ഐറിഷ് ഖജനാവിലേയ്ക്ക് ഈ മാസം 3.1 മില്യണ്‍ യൂറോ അടച്ച് Garda National Drugs and Organised Crime Bureau (GNDOCB). വിവിധ കുറ്റകൃത്യങ്ങളുമായി ബന്ധപ്പെട്ട് പിടിച്ചെടുത്ത പണമാണിത്. മയക്കുമരുന്ന് വിതരണം അടക്കമുള്ളവയ്ക്കായാണ് കുറ്റവാളി സംഘങ്ങള്‍ ഈ പണം ഉപയോഗിക്കാനിരുന്നതെന്ന് ഗാര്‍ഡ പറഞ്ഞു. അന്താരാഷ്ട്ര തലത്തില്‍ വരെ പ്രവര്‍ത്തിക്കുന്ന വിവിധ ക്രിമിനല്‍ സംഘങ്ങളില്‍ നിന്നുമാണ് ഗാര്‍ഡ ഈ പണം പിടികൂടിയത്.
മയക്കുമരുന്നിനും മറ്റും ചെലവാക്കുന്ന തുക വലിയ കുറ്റകൃത്യങ്ങള്‍ക്കായാണ് ക്രിമിനലുകള്‍ ഉപയോഗിക്കുന്നതെന്ന് ഗാര്‍ഡ പറഞ്ഞു. സ്വന്തം ആവശ്യത്തിന് ചെറിയ അളവില്‍ മയക്കുമരുന്ന് വാങ്ങുന്നവര്‍ പോലും വലിയ കുറ്റവാളി സംഘങ്ങളെയാണ് ക്രൂരപ്രവൃത്തികള്‍ക്കായി ഇത്തരത്തില്‍ സഹായിച്ചുവരുന്നത്.
2015-ലാണ് രാജ്യത്ത് Garda National Drugs and Organised Crime Bureau (GNDOCB) പ്രവര്‍ത്തനമാരംഭിച്ചത്. അന്നുമുതല്‍ ഇതുവരെ കുറ്റവാളികളില്‍ നിന്നും പിടിച്ചെടുത്ത 20 മില്യണ്‍ യൂറോയിലധികം ബ്യൂറോ ഖജനാവിന് നല്‍കിയിട്ടുണ്ട്.
