കുട്ടികളെ ലൈംഗികമായി ചൂഷണം ചെയ്യുന്നവർക്കെതിരെ സ്വയം നീതി നടപ്പാക്കാനിറങ്ങിയ ‘Justice Reborn’ എന്ന സംഘത്തിന്റെ പ്രവൃത്തിയിൽ ആശങ്ക പ്രകടിപ്പിച്ച് ഗാർഡ. ലിമെറിക്കിലെ ഒരു വ്യക്തിയും 13 വയസ്സുള്ള പെൺകുട്ടിയാണെന്ന് അയാൾ കരുതിയ ഒരാളും തമ്മിലുള്ള ലൈംഗികച്ചുവയുള്ള ആശയവിനിമയങ്ങളെക്കുറിച്ച് ഒരു ‘പീഡോഫൈൽ ഹണ്ടർ’ (paedophile hunter) ഗ്രൂപ്പ് ഉന്നയിച്ച പരാതിയിൽ അന്വേഷണം ആരംഭിച്ചതായാണ് ഗാർഡ അറിിച്ചിരിക്കുന്നത്. എന്നാൽ ഇത്തരം ഇടപെടലുകളുടെ നിയമസാധുതയെക്കുറിച്ചും, ഇത് അക്രമങ്ങൾക്കും വ്യക്തികൾക്ക് ദോഷം സംഭവിക്കുന്നതിനും കാരണമായേക്കാമെന്നാണ് ഗാർഡയുടെ ആശങ്ക.
കൗണ്ടി ലിമെറിക്കിലെ ഒരു ഗ്രാമത്തിൽ വെച്ച് “ജസ്റ്റിസ് റീബോൺ” (Justice Reborn) എന്ന് സ്വയം പരിചയപ്പെടുത്തിയ ഗ്രൂപ്പിലെ അംഗങ്ങൾ പീഡോഫൈൽ സ്വഭാവം ഉണ്ട് എന്ന് പറയപ്പെടുന്ന ഒരു വ്യക്തിയെ സമീപിക്കുകയായിരുന്നു. 2026 ഫെബ്രുവരി 1-ന് കൗണ്ടി ലിമെറിക്കിലെ ഡൂണിൽ (Doon) ആണ് സംഭവം നടന്നത്.
പക്ഷേ ഇത്തരം സ്വകാര്യ ഗ്രൂപ്പുകൾ വ്യക്തികളെ സമീപിക്കുന്നത് ഗാർഡയ്ക്കും മറ്റ് പോലീസ് നീതിന്യായസംവിധാനങ്ങൾക്കും ആശങ്കയുണ്ടാക്കുന്ന കാര്യമാണെന്ന് ഗാർഡ പറഞ്ഞു. ലിമെറിക്കിലെ ഈ വ്യക്തിയുമായുള്ള ഗ്രൂപ്പിന്റെ ഇടപെടൽ റെക്കോർഡ് ചെയ്യുകയും ‘ജസ്റ്റിസ് റീബോൺ’ ഫേസ്ബുക്ക് പേജിലൂടെ തത്സമയം സംപ്രേഷണം ചെയ്യുകയും ചെയ്തിരുന്നു. മറ്റ് സമാന ഗ്രൂപ്പുകളും ഇത് പങ്കുവെച്ചു. ഈ വീഡിയോയ്ക്ക് പൊതുജനങ്ങളിൽ നിന്ന് വലിയ പിന്തുണ ലഭിക്കുകയും ഗ്രൂപ്പിന്റെ പ്രവർത്തനത്തെ പലരും പ്രശംസിക്കുകയും ചെയ്തിട്ടുമുണ്ട്.
പക്ഷേ നിയമം നടപ്പിലാക്കാനുള്ള ബാധ്യതയും ഉത്തരവാദിത്തവും ഗാർഡ അടക്കമുള്ള നീതിന്യായ സംവിധാനങ്ങളുടേതാണെന്നും, ഇത്തരത്തിൽ സ്വകാര്യ സംഘങ്ങൾ നീതി നടപ്പിലാക്കാനിറങ്ങുന്നത് ഭാവിയിൽ അക്രമസംഭവങ്ങളിലേയ്ക്ക് നയിച്ചേക്കാമെന്നുമാണ് ഗാർഡ മുന്നറിയിപ്പ് നൽകുന്നത്. അതുപോലെ കുറ്റവാളി എന്ന് കരുതി ഇത്തരം സംഘങ്ങൾ സമീപിക്കുന്ന വ്യക്തി യഥാർത്ഥത്തിൽ കുറ്റവാളിയാണെന്ന് ഉറപ്പിക്കണമെങ്കിൽ ശരിയായ അന്വേഷണം ആവശ്യവുമാണ്. സ്വകാര്യ സംഘങ്ങൾ നീതി നടപ്പാക്കാനിറങ്ങുന്നതിന് രാജ്യത്ത് നിയമസാധുതയില്ലെന്നും ഗാർഡ മുന്നറിയിപ്പ് നൽകുന്നു.
“കുറ്റകൃത്യങ്ങൾ അന്വേഷിക്കുന്നതും നിയമം നടപ്പിലാക്കുന്നതും ഗാർഡയുടെ ചുമതലയാണ്. ഓരോ പൗരനും കുറ്റം തെളിയുന്നത് വരെ നിരപരാധിയായിരിക്കാനുള്ള ഭരണഘടനാപരമായ അവകാശമുണ്ട്,” ഗാർഡ വിശദീകരിച്ചു. അതേസമയം കുട്ടികളുടെ സുരക്ഷയ്ക്ക് തന്നെയാണ് തങ്ങൾ മുൻഗണന നൽകുന്നതെന്നും കുട്ടികളെ അപകടത്തിലാക്കുന്ന കുറ്റകൃത്യങ്ങൾ അന്വേഷിക്കാൻ എല്ലാ നിയമപരമായ മാർഗങ്ങളും ഉപയോഗിക്കുമെന്നും ഗാർഡ പറഞ്ഞു. കുട്ടികളെ ലൈംഗികമായി ചൂഷണം ചെയ്യുന്നതിനെക്കുറിച്ച് എന്തെങ്കിലും വിവരം ലഭിക്കുന്നവർ അത് ഉടൻ തന്നെ ഗാർഡയെ അറിയിക്കണമെന്നും അവർ അഭ്യർത്ഥിച്ചു.
മറുവശത്ത് ഗാർഡയുടെ ഈ മുന്നറിയിപ്പിനെക്കുറിച്ച് പ്രതികരിക്കാൻ ‘ജസ്റ്റിസ് റീബോൺ’ വക്താവ് തയ്യാറായില്ല. എന്നാൽ, തങ്ങൾ ഒരു ‘സ്റ്റിംഗ് ഓപ്പറേഷൻ’ (sting operation) നടത്തിയതാണെന്നും ഇതുമായി ബന്ധപ്പെട്ട ചാറ്റ് വിവരങ്ങളും മൊഴികളും ഗാർഡയ്ക്ക് കൈമാറിയിട്ടുണ്ടെന്നും അവർ അറിയിച്ചു. “ഞങ്ങൾ തെളിവുകൾ ശേഖരിക്കുന്നു, അത് പോലീസിന് കൈമാറുന്നതോടെ ഞങ്ങളുടെ ദൗത്യം പൂർത്തിയായി,” വക്താവ് പറഞ്ഞു. കഴിഞ്ഞ 12 മാസത്തിനിടെ ഇത്തരത്തിലുള്ള 250-ലധികം സ്റ്റിംഗ് ഓപ്പറേഷനുകൾ തങ്ങൾ പൂർത്തിയാക്കിയതായും ഗ്രൂപ്പ് അവകാശപ്പെട്ടു.
