അയര്‍ലണ്ടിലെ HSE ചീഫ് മെഡിക്കല്‍ ഓഫിസറായ പ്രൊഫ. ബ്രെന്‍ഡ സ്മിത്ത് സ്ഥാനമൊഴിയുന്നു. റോയല്‍ കോളജ് ഓഫ് സര്‍ജന്‍സ് അയര്‍ലണ്ടില്‍ (RCSI) പ്രൊഫസറായി നിയമിതയാകുന്നതോടെയാണ് ചീഫ് മെഡിക്കല്‍ ഓഫിസര്‍ സ്ഥാനം ഏറ്റെടുത്ത് 18 മാസത്തിന് ശേഷം സ്മിത്ത് പടിയിറങ്ങുന്നത്.
2022-ല്‍ ഡോ. ടോണി ഹോലഹാന്‍ സ്ഥാനമൊഴിഞ്ഞതിനെത്തുടര്‍ന്ന് HSE ഇടക്കാല മേധാവിയായി സേവനമനുഷ്ഠിച്ച സ്മിത്ത്, അതേ വര്‍ഷം ഒക്ടോബറിലാണ് ചീഫ് മെഡിക്കല്‍ ഓഫിസറായി സ്ഥാനമേല്‍ക്കുന്നത്. ഇതിന് മുമ്പ് യൂണിവേഴ്‌സിറ്റി ഓഫ് ഗോള്‍വേ-യില്‍ പബ്ലിക് ഹെല്‍ത്ത് മെഡിസിന്‍ പ്രൊഫസറായും, HSE West-ല്‍ പബ്ലിക് ഹെല്‍ത്ത് കണ്‍സള്‍ട്ടന്റായും ജോലി ചെയ്തിരുന്നു.
കോവിഡ് കാലത്ത് National Public Health Emergency Team (Nphet) അംഗമായും, വിദഗ്ദ്ധ ഉപദേശക സമിതി അംഗമായും പ്രവര്‍ത്തിച്ച സമിത്ത്, ആന്റിജന്‍ ടെസ്റ്റുകളുടെ മേല്‍നോട്ടവും നിര്‍വ്വഹിച്ചിരുന്നു.
കോവിഡിന് ശേഷം നിരവധി മുതിര്‍ന്ന ഉദ്യോഗസ്ഥരാണ് HSE-യില്‍ നിന്നും രാജിവച്ച് മറ്റ് ജോലികളിലേയ്ക്ക് തിരിഞ്ഞത്. കോവിഡ് പ്രതിരോധത്തില്‍ വലിയ പങ്കുവഹിച്ച ഡെപ്യൂട്ടി ചീഫ് മെഡിക്കല്‍ ഓഫിസറായ ഡോ. റൊണാന്‍ ഗ്ലിന്‍ 2022-ല്‍ രാജിവച്ച് സ്വകാര്യ മേഖലയില്‍ ജോലി ചെയ്യാനാരംഭിച്ചിരുന്നു. മുന്‍ ചീഫ് മെഡിക്കല്‍ ഓഫിസര്‍ ഡോ. ടോണി ഹോലഹാന്‍ ഡബ്ലിന്‍ ട്രിനിറ്റി കോളജില്‍ പ്രൊഫസറായും ജോലിയാരംഭിച്ചു.
