പണം മോഹിച്ച് 48 കാരിയെ 25 കാരന്‍ വിവാഹം കഴിച്ചെന്ന അധിക്ഷേപം സോഷ്യല്‍ മീഡിയയില്‍ നിറയാന്‍ തുടങ്ങിയിട്ട് കുറച്ചുദിവസങ്ങളായി. ഒരു പത്രത്തില്‍ നല്‍കിയ വിവാഹ ആശംസകള്‍ അര്‍പ്പിച്ചുകൊണ്ടുള്ള പരസ്യമാണ് കപടസദാചാരക്കാര്‍ ഭാവനക്കനുസരിച്ചുള്ള ആക്ഷേപങ്ങള്‍കൊണ്ട് നിറയ്ക്കുന്നത്. കണ്ണൂര്‍ ചെറുപുഴ സ്വദേശികളായ പി അനൂപ് സെബാസ്റ്റ്യന്റേയും ജൂബി ജോസഫിന്റേയും വിവാഹ പരസ്യമാണ് സാമൂഹ മാധ്യമങ്ങളില്‍ ചിലര്‍ പരിഹസിച്ചുകൊണ്ടിരിക്കുന്നത്.
എന്നാല്‍ തങ്ങളുടെ രൂപം അളന്ന് വ്യാജ പ്രചാരണം നടത്തിയവര്‍ക്കെതിരെ നിയമനടപടിക്കൊരുങ്ങുകയാണ് നവ ദമ്പതികളായ അനൂപും ജൂബിയും. ഒരാളുടെ രൂപത്തെ പരിഹസിക്കുന്ന സര്‍വസാധരാണമായ ശീലത്തിന്റെ മറ്റൊരു ഉദാഹരണമാണിതെന്ന് യാഥാസ്ഥിതികരല്ലാത്ത വലിയ വിഭാഗത്തിന്റെ നിലപാട്. ഇരുവര്‍ക്കും പിന്തുണയുമായി നിരവധി പേരാണ് സോഷ്യല്‍മീഡിയയില്‍ മുന്നോട്ടുവരുന്നത്.
15 കോടി ആസ്തിയുള്ള 48 കാരിയെ സമ്പത്തിനുവേണ്ടി 25 കാരന്‍ വിവാഹംകഴിച്ചു എന്നാണ് ഷെയര്‍ ചെയ്യപ്പെടുന്ന പോസ്റ്റ്. ‘ഞങ്ങള്‍ക്ക് പ്രായം 28 ആയാലും 48 ആയാലും നിങ്ങള്‍ക്കെന്താ കപട സദാചാരക്കാരെ?. ഇന്ത്യയില്‍ വിവാഹം കഴിക്കാന്‍ സ്ത്രീകള്‍ക്ക് 18ഉം പുരുഷന്മാര്‍ക്ക് 21ഉം വയസ്സ് തികഞ്ഞാല്‍മതി. ഏറെ ആഗ്രഹിച്ച വിവാഹത്തിന്റെ സന്തോഷം കെടുത്തിക്കളയുന്ന രീതിയില്‍ വ്യാജ പ്രചരണം നടത്തിയവരെ വെറുതെവിടുമെന്ന് കരുതരുത്’. അനൂപ് പറയുന്നു.
കോളേജില്‍ പഠിക്കുമ്പോള്‍ ആരംഭിച്ച പ്രണയമാണ് അനൂപിന്റെയും ജൂബിയുടെയും. അനൂപിന് ഇപ്പോള്‍ 29ഉം ജൂബിക്ക് 27ഉം ആണ് പ്രായം. പഞ്ചാബില്‍ എയര്‍പോര്‍ട്ട് ജീവനക്കാരനാണ് അനൂപ്. ടൂറിസത്തില്‍ ഒന്നാം റാങ്കോടെ ബിരുദാനന്തര ബിരുദം നേടിയ ജൂബിയും എയര്‍പോര്‍ട്ട് ജീവനക്കാരിയാണ്. ഫെബ്രുവരി നാലിനായിരുന്നു ഇരുവരുടെയും വിവാഹം
