ഹലോവീൻ ഐറിഷ് ഒറിജിനോ അമേരിക്കൻ ഒറിജിനോ? തർക്കം മുറുകുന്നു

ലോകമെമ്പാടും ആഘോഷിക്കപ്പെടുന്ന ഹലോവീന്റെ യഥാർഥ ഉത്ഭവത്തെച്ചൊല്ലി പുതിയ ചർച്ചകൾ. അയർലണ്ടിന്റെ പുരാതന സാംഹെയ്ൻ (Samhain) ആഘോഷമാണോ ഇന്നത്തെ ഹലോവീന്റെ അടിസ്ഥാനം, അതോ അമേരിക്കയിൽ രൂപപ്പെട്ട ആധുനിക ആഘോഷരീതികളാണോ അതിന്റെ യഥാർഥ മുഖം എന്നതാണ് പ്രധാന തർക്കവിഷയം.

അയർലണ്ടിൽ രണ്ടായിരത്തിലേറെ വർഷം പഴക്കമുള്ള സാംഹെയ്ൻ ആഘോഷങ്ങളുമായി ബന്ധപ്പെടുത്തിയാണ് ഹലോവീന്റെ ചരിത്രം പൊതുവെ വിശദീകരിക്കപ്പെടുന്നത്. വേനൽക്കാലം അവസാനിച്ച് ശൈത്യകാലം ആരംഭിക്കുന്നതിന്റെ ഭാഗമായി പുരാതന കെൽറ്റിക് സമൂഹങ്ങൾ ആചരിച്ചിരുന്ന ഉത്സവമായിരുന്നു സാംഹെയ്ൻ. ഒക്ടോബർ 31-ന് രാത്രിയിലായിരുന്നു ഇതുമായി ബന്ധപ്പെട്ട പ്രധാന ആചാരങ്ങൾ നടന്നിരുന്നത്.മരിച്ചുപോയവരുടെ ആത്മാക്കൾ ഭൂമിയിലേക്ക് മടങ്ങിവരുമെന്ന വിശ്വാസവും വലിയ അഗ്നിക്കുണ്ഡങ്ങൾ തെളിക്കുന്നതും മുഖംമൂടികളും വേഷങ്ങളും ധരിക്കുന്നതും ഈ ആഘോഷത്തിന്റെ ഭാഗമായിരുന്നു.

കാലക്രമേണ ഈ ആചാരങ്ങളിൽ പലതും ഇന്നത്തെ ഹലോവീൻ ആഘോഷങ്ങളുമായി ബന്ധപ്പെട്ടു അമേരിക്കയിലേക്ക് എത്തിയതോടെ ആഘോഷത്തിന് പുതിയ മുഖം വന്നു.19-ാം നൂറ്റാണ്ടിൽ അയർലണ്ടിൽ നിന്നും സ്കോട്ട്ലൻഡിൽ നിന്നും അമേരിക്കയിലേക്ക് കുടിയേറിയവരാണ് ഹലോവീനുമായി ബന്ധപ്പെട്ട നിരവധി ആചാരങ്ങൾ അറ്റ്ലാന്റിക് കടന്ന് അമേരിക്കയിലെത്തിച്ചത്. അയർലണ്ടിൽ മത്തങ്ങയ്ക്ക് പകരം ടേണിപ്പ് (Turnip) പോലുള്ള പച്ചക്കറികൾ കൊത്തിയുണ്ടാക്കിയിരുന്ന വിളക്കുകൾ അമേരിക്കയിലെത്തിയപ്പോൾ വലിയ മത്തങ്ങകളായി മാറി.തുടർന്ന് വേഷംമാറി വീടുകൾ സന്ദർശിക്കുന്നതും മിഠായികൾ ആവശ്യപ്പെടുന്ന ‘Trick or Treat’ രീതിയും അലങ്കാരങ്ങളും ആഘോഷങ്ങളും അമേരിക്കയിൽ കൂടുതൽ ജനപ്രിയമായി. സിനിമകളും ടെലിവിഷനും വാണിജ്യവൽക്കരണവും ആധുനിക ഹലോവീന്റെ രൂപീകരണത്തിൽ വലിയ പങ്കുവഹിച്ചു.

അയർലണ്ടിന്റെ അവകാശവാദത്തിലും ചരിത്രകാരന്മാർക്കിടയിൽ ഭിന്നാഭിപ്രായം ഉണ്ട്.ഹലോവീൻ പൂർണമായും അയർലണ്ടിൽ നിന്നാണ് ഉത്ഭവിച്ചതെന്ന വാദത്തെയും ചില ചരിത്രഗവേഷകർ ചോദ്യം ചെയ്യുന്നുണ്ട്. സ്കോട്ട്ലൻഡ്, വെയിൽസ്, ഇംഗ്ലണ്ട്, യൂറോപ്പിലെ മറ്റ് പ്രദേശങ്ങൾ എന്നിവിടങ്ങളിലെ സമാനമായ നാടോടി ആചാരങ്ങളും ഇന്നത്തെ ഹലോവീന്റെ രൂപീകരണത്തെ സ്വാധീനിച്ചിട്ടുണ്ടെന്നാണ് ഇവരുടെ നിരീക്ഷണം.ആഘോഷത്തിന്റെ ചരിത്രം ഒരൊറ്റ രാജ്യത്തിന്റെയോ സംസ്കാരത്തിന്റെയോ മാത്രം സംഭാവനയായി കാണാനാകില്ലെന്ന വാദവും ശക്തമാണ്.

തർക്കത്തിനിടയിൽ അയർലണ്ട് വീണ്ടും ഹലോവീന്റെ ആഗോള കേന്ദ്രമാകാൻ ശ്രമിക്കുന്നുണ്ട്.ഹലോവീന്റെ ഐറിഷ് പൈതൃകം ആഗോളതലത്തിൽ പ്രചരിപ്പിക്കുന്നതിനായി ‘Ireland, Home of Halloween’ എന്ന പേരിൽ ടൂറിസം പ്രചാരണവും നടക്കുന്നുണ്ട്. ഡെറി ഉൾപ്പെടെയുള്ള നഗരങ്ങളിൽ വിപുലമായ ആഘോഷങ്ങൾ സംഘടിപ്പിക്കുന്നുണ്ട്. 2030-ഓടെ അന്താരാഷ്ട്ര വിനോദസഞ്ചാരികളെ ഉൾപ്പെടെ കൂടുതൽ പേരെ ആകർഷിക്കുകയാണ് ലക്ഷ്യം.അതേസമയം, പുരാതന ഐറിഷ് പാരമ്പര്യത്തെ അമിതമായ വാണിജ്യവൽക്കരണത്തിലൂടെ മാറ്റിമറിക്കരുതെന്ന ആശങ്കയും ഉയരുന്നുണ്ട്.

ചരിത്രപരമായി നോക്കുമ്പോൾ, ഹലോവീന്റെ വേരുകൾ അയർലണ്ടിലെയും മറ്റ് യൂറോപ്യൻ പാരമ്പര്യങ്ങളിലുമാണ്. എന്നാൽ ഇന്ന് ലോകം കാണുന്ന ഹലോവീന്റെ ആധുനിക രൂപത്തിന് അമേരിക്കയുടെ സംഭാവനയും നിർണായകമാണ്. അതിനാൽ ഇത് ഐറിഷ് പാരമ്പര്യവും അമേരിക്കൻ പരിണാമവും ചേർന്നുണ്ടായ ആഘോഷമാണെന്ന വിലയിരുത്തലാണ് കൂടുതൽ ചരിത്രപരമായി യുക്തിസഹം.

For more news please join our whatsapp group

https://chat.whatsapp.com/EYff5ESLNtXIDOjtNZ27LS?s=cl&p=a&mlu=4&ilr=4