ഡബ്ലിനിലെ Blanchardstown-ല്‍ കഴിഞ്ഞ രണ്ട് വര്‍ഷത്തിനിടെ നടത്തിയ വിവിധ മോഷണങ്ങളിലെ പ്രതിയെന്ന് സംശയിക്കുന്നയാള്‍ ഗാര്‍ഡയുടെ പിടിയില്‍. Clonlee-യില്‍ നടന്ന മറ്റൊരു മോഷണവുമായി ബന്ധപ്പെട്ട് അറസ്റ്റ് ചെയ്തപ്പോഴാണ് ഇയാളില്‍ നിന്നും മറ്റ് മോഷണങ്ങള്‍ സംബന്ധിച്ച വിവരങ്ങള്‍ അന്വേഷണോദ്യോഗസ്ഥര്‍ക്ക് ലഭിച്ചത്.
ചൊവ്വാഴ്ച വൈകിട്ട് 7.45-നാണ് ഡബ്ലിനിലെ Clonlee-യില്‍ വച്ച് ഒരാളില്‍ നിന്നും കവര്‍ച്ച നടത്തിയതിനെത്തുടര്‍ന്ന് 20-ലേറെ പ്രായമുള്ള ചെറുപ്പക്കാരന്‍ അറസ്റ്റിലാകുന്നത്. ഇയാളെ നിലവില്‍ ഗാര്‍ഡ ചോദ്യം ചെയ്തുവരികയാണ്.
2022 ഒക്ടോബര്‍ മുതല്‍ 2024 ജനുവരി വരെയുള്ള കാലയളവില്‍ Blanchardstown-ല്‍ നടന്ന വിവിധ മോഷണങ്ങള്‍ നടത്തിയത് ഇയാള്‍ ആണെന്നാണ് ഗാര്‍ഡ വിശ്വസിക്കുന്നത്. പ്രതിയെ ഇന്ന് Blanchardstown ജില്ലാ കോടതിയില്‍ ഹാജരാക്കിയ ശേഷം റിമാന്‍ഡ് ചെയ്തു.
കേസില്‍ തുടരന്വേഷണം നടത്തിവരികയാണ്.
