സർക്കാരിനുള്ളിൽ പുകച്ചിൽ തുടങ്ങി; മന്ത്രി മൈക്കൽ ഹീലി-റേ രാജിവെച്ചു, അവിശ്വാസ പ്രമേയത്തെ പിന്തുണയ്ക്കും

ഇന്ധന പ്രതിഷേധങ്ങൾ കൈകാര്യം ചെയ്ത രീതിയെച്ചൊല്ലി സർക്കാരിൽ നിന്നുള്ള ജൂനിയർ മന്ത്രിയായ മൈക്കൽ ഹീലി-റേ രാജി വെച്ചു.
ഫിയന ഫാൾ, ഫിനഗേൽ എന്നിവരുമായി ചേർന്ന് സഖ്യസർക്കാർ രൂപീകരിക്കുന്നതിനെ പിന്തുണച്ച നിരവധി സ്വതന്ത്ര ടിഡിമാരിൽ ഒരാളായ ഹീലി-റേ, ഇന്ധന പ്രതിസന്ധിയുമായി ബന്ധപ്പെട്ട അവിശ്വാസ പ്രമേയത്തിൽ സർക്കാരിനെതിരെ വോട്ട് ചെയ്യുമെന്നും വ്യക്തമാക്കിയിട്ടുണ്ട്.

കൃഷി വകുപ്പിന് കീഴിലുള്ള വനം, ഫാം സേഫ്റ്റി, ഹോർട്ടികൾച്ചർ എന്നിവയുടെ ചുമതലയുള്ള സഹമന്ത്രി സ്ഥാനമാണ് ഹീലി-റേയ്ക്ക് ഉണ്ടായിരുന്നത്. കെറിയിൽ നിന്നുള്ള സ്വതന്ത്ര ടിഡിമാരായ അദ്ദേഹവും സഹോദരൻ ഡാനി ഹീലി-റേയും സർക്കാർ രൂപീകരണത്തെ പിന്തുണച്ചിരുന്നു.

തന്റെ കുടുംബാംഗങ്ങൾക്കും സുഹൃത്തുക്കൾക്കും മണ്ഡലത്തിലെ പ്രവർത്തകർക്കും നന്ദി പറഞ്ഞുകൊണ്ട്, പ്രതിഷേധക്കാരുടെയും വോട്ടർമാരുടെയും വാക്കുകൾ താൻ കേട്ടുവെന്ന് ഹീലി-റേ പറഞ്ഞു.

“റോഡരികിൽ ആളുകളെ കാണുമ്പോൾ, മുതിർന്ന പുരുഷന്മാർ കരയുന്നത് കണ്ടപ്പോൾ, ട്രാക്ടർ തൊഴിലാളികളെയും ലോറി തൊഴിലാളികളെയും കർഷകരെയും കണ്ടുമുട്ടിയപ്പോൾ അവർ എത്രമാത്രം അസന്തുഷ്ടരാണെന്ന് എന്നോട് പറഞ്ഞപ്പോൾ, രാജ്യത്തിന്റെ നേതാവ് [പ്രധാനമന്ത്രി] അത് ശ്രദ്ധിക്കേണ്ടതായിരുന്നു.” അദ്ദേഹം പറഞ്ഞു.

“ഈ സർക്കാർ അയർലണ്ടിലെ ജനങ്ങളെ കൈവിട്ടുവെന്ന് ഞാൻ വിശ്വസിക്കുന്നതിനാൽ, രാജ്യത്തിന്റെ നേതാവിൽ അവിശ്വാസം രേഖപ്പെടുത്തി ഞാൻ വോട്ട് ചെയ്യും, ഇപ്പോൾ മുതൽ സ്റ്റേറ്റ് മിനിസ്റ്റർ സ്ഥാനത്തുനിന്നുള്ള എന്റെ രാജി ഇപ്പോൾ സമർപ്പിക്കുന്നു.” അദ്ദേഹം പാർലമെന്റിൽ വ്യക്തമാക്കി.

“ഭാവി സർക്കാരുകളോടും ഈ സർക്കാരിനോടും അവർ ജനങ്ങളെ ശ്രദ്ധിക്കണമെന്നും, ദയ കാണിക്കണമെന്നും, മനസ്സിലാക്കണമെന്നും ഞാൻ അഭ്യർത്ഥിക്കുന്നു.” ഹീലി റേ കൂട്ടിച്ചേർത്തു.