29 വര്‍ഷമായി തമ്മില്‍ അറിയുന്നവരാണ്. ഒരാള്‍ക്ക് വയസ് 85 ആയി. പ്രണയമല്ല, സൗഹൃദമാണ് ഇരുവര്‍ക്കും ഇടയിലുള്ളത്. എങ്കിലും പരസ്പരം വിവാഹിതരാകാന്‍ അവര്‍ തീരുമാനിച്ചു. ഇതിന് പിന്നില്‍ ഒന്നേയുള്ളൂ ലക്ഷ്യം — സര്‍ക്കാരിന് കൊടുക്കേണ്ട കനപ്പെട്ട ഒരു നികുതി ലാഭിക്കുക.
അയര്‍ലണ്ടിലെ ടിപ്പററിയില്‍ നിന്നാണ് ഈ വ്യത്യസ്ത കല്യാണ വാര്‍ത്ത. 85 വയസുകാരനായ മാറ്റ് എന്നയാളും അയാളെക്കാള്‍ പ്രായം കുറഞ്ഞ മൈക്കിളും അയല്‍ക്കാരാണ്. വാര്‍ധക്യത്തില്‍ മാറ്റിന്റെ സംരക്ഷകനും മൈക്കിളാണ്. മാറ്റിന്റെ കാലം കഴിയുമ്പോള്‍ അദ്ദേഹത്തിന്റെ സ്വന്തം വീട് കൈമാറാന്‍ മൈക്കിള്‍ അല്ലാതെ മറ്റാരുമില്ല. യാതൊരു ബന്ധുത്വവും ഇല്ലാത്ത ഒരാള്‍ക്ക് വീട് കൈമാറിയാല്‍, അയര്‍ലണ്ടിലെ നിയമം അനുസരിച്ച് വീടിന്റെ 33 ശതമാനത്തോളം ഉടമ നികുതി ഒടുക്കേണ്ടതായി വരും. ഇത് ഒഴിവാക്കാന്‍ മാറ്റ് കണ്ടെത്തിയ ഒരേയൊരു വഴിയാണ് വിവാഹം. സ്വവര്‍ഗ വിവാഹങ്ങള്‍ക്ക് അനുമതിയുള്ള രാജ്യമാണ് അയര്‍ലണ്ട്. അതുകൊണ്ട് രണ്ടുപേരുടെയും വിവാഹത്തിന് നിയമതടസവുമില്ല.
കാലാവസ്ഥ നന്നായാല്‍ ഈ മാസം 22ന്, ക്രിസ്തുമസ് ആഘോഷിക്കും മുന്‍പ് തങ്ങളുടെ വിവാഹം നടക്കുമെന്ന് ദമ്പതികള്‍ അയര്‍ലണ്ടിലെ ഔദ്യോഗിക റേഡിയോ ചാനലായ ആര്‍ടിഇ യോട് പറഞ്ഞു. തണുപ്പ്കാലം കലശലായാല്‍ വിവാഹം ജനുവരിയിലേക്ക് മാറ്റുമെന്നും ഇരുവരും പറഞ്ഞു.
‘മാറ്റിനെ എനിക്ക് ഇഷ്ടമാണ്. പക്ഷേ, ലൈംഗികമായ താല്‍പര്യമല്ല ഞങ്ങള്‍ തമ്മില്‍’ മൈക്കിള്‍ ചാനലിനോട് പറഞ്ഞു. ‘എന്റെ ജീവിതത്തിന്റെ ഒരു ഭാഗം തന്നെയാണ് ഇപ്പോള്‍ മൈക്കിള്‍. ഞാന്‍ മരിക്കുമ്പോള്‍ എന്റെ വീട് അയാള്‍ക്ക് നല്‍കണമെന്ന് ആഗ്രഹിക്കുന്നു’ മാറ്റിന്റെ മറുപടി
മുന്‍പത്തെ രണ്ട് വിവാഹ ബന്ധങ്ങളില്‍ രണ്ട് പെണ്‍മക്കളും ഒരു ആണ്‍കുട്ടിയും മൈക്കിളിനുണ്ട്. മക്കള്‍ക്കെല്ലാം മാറ്റിനെ നന്നായി അറിയാമെന്നും അവരാരും വിവാഹത്തെ എതിര്‍ക്കുന്നില്ലെന്നും മൈക്കിള്‍ പറയുന്നു. വിവാഹത്തിന് ശേഷം വേറെ ഏത് സ്ത്രീയെ വേണമെങ്കിലും മൈക്കിളിന് പ്രണയിക്കാം എന്നതാണ് മാറ്റിന്റെയും നിലപാട്. ഇനി മറ്റാരെയെങ്കിലും വിവാഹം ചെയ്യുമ്പോള്‍ ഒരു പുരുഷനെ വിവാഹം കഴിച്ചയാളാണെന്നത് മൈക്കിള്‍ വെളിപ്പെടുത്തുമോ എന്നചോദ്യത്തിന് ‘തീര്‍ച്ചയായും. അത് ഞാന്‍ പറയും’ എന്നാണ് മറുപടി.
എ എം
