ആയിരക്കണക്കിന് പേർ പങ്കെടുത്ത അന്തർദേശീയ ഗണിതശാസ്ത്ര മത്സരത്തിലെ 13 വിജയികളിൽ ഒരാളായി മലയാളിയായ അദ്വൈത് ജയേഷ്

ഒൻപതാമത് ആന്വൽ മാത്‍സ് ഒളിംപ്യാർഡിലെ 13 വിജയികളിൽ ഒരാളായി മലയാളിയായ അദ്വൈത് ജയേഷ്. ആയിരക്കണക്കിന് പേർ പങ്കെടുത്ത അന്തർദേശീയ ഗണിതശാസ്ത്ര മത്സരത്തിലാണ് നീന കമ്മ്യൂണിറ്റി നാഷണൽ സ്കൂൾ വിദ്യാർത്ഥിയായ അദ്വൈത് ഈ വമ്പൻ വിജയം കരസ്ഥമാക്കിയിരിക്കുന്നത്. അദ്വൈത്തിന്റെ വിജയത്തിനുള്ള എല്ലാ ക്രെഡിറ്റും അവന്റെ അദ്ധ്യാപകർക്ക് അവകാശപ്പെട്ടതാണെന്നാണ് പിതാവ് നടരാജൻ പറയുന്നത്.

British Youth International College (BYITC) ആണ് മാർച്ച്‌ 19 മുതൽ 26 വരെ എട്ട് ദിവസം നീണ്ടുനിന്ന ഈ ഓൺലൈൻ മത്സരം നടത്തിയത്. ഒരു മണിക്കൂറിൽ 50 ചോദ്യങ്ങൾക്ക് ഉത്തരം നൽകുന്നതായിരുന്നു മത്സര രീതി.

നാല് മുതൽ 14 വരെ പ്രായക്കാരായ ആയിരക്കണക്കിന് പേരാണ് ഇത്തവണത്തെ ആഗോള ഗണിതശാസ്ത്ര മത്സരത്തിന് എത്തിയിരുന്നത്. മത്സരത്തിൽ ജോയിന്റ് ലെവൽ 6 വിജയിയായി അദ്വൈത് മാറി. Mullingar സ്വദേശിയായ Kayden Temah Denhere മാത്രമാണ് അയർലണ്ടിൽ നിന്നും മത്സരത്തിൽ വിജയിച്ച മറ്റൊരാൾ.