അയർലണ്ടിലെ 30 ഓളം ആശുപത്രികളിൽ ഈ മാസം തന്നെ സമരം

ശമ്പള കരാറുമായി ബന്ധപ്പെട്ട സമരത്തിന്റെ ആദ്യഘട്ടമായി അയർലണ്ടിലെ 30 ഓളം ആശുപത്രികളിൽ ഈ മാസം തന്നെ സമരം തുടങ്ങുമെന്ന് യൂണിയൻ നേതാക്കൾ അറിയിച്ചു. പൊതുമേഖലാ ജീവനക്കാരുടെ ശമ്പളവുമായി ബന്ധപ്പെട്ട തർക്കം പരിഹരിക്കപ്പെടാത്തതിനെ തുടർന്നാണ് അയർലണ്ടിലെ 30 ഓളം ആശുപത്രികളിൽ ഈ മാസം അവസാനം മുതൽ സമരനടപടികൾ ആരംഭിക്കുന്നത്.

ഹെൽത്ത്‌കെയർ അസിസ്റ്റന്റുമാർ, ക്ലീനർമാർ, പോർട്ടർമാർ, കാറ്ററിംഗ് ജീവനക്കാർ തുടങ്ങിയവരാണ് സമരത്തിന്റെ ഭാഗമാകുന്നത്.സെപ്റ്റംബർ 30 മുതൽ ‘വർക്ക് ടു റൂൾ’ സമരം ആരംഭിക്കാനാണ് തീരുമാനം. SIPTU അംഗങ്ങളായ ജീവനക്കാർക്കൊപ്പം Fórsa അംഗങ്ങളും ഇതേ ദിവസം മുതൽ വ്യവസായ നടപടിയിൽ പങ്കെടുക്കും. സമരത്തിന്റെ ഭാഗമായി ജീവനക്കാർ റോസ്റ്ററിൽ ഉൾപ്പെടുത്തിയിട്ടില്ലാത്ത അധികസമയം ജോലി ചെയ്യുന്നതിൽ നിന്ന് വിട്ടുനിൽക്കും.

പുതിയ ശമ്പള കരാർ വേണമെന്ന് യൂണിയനുകൾപൊതുസേവന മേഖലയിലെ ജീവനക്കാർക്കായി പുതിയ ശമ്പള കരാർ സംബന്ധിച്ച ചർച്ചകൾ സർക്കാർ ഉടൻ ആരംഭിക്കണമെന്നാണ് യൂണിയനുകളുടെ ആവശ്യം. നിലവിലുണ്ടായിരുന്ന പൊതുസേവന വേതന കരാർ ജൂൺ അവസാനത്തോടെ കാലാവധി പൂർത്തിയായിരുന്നു. രണ്ടര വർഷത്തെ കാലയളവിൽ 10.25 ശതമാനം വരെ ശമ്പള വർധന നൽകുന്നതായിരുന്നു മുൻ കരാർ.പുതിയ കരാറിനായി സർക്കാർ ചർച്ചകൾ ആരംഭിക്കാത്തതിൽ പ്രതിഷേധിച്ചാണ് വ്യവസായ നടപടിയിലേക്ക് നീങ്ങുന്നതെന്ന് SIPTU വ്യക്തമാക്കി.കഴിഞ്ഞ ഓഗസ്റ്റ് 31ന് നടന്ന യൂണിയൻ ബാലറ്റിൽ സമരത്തിനും ആവശ്യമായാൽ പണിമുടക്ക് ഉൾപ്പെടെയുള്ള കൂടുതൽ ശക്തമായ നടപടികൾക്കും വൻ പിന്തുണ ലഭിച്ചതായും യൂണിയൻ അറിയിച്ചു.

ആരോഗ്യമേഖലയിലെ ജീവനക്കാർക്ക് കുറഞ്ഞ വിഭവങ്ങളുമായി കൂടുതൽ ജോലി ചെയ്യേണ്ടിവരുന്നതായും അധിക മണിക്കൂറുകൾ ജോലി ചെയ്യാൻ നിരന്തരം ആവശ്യപ്പെടുന്നതായും SIPTU ഹെൽത്ത് ഡിവിഷണൽ ഓർഗനൈസർ കെവിൻ ഫിഗിസ് പറഞ്ഞു.ജീവിതച്ചെലവിലുണ്ടായ വർധനയുടെ ആഘാതം ആരോഗ്യപ്രവർത്തകരും നേരിടുന്നുണ്ടെന്നും, തങ്ങളുടെ ശമ്പളവും തൊഴിൽ സാഹചര്യങ്ങളും യൂണിയൻ പ്രതിനിധികളിലൂടെ ചർച്ച ചെയ്ത് തീരുമാനിക്കപ്പെടണമെന്നാണ് ജീവനക്കാരുടെ ആവശ്യമെന്നും അദ്ദേഹം വ്യക്തമാക്കി.

രോഗികളെ ബുദ്ധിമുട്ടിക്കാനല്ല സമരമെന്ന് SIPTU നേതാക്കൾ വ്യക്തമാക്കി.സമരനടപടി രോഗികൾക്കും സേവനമെടുക്കുന്നവർക്കും എതിരെയുള്ളതല്ലെന്ന് SIPTU വ്യക്തമാക്കി. സർക്കാർ ICTU Public Services Committee-യിലെ യൂണിയനുകളുമായി ചർച്ചയ്ക്ക് തയ്യാറാകണമെന്നാണ് ആവശ്യം.സർക്കാരിന്റെ പ്രതികരണത്തെ ആശ്രയിച്ചായിരിക്കും തുടർന്നുള്ള സമര നടപടികൾ തീരുമാനിക്കുക. ചർച്ചകൾക്ക് സർക്കാർ തയ്യാറായില്ലെങ്കിൽ കൂടുതൽ ശക്തമായ സമരനടപടികളിലേക്ക് നീങ്ങാനുള്ള സാധ്യതയും നിലനിൽക്കുന്നുണ്ട്.അതേസമയം, വ്യവസായ നടപടി മൂലം പൊതുജനങ്ങൾക്ക് വലിയ തോതിൽ സേവന തടസ്സം നേരിടുന്നത് അന്യായമാണെന്ന് ചെലവ് വകുപ്പ് മന്ത്രി ജാക്ക് ചേംബേഴ്സ് പ്രതികരിച്ചു. പൊതുമേഖലാ ജീവനക്കാരുടെ ശമ്പളം പണപ്പെരുപ്പത്തേക്കാൾ പിന്നിലാണെന്ന യൂണിയൻ വാദവും മന്ത്രി തള്ളിക്കളഞ്ഞു.