ലേണർ ഡ്രൈവിങ് പെർമിറ്റ്; നവംബർ ഒന്നു മുതൽ വൻ മാറ്റങ്ങൾ

ഡ്രൈവിങ് ടെസ്റ്റ് എഴുതാതെ പെർമിറ്റ് പുതുക്കാനാകില്ല.നാലാമത്തെ പെർമിറ്റിന് ഒരു വർഷം മാത്രം കാലാവധി.ഏഴു വർഷത്തിനുശേഷം വീണ്ടും പഠനപ്രക്രിയ തുടങ്ങണം

അയർലൻഡിൽ ലേണർ ഡ്രൈവിങ് പെർമിറ്റ് നിയമങ്ങളിൽ നവംബർ ഒന്നു മുതൽ സുപ്രധാന മാറ്റങ്ങൾ നിലവിൽ വരും. ഡ്രൈവിങ് ടെസ്റ്റ് എഴുതാതെ തുടർച്ചയായി ലേണർ പെർമിറ്റ് പുതുക്കി വാഹനമോടിക്കുന്ന രീതി അവസാനിപ്പിക്കുകയാണ് പുതിയ നിയമത്തിന്റെ ലക്ഷ്യം. റോഡ് സുരക്ഷയും ഡ്രൈവർമാരുടെ പരിശീലന നിലവാരവും മെച്ചപ്പെടുത്തുന്നതിന്റെ ഭാഗമായാണ് റോഡ് സേഫ്റ്റി അതോറിറ്റി (RSA) പുതിയ മാറ്റങ്ങൾ നടപ്പാക്കുന്നത്.

നിലവിൽ ഡ്രൈവിങ് ടെസ്റ്റിന് അപേക്ഷിക്കുകയോ ടെസ്റ്റ് ബുക്ക് ചെയ്യുകയോ ചെയ്തതിന്റെ അടിസ്ഥാനത്തിൽ ലേണർ പെർമിറ്റ് പുതുക്കാൻ സാധിക്കുന്ന സാഹചര്യമാണ് നിലനിൽക്കുന്നത്. എന്നാൽ നവംബർ ഒന്നു മുതൽ മൂന്നാമത്തെയും നാലാമത്തെയും പെർമിറ്റുകൾക്ക് അപേക്ഷിക്കുന്നവർക്ക് ഈ സൗകര്യം മാത്രം മതിയാകില്ല. അപേക്ഷിക്കുന്നതിന് മുമ്പുള്ള രണ്ടു വർഷത്തിനുള്ളിൽ പ്രായോഗിക ഡ്രൈവിങ് ടെസ്റ്റ് എഴുതിയിരിക്കണം.നാലാമത്തെ പെർമിറ്റിന് ഒരു വർഷം മാത്രംപുതിയ നിയമപ്രകാരം നാലാമത്തെ ലേണർ പെർമിറ്റിന്റെ കാലാവധി രണ്ടു വർഷത്തിൽനിന്ന് ഒരു വർഷമായി കുറയും. നാലാമത്തെ പെർമിറ്റിനുശേഷം അഞ്ചാമത്തെ പെർമിറ്റ് അനുവദിക്കില്ല.

ഏഴു വർഷത്തോളം ലേണർ പെർമിറ്റ് കൈവശം വച്ചിട്ടും ഡ്രൈവിങ് ലൈസൻസ് നേടാത്തവർക്ക് വീണ്ടും പഠനപ്രക്രിയ ആരംഭിക്കേണ്ടിവരും.ഇതിന്റെ ഭാഗമായി തിയറി ടെസ്റ്റ് വിജയിക്കുക, പുതിയ ലേണർ പെർമിറ്റ് നേടുക, നിർബന്ധിത ഡ്രൈവിങ് പരിശീലനമായ 12 Essential Driver Training (EDT) ക്ലാസുകൾ പൂർത്തിയാക്കുക, തുടർന്ന് പ്രായോഗിക ഡ്രൈവിങ് ടെസ്റ്റ് എഴുതുക തുടങ്ങിയ നടപടികൾ വീണ്ടും പൂർത്തിയാക്കേണ്ടിവരും.

ആദ്യ പെർമിറ്റുകാർക്ക് മാറ്റമില്ല

ആദ്യത്തെയും രണ്ടാമത്തെയും ലേണർ പെർമിറ്റുകൾക്ക് അപേക്ഷിക്കുന്നവർക്ക് പുതിയ നിയമം അധിക നിബന്ധനകൾ ഏർപ്പെടുത്തുന്നില്ല. എന്നാൽ രണ്ടാമത്തെ പെർമിറ്റിലുള്ളവരും മൂന്നാമത്തെ പെർമിറ്റിലേക്ക് കടക്കേണ്ടവരും കാലാവധി പരിശോധിച്ച് നേരത്തേ നടപടികൾ സ്വീകരിക്കണം.നവംബർ ഒന്നിന് മുമ്പ് ഡ്രൈവിങ് ടെസ്റ്റിന് അപേക്ഷിച്ചിട്ടുണ്ടെങ്കിലും ടെസ്റ്റ് എഴുതിയിട്ടില്ലെങ്കിൽ പുതിയ നിയമത്തിലെ നിബന്ധന പാലിച്ചതായി കണക്കാക്കില്ല. ടെസ്റ്റ് റദ്ദാകുകയോ സമയബന്ധിതമായി പുതിയ തീയതി ലഭിക്കാതിരിക്കുകയോ ചെയ്താലും നിയമത്തിൽ ഇളവ് ഉറപ്പില്ലെന്ന് RSA വ്യക്തമാക്കുന്നു.

ആയിരക്കണക്കിന് ഡ്രൈവർമാരെ ബാധിച്ചേക്കും

ദീർഘകാലമായി ലേണർ പെർമിറ്റിൽ തുടരുന്ന നിരവധി ഡ്രൈവർമാരെ പുതിയ മാറ്റങ്ങൾ ബാധിക്കുമെന്നാണ് വിലയിരുത്തൽ. അതിനാൽ നിലവിലെ പെർമിറ്റിന്റെ കാലാവധി, കൈവശമുള്ള പെർമിറ്റിന്റെ എണ്ണം, കഴിഞ്ഞ രണ്ടു വർഷത്തിനുള്ളിൽ ഡ്രൈവിങ് ടെസ്റ്റ് എഴുതിയിട്ടുണ്ടോ തുടങ്ങിയ കാര്യങ്ങൾ പരിശോധിക്കണമെന്ന് അധികൃതർ നിർദേശിക്കുന്നു.പുതിയ നിയമം പ്രാബല്യത്തിൽ വരുന്നതോടെ ലേണർ പെർമിറ്റ് ദീർഘകാലം കൈവശം വയ്ക്കുന്നതിനുപകരം ഡ്രൈവിങ് പരിശീലനം പൂർത്തിയാക്കി സമ്പൂർണ ലൈസൻസ് നേടാൻ ഡ്രൈവർമാർ കൂടുതൽ ശ്രദ്ധിക്കുമെന്നാണ് RSA പ്രതീക്ഷിക്കുന്നത്.

നിലവിൽ കാലാവധിയുള്ള പെർമിറ്റുള്ളവർക്ക് നവംബർ ഒന്നിന് തന്നെ വാഹനമോടിക്കുന്നത് നിർത്തേണ്ടതില്ല. എന്നാൽ പെർമിറ്റ് പുതുക്കേണ്ട സമയത്ത് പുതിയ നിയമത്തിലെ വ്യവസ്ഥകൾ പാലിക്കേണ്ടിവരും. അതിനാൽ അവസാന നിമിഷം വരെ കാത്തിരിക്കാതെ ഡ്രൈവിങ് ടെസ്റ്റിനുള്ള തയ്യാറെടുപ്പുകൾ നേരത്തേ ആരംഭിക്കണമെന്നാണ് നിർദേശം.

For more news please join our whatsapp group

https://chat.whatsapp.com/EYff5ESLNtXIDOjtNZ27LS?s=cl&p=a&mlu=4&ilr=4