ഇൻഫർമേഷൻ ആൻഡ് പബ്ലിക് റിലേഷൻസ് വകുപ്പിന്‍റെ ഇന്റർനെറ്റ് റേഡിയോ കേരള, മുഖ്യമന്ത്രി പിണറായി വിജയൻ ചൊവ്വാഴ്ച വൈകുന്നേരം ആറിന് തിരുവനന്തപുരം മാസ്‌കറ്റ് ഹോട്ടലിൽ വെച്ച് ഉദ്ഘാടനം ചെയ്തു. ലോക മലയാളികൾക്ക് കേരളത്തിന്‍റെ ഭാഷ, സംസ്‌കാരം, സാഹിത്യം, സംസ്ഥാനത്ത് പ്രതിദിനമുണ്ടാകുന്ന മാറ്റങ്ങൾ തുടങ്ങിയവ നിരന്തരം ലഭ്യമാക്കുക എന്ന ലക്ഷ്യത്തോടെയാണ് സർക്കാർ റേഡിയോ കേരള തുടങ്ങുന്നത്.
പുതുമയുള്ള അൻപതോളം പരിപാടികളാണ് റേഡിയോ കേരളയിലൂടെ ശ്രോതാക്കൾക്ക് മുന്നിലെത്തുക. ഓരോ മണിക്കൂറിലും വാർത്തകളുമുണ്ട്. https://radio.kerala.gov.in/ ൽ ഓൺലൈനായി റേഡിയോ പരിപാടികൾ കേൾക്കാം.
വി.കെ. പ്രശാന്ത് എം.എൽ.എയുടെ അധ്യക്ഷതയിൽ ചേരുന്ന യോഗത്തിൽ മുഖ്യമന്ത്രി റേഡിയോ മുദ്രാഗാനം പ്രകാശനം ചെയ്തു.
പ്രഭാവർമ്മ എഴുതിയ ഗാനത്തിന് സംഗീത സംവിധായകൻ ഔസേപ്പച്ചനാണ് സംഗീതം നിർവഹിച്ചിരിക്കുന്നത്. പി.ആർ.ഡി പുറത്തിറക്കുന്ന സർക്കാർ ധനസഹായ പദ്ധതികൾ പുസ്തകത്തിന്‍റെ പുതിയ പതിപ്പിന്‍റെ വിതരണോദ്ഘാടനവും മുഖ്യമന്ത്രി നിർവഹിച്ചു. പുസ്തകത്തിന്‍റെ കവർചിത്രം വരച്ച ഭിന്നശേഷി ചിത്രകാരി നൂർ ജലീലയ്ക്ക് മുഖ്യമന്ത്രി ഉപഹാരം സമ്മാനിച്ചു. പി.ആർ.ഡിയുടെ നവീകരിച്ച ന്യൂസ്പോർട്ടൽ ഉദ്ഘാടനം മന്ത്രി കടകംപള്ളി സുരേന്ദ്രൻ നിർവഹിച്ചു.
