അയര്ലണ്ടില് കഴിഞ്ഞ ഒരു വര്ഷത്തിനിടെ ഭവനവില വര്ദ്ധിച്ചത് 14.8%. 2021 ജനുവരി മുതല് 2022 ജനുവരി വരെയുള്ള ഭവനവില അടിസ്ഥാനമാക്കി Central Statistics Office (CSO) കഴിഞ്ഞ ദിവസം പുറത്തുവിട്ട റിപ്പോര്ട്ടിലാണ് ഇക്കാര്യം വ്യക്തമാക്കുന്നത്.
ഡബ്ലിന് പ്രദേശത്തെ മാത്രമായി പരിഗണിക്കുമ്പോള് 13.3% ആണ് വര്ദ്ധന. അതേസമയം ഡബ്ലിന് പുറത്ത് ശരാശരി വില വര്ദ്ധന 16% ആണ്.
ഈ 12 മാസത്തിനിടെ രാജ്യത്ത് വില്ക്കപ്പെട്ട വീടുകളുടെ ശരാശരി വില 280,000 യൂറോ ആണ്. ഏറ്റവും കുറഞ്ഞ ശരാശരി വില ലോങ്ഫോര്ഡിലാണ്- 130,000 യൂറോ. ഏറ്റവും കൂടിയ ശരാശരി വില ഡബ്ലിനിലെ Dún Laoghaire-Rathdown-ലും- 595,000 യൂറോ.
2021 ഡിസംബറിനെ അപേക്ഷിച്ച് ഒരു മാസത്തിനിടെ 0.9% വില വീടുകള്ക്ക് വര്ദ്ധിച്ചതായും റിപ്പോര്ട്ടില് പറയുന്നു.
ഏതാനും നാളത്തെ പ്രവണത തുടര്ന്നുകൊണ്ട്, രാജ്യത്തിന്റെ അതിര്ത്തി പ്രദേശങ്ങളില് ഭവനവില വര്ദ്ധന കുതിക്കുകയാണ്. ഒരു വര്ഷത്തിനിടെ 24.7% ആണ് ഇവിടെ വില വര്ദ്ധിച്ചത്. പിന്നാലെ ഏറ്റവുമധികം വില വര്ദ്ധന സംഭവിച്ചിരിക്കുന്നത് തെക്ക്-കിഴക്കന് പ്രദേശങ്ങളിലാണ്- 18.8%. മധ്യമേഖലയില് 18% ആണ് വില വര്ദ്ധന.
അപ്പാര്ട്ട്മെന്റുകളുടെ കാര്യമെടുത്താല് ഡബ്ലിന് ഒഴികെ ദേശീയ തലത്തില് ശരാശരി 17.5% വില വര്ദ്ധനയും, ഡബ്ലിനില് 11.8% വില വര്ദ്ധനയുമാണ് ഉണ്ടായിരിക്കുന്നത്.
നിലവില് രാജ്യത്ത് വീടുകള്ക്കുള്ള ഡിമാന്ഡ് ഉയര്ന്നു തന്നെ നില്ക്കുകയാണെന്നും, ഫസ്റ്റ് ടൈം ബയര്മാരുടെ എണ്ണം വര്ദ്ധിച്ചിരിക്കുകയാണെന്നും CSO കണക്കുകള് ചൂണ്ടിക്കാട്ടി വിദഗ്ദ്ധര് അഭിപ്രായപ്പെടുന്നു. ഡിമാന്ഡ് അടുത്ത കാലത്തൊന്നും കുറയാനുള്ള സാധ്യതയില്ലെന്നും അവര് അഭിപ്രായപ്പെടുന്നുണ്ട്.