നീനാ (കൗണ്ടി ടിപ്പററി): നീനാ കൈരളിയുടെ ആഭിമുഖ്യത്തിൽ സംഘടിപ്പിക്കപ്പെട്ട ഈസ്റ്റർ,വിഷു,ഈദ് സംയുക്താഘോഷങ്ങൾ നീനാ സ്കൗട്ട് ഹാളിൽ വച്ച് വർണാഭമായി നടന്നു. പ്രത്യാശയും,ഐശ്വര്യവും,സ്നേഹവും വിളിച്ചോതുന്ന ഈസ്റ്റർ,വിഷു,ഈദ് ആഘോഷങ്ങൾ ഒരുമയുടെ സന്ദേശത്തിൽ ആഘോഷിക്കാൻ കൈരളിക്ക് സാധിച്ചു.
നീനാ കൈരളി പ്രസിഡന്റ് ജെയ്സൺ ജോസഫ് സ്വാഗതം ആശംസിച്ചു. തുടർന്ന് നീനാ സെന്റ് മേരിസ് ചർച്ചിലെ വൈദികൻ ഫാ.റെക്സൻ ചുള്ളിക്കലും, കമ്മറ്റി അംഗങ്ങളും ചേർന്നു തിരിതെളിച്ചതോടെ ആഘോഷങ്ങൾക്ക് തുടക്കമായി. ഒരുമയുടെ മനോഹരമായ സന്ദേശം ഫാ.റെക്സൻ ചുള്ളിക്കൽ നൽകി.
ഈസ്റ്ററും വിഷുവും ഈദും ഒരേ വേദിയിൽ ഒരുമിച്ച് ആഘോഷിച്ചപ്പോൾ, മൂന്ന് ആഘോഷങ്ങളെയും പ്രതിനിധീകരിച്ച് മൂന്ന് കുടുംബങ്ങൾ തനതായ വേഷവിധാനങ്ങളോടെ സ്റ്റേജിൽ എത്തിയത് മതസൗഹാർദ്ദത്തിന്റെ ഉജ്ജ്വലമായ കാഴ്ചയായി. വിവിധ സംസ്കാരങ്ങൾ ഒന്നായി ചേർന്ന ആ നിമിഷം ഐക്യം വിളിച്ചോതുന്നതായിരുന്നു.
തുടർന്ന് സ്കിറ്റുകൾ, കുട്ടികളുടെയും മുതിർന്നവരുടെയും വിവിധങ്ങളായ കലാപരിപാടികൾ, നൃത്ത പരിപാടികൾ, സംഗീതാലാപം തുടങ്ങി കാണികളെ ഈസ്റ്റർ,വിഷു,ഈദ് ആഘോഷങ്ങളുടെ പവിത്രതയിലേയ്ക്കും, ചിന്തകളിലേയ്ക്കും കൂട്ടികൊണ്ട് പോകുന്ന അനവധി പരിപാടികൾ അവതരിപ്പിക്കപ്പെട്ടു.
പീഡാനുഭവത്തെ ആസ്പദമാക്കി നിർമ്മിച്ച ‘മുപ്പത് വെള്ളിക്കാശ് ‘ എന്ന ദൃശ്യവിഷ്കാരവും, ഏവരെയും ഗൃഹാതുരത്വത്തിലേയ്ക്ക് കൂട്ടിക്കൊണ്ട് പോയ ‘അമരം വീണ്ടും‘
എന്ന സ്കിറ്റും കൂടാതെ ‘ശിവപാർവതീ പരിണയം’ നടന രൂപത്തിൽ അവതരിപ്പിക്കപ്പെട്ടതും ഏറെ ശ്രദ്ധ പിടിച്ചുപറ്റി.
പിന്നീട് കാണികളെ ആവേശഭരിതരാക്കിയ ഡിജെയ്ക്കൊപ്പം വിഭവസമൃദ്ധമായ ഡിന്നറോടെ ആഘോഷപരിപാടികൾക്ക് തിരശീല വീണു.
കമ്മറ്റി അംഗങ്ങളായ ജെയ്സൺ,ജിബിൻ,പ്രദീപ്,ടെൽസ്,ജെസ്ന,എയ്ഞ്ചൽ,ജിജി,വിനയ എന്നിവർ പരിപാടികൾക്ക് നേതൃത്വം നൽകി.
2026/27 വർഷത്തെ കമ്മറ്റി അംഗങ്ങളായി ജോബി മാനുവൽ, അനീഷ് പോൾ, ജിബിൻ ദേവസ്സി, മാർക്ക് ആന്റണി, പല്ലവി സുബി, നിത്യ മരിയ ജോൺ, ജിഷ മാത്യു, ദീപ്തി ശ്രീരാഗ് എന്നിവർ തെരഞ്ഞെടുക്കപ്പെട്ടു.
വാർത്ത: ജോബി മാനുവൽ.
Rose Malayalam Updates
അയർലണ്ട് വാർത്തകൾ ഉടൻ ലഭിക്കുവാൻ ഞങ്ങളുടെ വാട്സാപ്പ് ഗ്രൂപ്പിൽ അംഗമാകൂ.
JOIN GROUP NOW
Comments