പ്രസിഡന്റ് ഡോണള്ഡ് ട്രമ്പ് രണ്ടാമത് തവണയും വിജയിച്ചേക്കുമെന്ന ചിന്ത അമേരിക്കക്കാരില് ശക്തിപ്പെടുകയാണ്. അതേ സമയം ട്രമ്പിനെ പരാജയപ്പെടുത്തുന്നതിനായി ഡെമോക്രാറ്റിക് പക്ഷത്ത് അണിനിരക്കുന്ന ഒട്ടേറെ സ്ഥാനാര്ത്ഥികളില് ജോ ബൈഡനാണ് മുന്നില്. എസ്എസ്ആര്എസ് നടത്തിയ സിഎന്എന് അഭിപ്രായ സര്വേയിലാണ് ഈ വിവരങ്ങള് കണ്ടെത്തിയത്. പ്രസിഡന്റ് ട്രമ്പ് രണ്ടാമതൊരുവട്ടം വിജയിക്കുമോ എന്ന കാര്യത്തില് ജനങ്ങള്ക്കിടയില് അഭിപ്രായ ഭിന്നത ശക്തമാണ്. വിജയിക്കുമെന്ന് 46% പറയുന്നു. വിജയിക്കില്ലെന്ന് 47%വും. എന്നാല് ട്രമ്പിനെ സംബന്ധിച്ചിടത്തോളം ഇത് വലിയൊരു മുന്നേറ്റമാണ്. മാര്ച്ചില് നടത്തിയ സര്വേയില് പങ്കെടുത്ത 54% പേരും പറഞ്ഞത് വീണ്ടും മത്സരിച്ചാല് ട്രമ്പ് പരാജയപ്പെടുമെന്നാണ്. ഇതില് വന് കുറവാണ് ഇപ്പോള് ഉണ്ടായിരിക്കുന്നത്.
ട്രമ്പിന് വിജയസാധ്യത കല്പ്പിക്കുന്നവരുടെ എണ്ണം വര്ധിക്കുന്നത് കക്ഷിരാഷ്ട്രീയ വ്യത്യാസത്തിന് അതീതമായിട്ടാണ്. പുരുഷന്മാര്ക്കിടയില് ട്രമ്പിന് വിജയസാധ്യത കല്പ്പിക്കുന്നവര് 8% വര്ദ്ധിച്ചപ്പോള് സ്വതന്ത്ര നിലപാടുകാര്ക്കിടയില് മാര്ച്ചിലെ 39% ഇപ്പോള് 47%മായി ഉയര്ന്നു. നവംബറില് നടക്കുന്ന ഇടക്കാല തെരെഞ്ഞെടുപ്പില് പങ്കെടുക്കുന്നതിനുള്ള ആവേശവും വര്ദ്ധിച്ചിട്ടുണ്ട്. വോട്ടു ചെയ്യുമെന്ന് മാര്ച്ചില് പറഞ്ഞവര് 37%മായിരുന്നു. ഇപ്പോള് 46% മായി. 2020ലും ട്രമ്പ് തന്നെയായിരിക്കണം പാര്ട്ടി സ്ഥാനാര്ത്ഥിയെന്നാണ് റിപ്പബ്ലിക്കന്മാരും റിപ്പബ്ലിക്കന് അനുഭാവികളുമായ 74% പേരും പറയുന്നത്. 21% റിപ്പബ്ലിക്കന്മാര് മാത്രമേ മറ്റേതെങ്കിലും സ്ഥാനാര്ത്ഥിയെ അനുകൂലിക്കുന്നുള്ളു.
ട്രമ്പിനെ നേരിടുന്നതിനുള്ള ഡെമോക്രാറ്റിക് നോമിനേഷനായി രംഗത്തുള്ളവരില് മുന് വൈസ് പ്രസിഡന്റ് ജോ ബൈഡന്തന്നെയാണ് ശക്തന്. സ്ഥാനാര്ത്ഥികളാകാന് സാധ്യതയുള്ള 16 പേരില് ആരെയാണ് അനുകൂലിക്കുന്നതെന്ന് ഡെമോക്രാറ്റിക് അംഗങ്ങളോടും അനുഭാവികളോടും ചോദിച്ചപ്പോള് 33% പിന്തുണയുമായി ബൈഡന് മുന്നിലാണ്. 2016ലെ റണ്ണറപ്പും വെര്മോണ്ടിലെ സെനറ്ററുമായ ബേര്ണി സാന്ഡേഴ്സ് 13%വുമായി രണ്ടാം സ്ഥാനത്താണ്. കാലിഫോര്ണിയയിലെ സെനറ്റര് കമലാ ഹാരിസിന് 9% ത്തിന്റെയും മസാച്യുസെറ്റ്സ് സെനറ്റര് എലിസബത്ത് വാറന് 8% ത്തിന്റെയും പിന്തുണയുണ്ട്. ന്യൂ ജേഴ്സിയില് സെനറ്റര് കോറി ബുക്കര് 2004ലെ ഡെമോക്രാറ്റിക് സ്ഥാനാര്ത്ഥി ജോണ് കെറി എന്നിവര് 5% വീതവും പിന്തുണ നേടി.
അടുത്തിടെ രജിസ്റ്റേഡ് ഡെമോക്രാറ്റ് ആയി മാറിയ ന്യൂയോര്ക് മേയര് മൈക്കല് ബ്ലൂംബെര്ഗ് 4% പിന്തുണ നേടിയപ്പോള് അത്രയുംതന്നെ പിന്തുണ ടെക്സാസിലെ ഹൗസ് പ്രതിനിധി ബെറ്റോ ഒ റൂര്ക്കുമുണ്ട്. ഇതിനകം സ്ഥാനാര്ത്ഥിത്വം പ്രഖ്യാപിച്ച് രംഗത്തുവന്ന ഏക ആളായ മരിലാന്ഡിലെ ഹൗസ് പ്രതിനിധി ജോണ് ഡൊയ്നിക്ക് ഒരു ശതമാനം പിന്തുണയാണ് ലഭിച്ചത്. 2016ലെ അതേ നിലപാടുകളുമായാണ് സാന്ഡേഴ്സ് രംഗത്തുവരുന്നത്. എന്നാല് അതിനു പ്രഖ്യാപിത ഡെമോക്രറ്റുകള്ക്കും മുതിര്ന്നവര്ക്കുമിടയില് പിന്തുണ കുറവാണ്.
പ്രഖ്യാപിത ഡെമോക്രറ്റുകള് 34% ബൈഡനെ പിന്തുണയ്ക്കുന്നു. 11% ഹാരിസിനെയും 9% സാന്ഡേഴ്സിനെയും 8% വാറനെയും പിന്തുണക്കുന്നു. എന്നാല് ഡെമോക്രാറ്റിക് ചായ്വുള്ള സ്വതന്ത്രര്ക്കിടയില് 21% പിന്തുണയുമായി സാന്ഡേഴ്സ് 31% പിന്തുണയുള്ള ബൈഡണ് പിന്നിലുണ്ട്. വാറന് 8%, ഹാരിസ്7% എന്നിങ്ങനെയാണ് മറ്റുള്ളവരുടെ സ്ഥിതി. ഡെമോക്രാറ്റിക് കക്ഷിക്കാര്ക്കിടയില് സാന്ഡേഴ്സ് നേരിടുന്ന വെല്ലുവിളിയുടെ വലിയ ഗുണഭോക്താവ് ഹാരിസാണ്. ലിബറുകളായി കരുതുന്ന പ്രഖ്യാപിത ഡെമോക്രറ്റുകള്ക്കിടയില് ഹാരിസിന്റെ പിന്തുണ 19%മായി ഉയര്ന്നു. 27%മുള്ള ബൈഡണ് പിന്നിലാണെങ്കിലും സാന്ഡേഴ്സിനേക്കാള് മുന്നിലാണ്. അവിടെ 7% മാത്രമേ സാണ്ടേഴ്സിനെ പിന്തുണയ്ക്കുന്നുള്ളു. ഒക്ടോബര് 4 നും 7 നും മദ്ധ്യേയായിരുന്നു സര്വേ.
എ എം