കൗണ്ടി ഡോണിഗാളിലെ Ardara-യില് ബിസിനസുകാരന് ആക്രമണത്തില് മരിച്ചു. 65-കാരനായ Stephen McCahill ആണ് തിങ്കളാഴ്ച രാവിലെ വീട്ടില് വച്ചുണ്ടായ ആക്രമണത്തില് മരിച്ചത്. പുലര്ച്ചെ 3.50-ഓടെയായിരുന്നു സംഭവം.
2016-ല് ഡോണിഗാള് പേഴ്സണ് ഓഫ് ദി ഇയര് ആയി തിരഞ്ഞെടുക്കപ്പെട്ട പ്രമുഖ ബിസിനസുകാരനായിരുന്നു McCahill. കഴിഞ്ഞ 25 വര്ഷമായി Ardara-യിലെ Corner House Bar-ന്റെ സഹഉടമയുമായിരുന്നു അദ്ദേഹം. വിവിധ കമ്പനികളുടെ ഡയറക്ടറായും പ്രവര്ത്തിച്ചുവരികയായിരുന്ന അദ്ദേഹം ജനങ്ങള്ക്ക് സുപരിചിതനാണ്. 2011-ല് പൊതുതെരഞ്ഞെടുപ്പിലും മത്സരിച്ചിരുന്നു.
സംഭവത്തില് 30-ലേറെ പ്രായമുള്ള ഒരു പുരുഷനെ ഗാര്ഡ അറസ്റ്റ് ചെയ്തിട്ടുണ്ട്. McCahill സംഭവസ്ഥലത്ത് വച്ചുതന്നെ മരിച്ചിരുന്നു. പ്രതിയും McCahill-ഉം തമ്മില് നേരത്തെ പരിചയമുണ്ടായിരുന്നു എന്നാണ് വിവരം.
Marietta ആണ് McCahill-ന്റെ ഭാര്യ. ഇരുവര്ക്കും പ്രായപൂര്ത്തിയായ രണ്ട് മക്കളുണ്ട്.
