അയര്ലണ്ടിലെ പുതുതായി വീട് വാടകയ്ക്ക് എടുക്കുന്നവര് വീട്ടുവാടകയായി നല്കേണ്ട തുക ശരാശരി 1,598 യൂറോ ആയി ഉയര്ന്നു. അതേസമയം നേരത്തെ തന്നെ വാടകക്കാരായി തുടരുന്നവര് നല്കുന്നത് ശരാശരി 1,357 യൂറോ ആണെന്നും 2023-ലെ മൂന്നാം പാദത്തിലുള്ള വിവരങ്ങള് അടിസ്ഥാനമാക്കി Residential Tenancies Board (RTB) പ്രസിദ്ധീകരിച്ച റിപ്പോര്ട്ടില് വ്യക്തമാക്കുന്നു.
പുതുതായി വീട് വാടകയ്ക്ക് എടുക്കുമ്പോഴുള്ള ശരാശരി നിരക്ക് ഒരു വര്ഷത്തിനിടെ 11% വര്ദ്ധിച്ചതായാണ് റിപ്പോര്ട്ട് പറയുന്നത്. നിലവിലെ വാടകക്കാരുടെ വാടകനിരക്ക് 12 മാസത്തിനിടെ 5.2% ആണ് വര്ദ്ധിച്ചത്.
പ്രാദേശികമായ കണക്കുകള് പരിശോധിച്ചാല് ഡബ്ലിനില് പുതുതായി വാടകയ്ക്ക് വീടെടുക്കുകയാണെങ്കില് ശരാശരി 2,113 യൂറോയാണ് നല്കേണ്ടത്. അതേസമയം നിലവിലെ വാടകക്കാര് നല്കുന്നത് 1,788 യൂറോയാണ്. അതായത് 325 യൂറോയുടെ വ്യത്യാസം (18.2%).
2023-ന്റെ മൂന്നാം പാദത്തില് പുതുതായി 14,000 പേരാണ് വാടകക്കാരായി രജിസ്റ്റര് ചെയ്തത്. രണ്ടാം പാദത്തില് ഇത് 11,789 ആയിരുന്നു. അതേസമയം 2022 മൂന്നാം പാദത്തെക്കാള് 37.7% കുറവുമാണിത്.
ഡബ്ലിനില് പുതുതായി വാടകയ്ക്ക് എത്തുന്നവരുടെ വാര്ഷിക വര്ദ്ധന റെക്കോര്ഡിലെത്തിയതായും കണക്കുകള് വ്യക്തമാക്കുന്നു. ഒരു വര്ഷത്തിനിടെ 12.7% ആണ് ഡബ്ലിനില് പുതിയ വാടകക്കാരുടെ എണ്ണം വര്ദ്ധിച്ചത്.
രാജ്യത്ത് ഏറ്റവും കുറഞ്ഞ നിരക്കില് പുതിയ വാടകക്കാര്ക്ക് വീട് ലഭിക്കുന്നത് Leitrim-ലാണ്. മാസം ശരാശരി 853 യൂറോയാണ് ഇവിടുത്തെ വാടക നിരക്ക്.