അയർലണ്ടിലെ പണപ്പെരുപ്പം രണ്ട് വർഷത്തിനിടെയുള്ള ഏറ്റവും ഉയർന്ന നിലയിൽ; പ്രധാന കാരണം ഊർജ്ജ ഉൽപ്പന്നങ്ങളുടെ വിലക്കയറ്റം

അയർലണ്ടിലെ പണപ്പെരുപ്പം രണ്ട് വർഷത്തിനിടെയുള്ള ഏറ്റവും ഉയർന്ന നിലയിൽ എന്ന് റിപ്പോർട്ട്‌. സെൻട്രൽ സ്റ്റാറ്റിസ്റ്റിക്സ് ഓഫീസ് (CSO) പുറത്തുവിട്ട ഏറ്റവും പുതിയ റിപ്പോർട്ട്‌ പ്രകാരം 2026 ഏപ്രിൽ വരെയുള്ള ഒരു വർഷത്തെ കണക്കെടുത്താൽ പണപ്പെരുപ്പം 3.7% ആണ്. 2026 മാർച്ച്‌ വരെയുള്ള ഒരു വർഷത്തിനിടെ ഇത് 3.6% ആയിരുന്നു. ജനുവരി 2024-നു ശേഷം പണപ്പെരുപ്പം ഇത്രയും ഉയരുന്നതും ആദ്യമായാണ്. അന്ന് 4.1% ആണ് പണപ്പെരുപ്പം രേഖപ്പെടുത്തിയത്.

ഹോം ഹീറ്റിംഗ് ഓയിൽ അടക്കമുള്ള ഊർജ്ജോൽപ്പന്നങ്ങളുടെ വിലക്കയറ്റമാണ് രാജ്യത്ത് പണപ്പെരുപ്പം വർദ്ധിക്കാൻ കാരണമായിരിക്കുന്നത്. ഹീറ്റിംഗ് ഓയിലിന് ഒരു വർഷത്തിനിടെ 80% ആണ് വില വർദ്ധിച്ചത്. 2025 ഏപ്രിലിനെ അപേക്ഷിച്ച് ഈ ഏപ്രിലിൽ ഡീസൽ വില 26.1% വർദ്ധിച്ച് ലിറ്ററിന് 2.17 യൂറോയും ആയി.

ഇക്കഴിഞ്ഞ 12 മാസത്തിനിടെ ഏറ്റവും കൂടുതൽ വില വർദ്ധിച്ചത് വിദ്യാഭ്യാസ സേവനങ്ങൾ (8.9% വിലവർദ്ധന), ഹൗസിങ്, വെള്ളം, വൈദ്യുതി, ഗ്യാസ്, മറ്റ് ഇന്ധനങ്ങൾ (8.1%), വസ്ത്രങ്ങൾ, ചെരുപ്പുകൾ (7.9%) എന്നിവയ്ക്കാണ് എന്നും റിപ്പോർട്ട്‌ വ്യക്തമാക്കുന്നു.

Furnishings, Household Equipment & Routine Household Maintenance എന്നിവയ്ക്ക് മാത്രമാണ് ഒരു വർഷത്തിനിടയിൽ വില കുറഞ്ഞത് (0.6%).

2026 മാർച്ചിനെ അപേക്ഷിച്ച് ഏപ്രിലിൽ ഇൻഫർമേഷൻ ആൻഡ് കമ്മ്യൂണിക്കേഷന് 1.6%, ഹൗസിങ്, വെള്ളം, വൈദ്യുതി, ഗ്യാസ്, മറ്റ് ഇന്ധനങ്ങൾ എന്നിവയ്ക്ക് 1.1% എന്നിങ്ങനെയും വില കൂടിയിട്ടുണ്ട്.