ഡബ്ലിന്‍, മീത്ത് എന്നിവിടങ്ങളിലെ എടിഎമ്മുകളില്‍ നിന്നായി 90,000 യൂറോ കവരാന്‍ ശ്രമിച്ച മൂന്ന് പേര്‍ ഗാര്‍ഡയുടെ പിടിയില്‍. ബ്ലാക്ക്‌റോക്ക് ഗാര്‍ഡ സ്‌റ്റേഷനിലെ ഉദ്യോഗസ്ഥരും, ഗാര്‍ഡ നാഷണല്‍ എക്കണോമിക് ക്രൈം ബ്യൂറോ (GNECB) അംഗങ്ങളും ചേര്‍ന്ന് നടത്തിയ അന്വേഷണത്തിലാണ് അറസ്റ്റ്.
ഡബ്ലിന്‍, മീത്ത് എന്നിവിടങ്ങളിലെ വിവിധ എടിഎമ്മുകളില്‍ ‘ക്യാഷ് ടാപ്പിങ് മെഷീനുകള്‍’ എന്നറിയപ്പെടുന്ന ഉപകരണങ്ങള്‍ ഘടിപ്പിച്ചതായി കണ്ടെത്തിയതിനെത്തുടര്‍ന്നായിരുന്നു അന്വേഷണമാരംഭിച്ചത്. എടിഎം മെഷീനുകള്‍ക്കുള്ളില്‍ ഈ ഉപകരണങ്ങള്‍ ഘടിപ്പിച്ചാല്‍, ഉപഭോക്താക്കള്‍ എടിഎം കാര്‍ഡ് ഇട്ട് പണം പിന്‍വലിക്കുമ്പോള്‍ പണം വിത്‌ഡ്രോവല്‍ വിന്‍ഡോയില്‍ ബ്ലോക്കാകുന്നു. അതേസമയം അക്കൗണ്ടില്‍ നിന്നും പണം പോകുകയും ചെയ്യും.
ഇത്തരത്തില്‍ വിവിധ എടിഎമ്മുകളില്‍ 90,000 യൂറോ തട്ടിപ്പുകാര്‍ കഴിഞ്ഞയാഴ്ച ബ്ലോക്ക് ചെയ്ത് വച്ചിരുന്നതായി ഗാര്‍ഡ പറയുന്നു. തുടര്‍ന്ന് നടത്തിയ അന്വേഷണത്തില്‍ വെള്ളിയാഴ്ച വൈകിട്ട് മൂന്ന് പുരുഷന്മാരെ ഗാര്‍ഡ അറസ്റ്റ് ചെയ്യുകയായിരുന്നു. ഇവരില്‍ നിന്നും പണവും, തട്ടിപ്പിനുപയോഗിക്കുന്ന നിരവധി മെഷീനുകളും പിടികൂടിയിട്ടുണ്ട്.
