കുമരുന്ന് നിര്‍മ്മാണവും, വില്‍പ്പനയും നടത്തിവന്നത്. രഹസ്യവിവരത്തെത്തുടര്‍ന്ന് 2022 നവംബര്‍ 21-ന് ഗാര്‍ഡ നടത്തിയ പരിശോധനയില്‍ കടയുടെ ഉള്ളിലെ അടുക്കളയില്‍ കൊക്കെയിന്‍ മിശ്രണം ചെയ്യുന്നതായി കണ്ടെത്തുകയായിരുന്നു. ഇതിനായുള്ള ഉപകരണങ്ങളും ഇവിടെയുണ്ടായിരുന്നു. 208,000 യൂറോ വിലവരുന്ന കൊക്കെയ്‌നാണ് ഇവിടെ നിന്നും പിടിച്ചെടുത്തത്.
മയക്കുമരുന്ന് തന്റേതാണെന്ന് ഗാര്‍ഡയോട് സമ്മതിച്ച Declan Sheehy-യില്‍ നിന്നും 58,000 യൂറോ പണവും കണ്ടെടുത്തു. ഇതില്‍ 7,000 യൂറോയ്ക്ക് മാത്രമായിരുന്നു രേഖകളുണ്ടായിരുന്നത്. അമ്മയില്‍ നിന്നും കൈമാറി വന്ന കട 20 വര്‍ഷത്തോളമായി പ്രതി നടത്തിവരികയായിരുന്നു.
